Tơnơ̆ tŭ lam lơh ù, dồ ròt tam sơntìl bơh nhai 12 nam 2023, tus tŭ do, ngai lơi Sươn kơnuh sơnơm Ngọc Linh mờ Thủ tướng Cíñ phủ Phạm Minh Chính dê pà sơntìl ai hìu bơnhă rƀah bơh kơnhoàl Tu Mơ Rông, càr Kon Tum dê in kung geh lơm cau drơng sền mờ sơngka sền gàr. Bi A Phai ơm tàm thôn Tân Ba, xã Tê Xăng pà git, thôn bi dê geh 22 hìu bơnhă rƀah geh kơnhoàl tam pà tơl hìu 40 tờm kơnuh sơnơm Ngọc Linh sơntìl mờ Thủ tướng dê pà. Nàng ală tờm kơnuh sơnơm kwơ kis dờng niam, jơh ală hìu bơnhă rƀah geh dong kờl kơnuh sơnơm sơntìl ndrờm lời bơta sơngka sền gàr kơrhia ngan tơl tờm kơnuh sơnơm. Bi A Phai, yal: Làng bol 22 hìu bơnhă rƀah lòt lơh jàl căng mờ bơtrơh đe, sềm. Hơ̆ sồng ai ƀòk kơ nàng sền gàr niam kơnuh sơnơm in. Tŭ neh lơh sir niam jơh ală broă là 3 hìu bơnhă dồ mpồl lòt tuh dà, hơ̆ sồng sền swì kơnuh sơnơm, sền gàr ai kơnuh sơnơm bơh làng bol dê in.

Bi A Phát là dồ nă cau tàm sùm ală ngai sa tềp bơhiàn pa do sùm geh mat tàm sươn sền gàr, sơngka sền gàr kơnuh sơnơm Ngọc Linh, đơs bè do: Geh Thủ tướng Cíñ phủ pà sơntìl kơnuh sơnơm bol hi kờñ ngan mờ chờ hờp ngan tài bơh bol hi là ală hìu rƀah lơm. Tơnơ̆ do kơnuh sơnơm niam, lơh geh cồng nha den bol hi ờ huan rƀah đau bè do nàng geh klàs bơh rƀah bè ală hìu ndai sơl.

Ai tơl ală bơta nàng 300 hìu rƀah tàm 23 thôn tàm 8 xã bơh kơnhoàl dê geh ù tam 12 rbô tờm kơnuh sơnơm Ngọc Linh bơh Thủ tướng Cíñ phủ dê pà, gơnoar ătbồ kơnhoàl Tu Mơ Rông neh jàu ai tơl xã in êt ngan là bơh nggùl lồ ù tềng hơđăng bơnơm Ngọc Linh tàm bă 6, Bă ù dềt 218 xã Măng Ri. Bă ù do gơ ơm tàm bơta jơnhoa rlau 1 rbô 500 thơk pơndrờm mờ măt dà lềng, tềng hơđơm mƀur chi brê geh is ƀươn ngan ai broă tam kơnuh sơnơm Ngọc Linh in.

Gơnoar ătbồ kơnhoàl kung neh rơcăng lài broă sươn 12 rbô tờm kơnuh sơnơm sơntìl geh Thủ tướng dê pà, ală hìu bơnhă rƀah tàm ală nam tus rơ̆p geh tơl ù nàng bơtờp sơntìl rề ơnàng ù sươn kơnuh sơnơm mơkung dong kờl bơta chài tam nàng kờñ sươn kơnuh sơnơm kis dờng niam lơh geh broă lơh broă sa jŏ jòng ai làng bol in. Ồng Võ Trung Mạnh, Củ tịc Ủy ƀan Ñân zân kơnhoàl Tu Mơ Rông, càr Kon Tum pà gĭt: Tủ tướng pà kơnuh sơnơm ai hìu rƀah in lơh geh broă lơh broă sa jŏ jòng mờ lik klàs bơh rƀah dồ bă kơ̆ kơl jăp ai làng bol in. Bơh bơta dong kờl bơh Thủ tướng dê, kơnhoàl neh jàu ai Cơldŭ lơh broă sa sươn sre, Anih tờm drơng broă lơh broă sa sươn sre bơto pơlam bè bơta chài ai làng bol in nàng làng bol in lơh tơrgùm bal, gàr niam bơta chài tam lơh geh cồng nha niam ngan rlau jơh. Lơh jơnau pal jăt ătbồ sền gàr sươn kơnuh sơnơm jăt tàm bơta hơ̆ jàu kơnòl loh làng gơ wèt mờ gơnoar ătbồ ală xã tàm pơdar dơ̆ sền gàr mờ ătbồ kung bè sền gàr sươn kơnuh sơnơm. Bơh tàm priă jền bơh Broă lơh jơnau kờñ dà lơgar dê ai bơh ală bơnah priă dong kờl nàng lơh pơngàr sền gàr.