Bơh gar sơntìl sih tam tàm Dà Làc rlau 30 nam lài, tus tŭ do Dalat Hasfarm neh geh 4 anih lơh sa sươn dờng bal mờ 220 lồ hìu krơh măy mŏk pa, tăc bơkàu mờ lơgar ndai tus 18 dà lơgar câu Âu mờ lơgar Mỹ. Tàm Việt Nam, mpồl lơh sa kă bro do geh 25 hìu ràng tăc bơkàu mờ rlau 300 anih tăc tàm drà pa, lơh geh broă lơh ai gĭt nđờ rbô nă cau lơh broă ƀòn lơgar in. Ồng Aad Gordijn Ell Cordin, Kwang Lam bồ dờng Kông Ty Kong kơnòl nă să is Dalat Hasfarm đơs nền: “Bol hi neh tus di anih, di tơngai. Dà Làc geh nhơm trồ tiah niam ngan rlau jơh tàm tiah đah jum măt tơngai lik câu Á nàng tam bơkàu, tam biăp. Ồng yal: “Añ chờ hờp ngan geh tus ndo nàng tam pà dùl tŭ niam, dùl jơnau bơh gar sơntìl dềt ngan neh geh sih tam 31 nam rê hờ lài mờ tŭ do neh gơgơs dùl bơta chi dờng mờ rư̆p ngan ntê chi”.

Tơnơ̆ tơmŭt bal 3 càr: Lâm Đồng, Dăk Nông mờ Bình Thuận, càr Lâm Đồng pa geh rlau 1 tơlak lồ ù lơh broă sa sươn sre bal mờ uă bơta chi tam cèng wơl cồng nha lơh sa uă; là dùl tàm 5 càr lam lài jơh gùt lơgar bè tăc mờ lơgar ndai phan lơh geh bơh sươn sre priă jền uă, bè: Kơphê, bơkàu, biăp, tiêu, sầu riêng mờ thañ long. Jăt ồng Lê Huy Anh, Phó Lam bồ Kụk Geh ngui bồ tơngoh jak, gơ wèt Ƀộ Jak chài mờ Măy mŏk dê yal, mìng is bè kơphê, càr Lâm Đồng neh geh ală broă lòt niam ngan ai bơta lơh li la, lơh mờng chài broă: “Kơphê càr Lâm Đồng dê jăt jơnau đơs bơh bol hi dê là dùl phan bơna is ồn ngan. Bơtàu tơngguh geh jơh bal kơphê arabica mờ kơphê rubusta. Ờ geh uă ƀòn lơgar bơh Việt Nam dê mờ gơtùi tam geh dùl tŭ bal 2 bơta chi tam do. Kụk Geh ngui bồ tơngoh jak bol hi kung neh lùp sền nền wơl dùl bă niam ngan dipal nàng pà sơñio pơlam ù tiah ai phan bơna do in”.

Lâm Đồng tŭ do là dùl tàm ală tiah tờm lơh broă sa sươn sre măy mŏk pa khà dùl gùt lơgar dê. Càr tŭ do geh bă ù lơh broă sa sươn sre ngui măy mŏk pa geh rlau 107 rbô lồ, priă phan bơna kờp bal geh pơgăp 195 tơlak đong dùl lồ. Is ồn, biăp mờ bơkàu Dà Làc bơh jŏ neh gơgơs rùp pơrya, gŏ măt tàm uă drà kal ke bè Ñờk, Hàn Quốc, câu Âu mờ đah tô câu Mỹ. Ồng Nguyễn Ngọc Phúc, Phó Củ tịc Anih duh broă Làng bol càr Lâm Đồng pà gĭt, bơta ƀươn ngui jak chài măy mŏk tàm lơh broă sa sươn sre gam pơn jăt tai tơnggŭ bơngă ai phan lơh geh bơh sươn sre ƀòn lơgar dê in.

