Tàm càr Dăk Lăk – tiah tờm kơphê bơh jơh gùt lơgar dê, uă mpồl lơh sa kă bro gam rơcăng lài rơndăp tăp sèng wơl ală anih lơh gơlik phan, bơcri priă rơndăp tăp sèng ngan bơh tiah tam phan, lơh gơlik phan niam tus lơh kă bro phan mờ ală lơgar. Ồng Lê Đình Tư, Kwang Lam bồ Kông ty Kong kơnòl nă să is Aeroco pà gĭt, mpồl lơh sa kă bro pa kơlôi sơnơng – bơtàu tơnguh phan bơna, mơkung gơhòi gơ jà ală dơ̆ lòt nhơl ală lơgar sền gŏ ală broă lơh gơlik.

Phan bơna bơh sươn dờng sơnđờm geh jun tơmŭt tàm ală drà kă bro phan điện tử tàm bơnah drà phan niam ngan mờ ală ƀlàng rơndeh par ală lơgar Việt Nam dê, lơh geh priă bơh kă bro uă ngan. Ồng Lê Đình Tư kơ̆p gơn: “Bol he geh uă ngan bơta ƀươn nàng bơtàu tơngguh bơta Robusta bơh Dăk Lăk dê đơs is mờ Việt Nam dê đơs bal. Tàm ală nam pa do, den Aeroco neh geh ală khà jờng ală lơgar dê, lơh geh ală cồng nha là niam ngan. Nam do, kung pal lơh ngan uă rlau tai, ai gơ̆p bơyô tàm lơgar mờ bơdìh lơgar in gĭt tus uă rlau mờ rơ̆p lơh marketting niam rlau uă tai”.

Bal bơta pin dờn tàm sơnam pa, uă mpồl lơh sa kă bro kơnòm să kung gam lời wơl tềl kah niam tàm sră wăc rùp kơphê bơkah ală lơgar dê. Mò Dương Nữ Thiên An, Kwang Lam bồ Kông ty Kong kơnòl nă să is kă bro phan drơng broă sa priă lơh gơlik tăc mờ blơi phan mờ lơgar ndai Si Café yal, nam 2026 geh sền là sơnđờm bơh sơnrờp ƀươn ƀoài ngan tŭ bơh bồ nam tơn, drà Ñờk dê neh dờn blơi phan bơna kơphê 100% Robusta gar chàng bơh kông ty lơh gơlik, container phan bơh sơnrờp geh tăc mờ lơgar ndai tàm bồ nhai 1 nam 2026 mờ rơcăng tăc mờ lơgar ndai container phan dơ̆ bàr.

“Tàm nam do, bol hi tơrgùm jơh bơta pràn ai drà Ñờk in, bơh săc rwah phan ngui lơh phan, bơtàu tơngguh phan bơna tus rơndăp lơh kơldung, ơn tàm kơldung, nàng kờñ kơ̆ kơl jăp mờ rề ơnàng drà tăc blơi dồ bă kơnhăp jŏ”.

Ờ mìng tơrgùm tàm broă lơh kă bro lơm, mpồl lơh sa kă bro kơphê bơkah is gam rơcăng lài tàm tơrbŏ, tề lam mờ gơgơs ală mpồl lơh broă ai gah phan in. Ồng Hoàng Danh Hữu, cau bơceh lơh măt kă bro phan Miss Êđê – mpồl lơh sa kă bro neh tăc kơphê tus ală lơgar: Mỹ, Hàn Quốc, Singapore mờ Nga đơs là, broă wă wờng drà tăc blơi phan niam ngan mờ jơnau kờñ bơh ală cau gĭt wă jrô ală lơgar dê là pờ gùng kwơmàng nàng kơphê bơkah is Việt Nam dê lòt ngài rlau. Tàm nam 2026, mpồl lơh sa kă bro rơ̆p pơn jăt tai bơh ală broă lơh cribơyai broă mờ lơgar ndai kă bro phan nàng dong kờl ală anih lơh sa sươn dờng kơphê bơkah gĭt mhar rlau drà tăc blơi phan niam ngan lơgar Hàn Quốc dê:

“Tŭ gĭt geh ală drà kờñ bơta lơi, bol hi rơ̆p yal wơl ală jơnau sồr, jơnau sồr pal geh hơ̆ tus ală cau lơh gơlik phan, tơrgùm ală mpồl mờ mpồl lơh sa kă bro tàm lơgar nàng bal mờ gơ̆p lơh gơlik geh dùl mpồl lơh bal, dùl mpồl lơh broă, dong ală anih lơh sa sươn dờng ờ duh pal lòt is dồ nă să mờ ờ gam jơnau mìng lòt pơrlòng mờ ờ geh drà tăc”.

Pơgồp bơnah kwơmàng tàm gùng lòt đơs nền bơta kwơ kơphê Robusta bơkah dê, là gơnoar broă tề lam bơh ală mpồl lơh sa kă bro tăc phan mờ lơgar ndai dờng dê. Tàm Dăk Lăk, Kông ty Kong kơnòl nă să is Tăc mờ lơgar ndai 2 nhai 9 Dăk Lăk (Simexco Dăk Lăk), neh lơh lài bơ̆t bơtàu ală anih tăc phan lơh jơh ală broă, sok sền bơta niam, jòi gĭt anih tờm lơh, tàm tơrbŏ mờ lòt bal jŏ jòng bal mờ srơh kơphê bơkah is. Ồng Nguyễn Tiến Dũng, Phó Kwang Lam bồ dờng Kông ty Simexco Dăk Lăk pà gĭt, mpồl lơh sa kă bro neh dong kờl ală mpồl lơh broă bal, hìu làng bol lơh broă sa mờ sền gàr dong kờl ală anih nhơl dipal ală lơgar dê bal mờ bơta kơ̆p kờñ pơgồp bơnah lơh bơta niam gơgơs bơta kwơ kă bro phan ngan ngồn.

“Bol hi gam lơh bal mờ 50 hìu làng bol lơh broă sa Tây Nguyên nàng lơh gơlik ală jơnau sồr kơphê kơnhăp jŏ. Tài bơh kờñ lơh gơlik geh kơphê bơkah mờ niam den pal geh phan bơna bơ̆t bơtàu, pơnyơu bè ală anih ìs pơr do, măy mŏk phan ngui kờñ pal geh nàng lơh gơlik geh kơphê bơkah kung bè lơh gơlik kơphê niam uă, tơngguh uă bơta kwơ bơh gar kơphê dê den rơ̆p cèng wơl lơh niam wơl broă lơh broă sa ai làng bol lơh broă sa in uă rlau”.

Bal mờ bơta pin dờn pràn kơldang tàm bơta niam kơphê Dăk Lăk dê đơs is, Việt Nam dê đơs bal, nam 2026 geh gơn kơnờm rơ̆p là dùl nam tam gơl pràn bơh kơphê Robusta bơkah dê, ờ mìng pờ ơnàng drà tăc mờ lơgar ndai lơm mờ gam rơhời tơngguh anih bơngă kơphê Việt Nam dê tàm sră wăc rùp dunia, tàm nùs nhơm pin dờn, rơcăng lài mờ bềng bơta kơ̆p kờñ ngan ai gơl gùng pa in.