Tàm bă ù ơnàng pơgăp 8 rơbô thơk vuông tàm sàh Nam Hà Lâm Hà, ồng Trần Văn Tấn tam 2 sơntìl plai màk tờm là dum phồng lơngồt mờ dum phồng sràt. Broă lơh geh lam lơh bơh nhai 4 nam 2026, tam jat gùng dà VietGAP, ngui ală ding dà tuh dà ntờc pơgồp bal mờ sih phơng is mờ phan glòm mat ù jat broă lơh sa suơn sre dê.

Tiah tam phan neh geh pà màh sồ tiah tam. Den tàng, bal mờ tơnguh cồng nha tơnhào, ồng Tấn sền gròi gàr niam broă lơh tam phan, gròi sền tu kòp lơh aniai mờ bơta niam bơkah bơh phan bơna dê. Dà mờ phan pràn tàm ù geh jun tơn tàm tờm chi in; phan glòm mat ù dong tơrmù ƀà ñhơ̆t hòn lềng, gàr niam sù iò mờ tơrmù ƀà dà kơl hề sơng ka sền gàr.

Mờ bă ù do, ồng Tấn kờp dŭ tơnhào pơgăp 100 tấn plai màk tàm dùl tơngai lơh broă geh 3 rơnàng. Giă tam gơl bơh 15 rơbô tus 17 rơbô đông dùl kĭ. Phan bơna uă ngan kung tăc bro bơh cau kă bro tàm lơgar den tàng ồng Tấn gam pơn jat tai lơh sir broă lơh, tơnguh bơta niam bơkah mờ jòi gĭt tiah tờm lơh gơlik.

“Tam den phơng mờ bơta pràn ù dê añ mìng sih phơng ring bal ai tờm chi in mờ uă ngan rcang lài kơryan tu kòp lơh aniai. Neh lơh den hơ̆ sồng añ gĭt bơta tu lơi lơh aniai tờm chi, chi sùm gơbàn tu kòp lơi nàng rcang lài kơryan kòp. Tàm tŭ lơh he kung geh lùp bơsram, tàm bơyai tai mờ gơ̆p bơyô, oh mi. Tŭ do geh bè do sùm là niam ngan, tài bơh 8 sào añ lơh tơnhào geh gĭt nđờ rơhiang tấn, giă bè do geh sền là cau lơh broă sa kơ̆p gơn mờ kơ̆p kờñ ngan”.

Ngan ngồn bơh broă lơh do pà gŏ, geh pà màh sồ tiah tam pa mìng là bơh sơn rờp lơm. Nàng gàr niam màh sồ mờ rề ơnàng drà kă bro, cau tam phan kung gam pal lơh jat di mờ broă lơh, gròi sền phan bơna bơcri lơh, bơta niam bơkah phan bơna dê mờ bơta pràn jòi gĭt tiah tờm lơh gơlik.

Tàm sàh Đơn Dương, bàr pe hìu bơnhă tam plai màk gam lơh tai dùl broă lơh tŭ ờ mìng gàr niam ală bơta bơh màh sồ tiah tam dê lơm mờ gam bơcri priă lơh hìu jàl, lơh sa jat gùng dà broă lơh siñ họk mờ atbồ kơ̆ ală jơnau yal tiah tam nàng tơnguh bơta niam bơkah, khà lơh geh mờ bơta kwơ phan bơna dê.

Bơh nhai 6/2024, ồng Nguyễn Ngọc Vân tam gơl rlau 3 lồ hìu krơh, hìu jàl tus tam sơntìl plai màk TC19. Ală broă lơh hìu jàl dong tơrmù ƀà uă ngan tu cuh lơh aniai bơh đah bơdìh, tơrmù ƀà khà gơtìp gơ còr, sồt ờ niam, mơkung bè ờs ală bơta dờng niam, tơnguh khà phan bơna lơh geh jơnau sồr tăc phan mờ lơgar ndai dê.

Broă tam phan geh pơlam gùng dà jat broă lơh siñ họk, tơrmù ƀà ngui phơng sih, sơnơm sền gàr phan tam. Bơdìh hơ̆, ală jơnau yal tiah tam, cih broă tam phan, tŭ tơngai mờ khà lơh geh tơnhào geh sền gĭt nàng drơng broă atbồ mờ jòi gĭt tiah tờm lơh gơlik. Ồng Nguyễn Ngọc Vân pà gĭt:

“Bàr pe anih blơi plai màk dờng khi đơs dilah lơh jat gùng dà sàng goh den kờp bal ờ hơđơm 40 rơbô đông dùl kĭ den tàng añ sùm pơnđơl pràn lơh ngan gàr niam tơl jơnau sồr hơ̆. Hơ̆ là lơh tàm hìu jàl den tơrmù ƀà geh uă ngan phan lơh aniai bơh đah bơdìh gơ par mut. Tu kòp lơh aniai dồ ết den plai bơñà niam rlau, lơh geh khà tơl jơnau sồr tăc phan mờ lơgar ndai kung uă rlau tai sơl”.