“Lâm Đồng geh dùl rài broă lơh sa sươn sre pràn ngan. Lâm Đồng geh bơta ƀươn là ală cau gĭt wă jrô lam bồ gah uă ngan tàm ală Anih kơlôi sơnơng, ală klờng đại họk. Mpồl cau lơh broă do pơn jăt tai dong kờl ai broă tam gơl pa măy mŏk mờ bơceh lơh in. Lơh pràn ngui sồ tàm broă lơh sa sươn sre. Do là broă mờ bol he gam geh bơta ƀươn. Do kung là tơngai nàng Lâm Đồng bol he tam gơl pràn pràn kơldang tàm ngui jơh bơta ƀươn bè nhơm trồ tiah, bè broă lơh sa sươn sre mờ ù tiah bơtàu tơngguh tam gơl pa bơceh lơh”.

Kơnờm rơcăng lài ngui jak chài – măy mŏk, cồng nha lơh geh, bơta niam mờ priă jền phan lơh geh bơh sươn sre càr Lâm Đồng dê ngai sơlơ gơguh uă tai. Mŭt tus tŭ tơngai bơtàu tơngguh pa, càr Lâm Đồng sền gròi is ồn ngan tus bơ̆t bơtàu măt kă bro, rề ơnàng drà tăc blơi, lơh broă bal ală lơgar nàng gơdờp mờ tam gơl nhơm trồ tiah, pơgồp bal mờ bơtàu tơngguh lòt nhơl broă lơh sa sươn sre ƀòn brê bơnơm. Jăt ồng Hồ Văn Mười, Phó Ƀí thư Tỉñ ủy càr, Củ tịc Anih duh broă Làng bol càr Lâm Đồng, ală tiah broă lơh sa sươn sre dờng càr dê rơ̆p geh lơh niam jơh nùs jơh pràn tàm ală bơta pa bè jak chài măy mŏk mờ phan bơna gùng lòt: “Bol hi neh tơrgùm phan bơna gùng lòt kràñ cê jơh nùs lài mờ nam 2028 là gùng rơndeh lòt mhar pal tàm tơrbŏ geh bơh ndo mù tus ƀòn dờng Hồ Chí Minh. Kơnhoàl ù tiah Gia Nghĩa kung bè hơ̆ sơl mù tus Đồng Nai mờ ƀòn dờng Hồ Chí Minh. Hơ̆ sồng bol hi rơ̆p jơh nùs lơh ngan bơ̆t bơtàu geh gùng đah măt tơngai Lik – Mŭt tơrbŏ bơh Gia Nghĩa lòt tus Bảo Lộc tus Phan Thiết pơgăp 120 kơi sồ. Is ồn là ƀlàng rơndeh par ală lơgar Liên Khương tơnơ̆ do kung lơh ơnàng wơl wă ală rơndeh par dờng ngan rlau jơh tŭ do rê gơtùi. Ƀlàng rơndeh par Phan Thiết là ƀlàng rơndeh par ling klàng neh ai ngui hơ̆ sồng bol hi kung neh yal Dà lơgar in nàng bơ̆t bơtàu ai mŭt lơh broă ƀlàng rơndeh par ngui dùl bơnah tàm nam 2026 do”.

Đơs nền bơngă bơta kwơ tơngguh bơngă ală lơgar ai phan lơh geh bơh sươn sre ờ mìng là jơnau kờñ lơh sa lơm, mờ gam là gùng lòt tơngguh uă rài kis làng bol in mờ bơtàu tơngguh broă lơh sa sươn sre kơnhăp jŏ càr Lâm Đồng dê. Mờ bơnàng jă neh geh bơ̆t bơtàu bal mờ jơh nùs lơh ngan tam gơl pa mờ mŭt gơrờm bal mờ ală lơgar tàm rài brồ să dà lơgar dê, phan lơh geh bơh sươn sre Lâm Đồng gam rơhời gơlòt ngài, cih tềl loh làng ngan tàm drà kă bro ală lơgar.