Dồ poh do, ùr bơklau ồng Võ Văn Cao ơm tàm mpồl 10, thôn Bồng Lai, xã Hiệp Thạnh, kơnhoàl Đức Trọng, càr Lâm Đồng sàu ờ bơkah bĭc ờ lơhă, ntoăt jòi làm bă tiah nàng lùp broă chài dong kờl sơm kòp ai mpồl kơnrồ in. Bơdìh mờ 4 nơm kơnrồ dà toh gam geh bun kung gam pràn kơldang sơl, jơh 96 nơm kơnrồ dà toh gam wơl bơh hìu bơnhă dê ndrờm geh bơta gơ tơnggŏ kòp lơbơn, gơjroh è mhàm, tàm hơ̆ 2 nơm kơnrồ neh gơtìp chơ̆t. Ồng Võ Văn Cao pà gĭt, khà kơnrồ gơtìp kòp ndrờm pa cĭt vaccine rơcăng kơryan kòp as sồt kơltau gơlik pơnời lài hơ̆. Ồng Võ Văn Cao, đơs: Añ cĭt vaccine jơh 90 nơm kơnrồ in, mìng gam 4 nơm kơnrồ mờr deh den tàng ờ cĭt. Tŭ do, 10 nơm kơnrồ geh bơta gơ tơnggŏ kòp jê ndul gơjroh, 2 nơm neh chơ̆t rao. Bàr pe nơm den sa ñhơ̆t ờ pràn, bàr pe nơm kơnrồ ndai den gơlơh lơnguh ndì…añ gam kơlôi rơcăng ngan gơlơh bè nggui tềng gơnrồ ồs tơn. Tŭ do, pah ngai añ ndrờm blơi sơnơm kơnrồ in, dờng dềt ndrờm ai hùc sơnơm lơm. Sơnơm ndrờm blơi is hờ đah bơdìh, ai sơnơm pà den pa geh bơh ngai ƀòr tus tŭ do lơm, mơya mìng là pà sơnơm bơta C-gluco gời lơm”.

Hìu bơnhă mò Huỳnh Thị Kim Phượng ơm tàm thôn Lạc Nghiệp, xã Tu Tra, kơnhoàl Đơn Dương kung geh 76 nơm kơnrồ dà toh gơtìp kòp, 2 nơm neh chơ̆t. Bơta do mìng gơlik geh tơnơ̆ bàr pe ngai tŭ mpồl kơnrồ cĭt vaccine rơcăng kòp as sồt kơltau gơlik pơnời. Tơnơ̆ tŭ gŏ bơta gơ tơnggŏ ờ bè ờs tàm mpồl kơnrồ, hìu bơnhă mò neh hòi ƀak sĩ lơh sơnơm phan ròng tus kham, tơmŭt dà sơrồm, sơnơm tơm ba sơm kòp mơya kung ờ gŏ bời dồ êt lơi sơl. Mò Huỳnh Thị Kim Phượng, đơs: Tŭ neh cĭt vaccine den kơnrồ ờ bài sa, jơh dồ mpồl, kơnrồ lơi kơnrồ hơ̆ kung duh să lơm. Geh kơnrồ gơtìp gơjroh è mhàm, geh kơnrồ gơtìp gơjroh è dà jù mung lơm bè dà bŏ jù, 2 nơm kơnrồ neh gơtìp chơ̆t rao. Thôn añ dê geh bàr pe jơ̆t hìu gơtìp bè hơ̆, mơya geh 8 hìu geh kơnrồ ờ cĭt vaccine. 8 hìu do kơnrồ kung gam bè ờs sơl ờ gŏ gơtìp chi lơi jơh, ai ală hìu geh kơnrồ cĭt vaccine den ndrờm gơtìp jơnau bè do”.

Vaccine rơcăng kòp as sồt kơltau gơlik pơnời geh cĭt tàm mpồl kơnrồ dà toh tàm ù tiah 2 kơnhoàl: Đơn Dương mờ Đức Trọng bơh Kông ty Tă pơgồp bal priă lơh sa sơnơm phan ròng Dà lơgar NAVETCO geh anih lơh broă tàm càr Bình Dường pơrlòng geh broă blơi mờ tăc. Broă cĭt rơcăng kòp geh lam lơh bơh ngai 22/07 tus ngai 31/07/2024, mờ kờp jơh rlau 10 rbô ding. Tơnơ̆ tŭ gơlik geh jơnau gơ tơnggŏ kơnrồ dà toh gơtìp kòp mờ chơ̆t, càr Lâm Đồng neh ơm ing broă cĭt vaccine.

Jăt ồng Nguyễn Văn Long, Kwang ătbồ Kụk Lơh sơnơm phan ròng yal, kơno geh jơnau yal kơnrồ dà toh tàm càr Lâm Đồng kòp mờ chơ̆t, mho ngai 07/08, kwang đơng lam bồ Ƀộ Broă lơh sa mờ Bơtàu tơngguh Ƀòn lơgar neh sồr Kụk Lơh sơnơm phan ròng dà lơgar dê lam mpồl lơh broă tus sền, lam lơh ală broă lơh rơcăng mờ kơryan kòp bơtờp. Ồng Nguyễn Văn Long, đơs: Bol hi neh hòi tơrgùm ală cơldŭ lơh tơrlòng lài niam ngan rlau jơh bơh gah lơh sơnơm phan ròng Việt Nam dê, ală cau gĭt wă jrô broă do jak ngan rlau jơh lam ai dồ êt kòp nàng sền swì nền tus geh, sền tiah lơi là jơnau tờm gơlam tus kơnrồ gơtìp kòp, gơtìp chơ̆t tàm càr Lâm Đồng. Ƀộ Kung neh geh jơnau sồr, bơto pơlam loh làng ală broă lơh lam lơh kơryan kòp, broă lơh ătbồ nàng tơrmù ƀà khà kơnrồ gơtìp kòp, tơrmù ƀà khà kơnrồ chơ̆t.

Bal mờ bơta dong kờl bơh Ƀộ Broă lơh sa mờ Bơtàu tơngguh Ƀòn lơgar, càr Lâm Đồng kung neh tơrgùm jơh pràn dong kờl mpồl kơnrồ gơtìp kòp nàng kờñ dong cau lơh broă sa tơrmù ƀà hoàc hươr. Bulah bè hơ̆, khà kơnrồ bơtờp kòp mờ chơ̆t kung gam sơlơ gơguh tai. Tus jơh ngai 10/08, càr Lâm Đồng gĭt gŏ geh 4 rbô 495 nơm kơnrồ dà toh gơtìp kòp mờ 193 nơm kơnrồ neh gơtìp chơ̆t, gơguh mờr 600 nơm kơnrồ kòp mờ 21 nơm kơnrồ gơtìp chơ̆t pơndrờm mờ dồ ngai lài hơ̆. Mơkung bal mờ broă lơh kơryan kòp, ală anih lơh broă geh gơnoar gam pơn jăt tai sền swì nàng gĭt nền jơnau tờm lơh bơtờp kòp tàm mpồl kơnrồ dà toh tàm càr Lâm Đồng.