Tơnơ̆ bàr pe dơ̆ mìu bồ kàl, ală plai sầu riêng tàm sươn hìu ồng Y Bliêng Hmok, ơm tàm ƀòn Tara, xã Hoà Đông, kơnhoàl Krông Păch, càr Dăk Lăk dờng mhar bè càl khồm tơn, jơh ală neh dờng di kàl bơngàn sào piang. Y Bliêng den gam hàu hơđăng jơnhoa ngan tềng cồng chi, kơ̆t kơnhăp tơl nơm ntê mờ sơmpring. Tàm dồ anih sươn, dồ tờm sầu riêng ndai gơlơh bè ờ pràn, geh rơsìh cur bò tờm. Y Bliêng pà gĭt, trồ tơngai prang duh ir tàm kàl prang pa do neh lơh tờm chi ờ pràn, khà plai mìng geh nggùl pơndrờm bal dồ tŭ mờ nam lài, den tàng hìu bơnhă pal tơrgùm sơngka sền gàr, kơryan jơnau pơhìn ờ niam plai tài bơh bơsềt kòp halà pă gơjrùh tài mìu càl. Ồng Y Bliêng, đơs: Kàl do uă ngan là he lòt ƀòm sơnơm mờ kơ̆t plai sầu riêng. Kơ̆t ală ntê lơi geh plai kơn jơ̆ ngòt ngai do ngai hìng mìu càl dờng gơ rơnggô là ờ niam tờm. Gơtìp gơrung bàr pe nơm là pơlai ngan.

Gơ wèt mờ ală hìu geh sươn dềt mờ mìng bàr pe jơ̆t tờm sầu riêng bè Y Bliêng ndrờm gơtùi sơngka sền gàr is sươn chi he dê mơya ală hìu bơnhă tam uă sầu riêng, ngan là sầu riêng jŏ nam, ndrờm pal apah uă ngan cau nàng tàm ntoăt pơrlòng mờ kàl mìu càl rbŭt dờng. Bè ồng Phạm Dần, ơm tàm thôn Hoà Thành, xã Hoà Đông, bơh gùl nhai 05, tŭ plai gam dềt neh pal apah dồ mpồl cau geh 6 nă lơh broă lơh hàu hơđang chi, kơ̆t ntê, kơ̆t plai sầu riêng. Ồng Dần yal, tŭ geh mìu ring bal, plai sầu riêng rơ̆p dờng mhar ngan, dồ ntê sầu riêng digơlan pal àñ ơnòng tus nggùl tạ plai, den tàng hìu bơnhă pal lơh mhar. Ồng Dần, yal: Kàl mìu neh tus rao, he ờ rơcăng lai ờ thàn. Tài bơh mìu sùm geh bal càl. Mờ tŭ hơ̆, plai he dê neh dờng rao, den tìp càl là gơ pă.

Mờ hìu bơnhă ồng Nguyễn Đình Vượng ơm tàm thôn Hoà An, xã Hoà Đông, den broă sơngka sền gàr sầu riêng ntê geh lơh ur ar ngan. Sươn chi tàm sơnam 18, ntê nsrum nha klăp klê ngan, geh tŭ kờñ pal geh dồ mpồl cau gal tus rlau 10 nă. Cau pès ñhơ̆t, cau tùng àñ jrong dra lơh mờ lòs tus tơl anih ồng Vượng sơñio, nàng dong kờl sầu riêng kong jai mờ mìu càl. Ală cau ndai den hào pòl sùm tus hơđang jơnhoa nàng kơ̆t ntê tàm jrong dra. Jăt ồng Vượng yal, kàl sầu riêng bơh tŭ geh plai tus tŭ pik sùm jŏ jòng pơgăp 130 ngai, tŭ do neh geh rlau 60 ngai. 70 ngai gam wơl bơh kàl lơh sa dê, cau lơh broă sa rơ̆p lơh ngan sền gàr tơl plai sầu riêng. Jơh bal cau lơh apah mờ cau tờm sươn, ndrờm sền dờng màng ngan tơl plai chi bè sền dờng màng dà sơ uh, dà pơhàl dà măt he dê sơl. Ồng Vượng yal: Bi sền tĕ tờm do do. Añ ơm ntàu bơh hơđơm añ đơs mờ cau bañ hàu hơđang tai mơya khi kung gam hàu sơl. Hàu jơnhoa tơn tus cồng chi geh bàr nơm plai. Dilah ờ kơ̆t den ngan ngồn là sang gơ. Càl dồ dơ̆ là pă tơn tài bơh 2 nơm plai là kơn jơ̆ pơgăp 7 kĭ den mbè ờ gơ pă hơ̆ i. Mơya, kơ̆t bè hơ̆ den gàr geh 2 nơm plai hơ̆. Mờ geh bàr nơm plai hơ̆ den jơngkah priă tơm priă apah cau, geh bal priă sào sa tai kung gam jơngkah sơl, bal mờ lơh geh tai broă lơh broă sa ai cau in den tàng lơh cau in chờ hờp ngan.

Jăt ồng Đỗ Văn Thưởng, Kwang ătbồ Mpồl Cau lơh broă sa xã Hoà Đông, yal: kàl prang pa do ờ niam ngan neh lơh jơnau gơrung plai dồ ròt tàm uă cau lơh sươn. Mơya bal mờ ală bơta mờng chài tàm kơnhoàl tam sầu riêng uă ngan rlau jơh càr Dăk Lăk mờ bơta jơh nùs, lòt còp, cribơyai tàm lùp bơta mờng chài bơh ală cau tàm mpồl cau lơh broă sa dê, uă ngan ală sươn sầu riêng tàm xã kung gam geh sơl bơta gơn kơnờm bơtàu tơngguh gàr geh cồng nha lơh geh. Ồng Thưởng, đơs: Tus tŭ do, den khà gơtìp gơrung kung gam gơ ơm tàm bơta kờp dŭ lài bơh he dê sơl, hơ̆ là tềng hơđang chi gam geh gàr pơgăp kàr hơ̆ sơl. Ală sươn mờ sền gàr lơhĭt lơhuăt den digơlan kung gam gơjrùh plai sơl, mơya gơ wèt mờ ală cau sền gàr niam den khà hơđang chi bè hơ̆ là lơh geh.

Dăk Lăk là càr tam sầu riêng uă ngan rlau jơh tàm gùt lơgar bal mờ rlau 32 rbô lồ. Ai tàm Krông Păch là kơnhoàl tam sầu riêng uă ngan rlau jơh càr Dăk Lăk, bal mờ mờr 10 rbô lồ. Tờm sầu riêng ờ mìng dong uă cau lơh broă sa kơnhoàl do gơgơs cau geh priă tơmàn mờ gam cèng tus kơnhoàl ù tiah do in dồ dơ̆ lơh chờ gah phan lơh gơkờñ ngan cau, là Lơh chờ sầu riêng Krông Păch, geh lơh 2 nam dồ dơ̆. Mờ bơta tơryăng tơryồng, jơh nùs jơh tồr, cau lơh broă sa tam sầu riêng tàm xã Hoà Đông, kơnhoàl Krông Păch, càr Dăk Lăk gam sơrlèt gan ală kal ke bơh trồ tiah dê, wèt tus bơta chờ hờp wil tơl tàm dơ̆ Lơh chờ Sầu riêng Krông Păch dơ̆ 2, geh lơh tàm bồ nhai 09 tus.