Tàm suơn, ồng Vân gam bơcri priă lơh gùng rơndeh jun pơndiang phan nàng tơrmù ƀà bơta gơ tàm tŭp tơnơ̆ tơnhào phan. Plai màk tơl bơta kràñ geh pĭc tơnhào, pơn jat tai geh pơ ngồm nàng tơnguh dà dum phồng uă lài mờ tŭ tàm sac plai. Plai khà 1 geh mpồl lơh broă sa blơi jơh tơn mờ giă pơgăp 42 rơbô đông dùl kĭ.

Kung tàm tiah do sơl, bi Nguyễn Phi Hùng bơcri priă lơh pơgăp 1 lồ plai màk jat gùng dà sàng goh, ai ngui lài phan bơna siñ họk mờ tơrmù ƀà ngui dà sơnơm. Broă gàr niam màh sồ tiah tam geh pơgồp bal mờ gròi sền phan bơna bơcri priă lơh, bơta niam bơkah plai dê mờ sền sơwì lài mờ tŭ jun tàm anih tăc bro.

 “Tam jat broă lơh do den tơrmù ƀà pal ƀồm ală bơta dà sơnơm, giă kung kơ̆ kơl jăp rlau pơndrờm mờ tam đah bơdìh sơl. Phơng, sơnơm uă ngan ngui jat gùng dà siñ họk. Phan bơna tơnơ̆ hơ̆ pal jun lòt sền sơwì, lơh geh jơnau sồr hơ̆ sồng geh tăc mờ lơgar ndai”.

Ală hìu bơnhă tam plai màk gam hời rơ hời lơh sir ală jơnau yal tiah tam mờ jòi gĭt tiah tờm lơh gơlik, bơh cih jơnau tam phan, phan ngui tàm broă tam phan, ngai mờ khà tơnhào geh tus jơnau yal anih dăp ơn klơm, màh bơnah phan mờ drà tăc bro phan bơna. Bơh hơ̆, màh sồ tiah tam gơ gơs phan ngui atbồ geh cồng nha sùm tàm tŭ tam phan.

Lơh jat Jơnau lơh nền tàm pơrjum sồ 36 nam 2026 bơh Chính phủ dê, sră pơ àr bè màh sồ tiah tam, màh sồ anih dăp ơn klơm geh lơh ƀal hiă rlau, mơya jơnau sồr gàr niam broă lơh, bơta niam bơkah mờ ală jơnau yal dê kung pal geh gàr niam. Do là bơnàng jă nàng plai màk càr Lâm Đồng in tơnguh bơta kwơ, pờ ơnàng drà kă bro mờ lơh geh niam rlau ală tơl jơnau sồr tăc phan mờ lơgar ndai.

Ơ làng bol mờ ală bơyô! Jơnau lơh nền sồ 36 nam 2026 bơh Chính phủ neh lơh ƀuơn sră pơ-àr gơnoar atbồ bè màh sồ tiah tam, màh sồ hìu đăp klơm phan, ai tơl bơta niam nàng làng bol, mpồl lơh broă bal mờ mpồl lơh sa kă bro geh tus bal ƀuơn rơlao. Mơya, geh ai màh sồ pa mìng là broă lơh lài ngan. Bơta kwơ màng rơlao là lơh bè lơi nàng tiah tam geh sùm di mờ broă lơh, sền gròi bơta niam, jòi tiah tam mờ pơgồp bal phan geh lơh mờ drà kă bro kơl jăp. Ồng Lê Quốc Thanh, Kwang Lam bồ Anih tờm Dong kờl bơto pơlam broă lơh sa suơn sre dà lơgar yal bè ală gùng dà broă lơh nàng broă lơh do geh mŭt tàm mùl màl lơh sa dê.

Ơ ồng, Jơnau lơh nền sồ 36 nam 2026 bơh Chính phủ dê neh lơh ƀuơn sră nggal bè màh sồ tiah tam, màh sồ hìu dăp klơm phan. Anih tờm Dong kờl bơto pơlam broă lơh sa suơn sre dà lơgar rơ̆p lơh bè lơi nàng làng bol lơh broă sa, mpồl lơh broă bal ƀuơn tus bal mờ lơh geh cồng nha rơlao?

Ồng Lê Quốc Thanh: “Tơnơ̆ mờ tŭ Jơnau lơh nền sồ 36 geh ai ngui, Anih tờm Dong kờl bơto pơlam broă lơh sa suơn sre dà lơgar neh pơgồp bal mờ ală mpồl lơh broă tờm sền sơwì pang sră drơng tàm broă bơto, bơto sồr mờ bơsram tàp ai mpồl lơh broă dong kờl bơto pơlam broă lơh sa suơn sre tàm gùt lơgar in.

Bol añ lơh geh ală pang sră jăt gùng dà broă lơh ƀuơn, ƀuơn geh nàng kwang bàng ƀòn lơgar mờ làng bol lơh broă sa gơtùi ngui tơn. Pang sră ai ngui geh bal pang sră lip mờ ală anih yal tơngit tàm internet, dong kờl cau lơh sa gơtùi sền broă lơh, broă yal mờ ală broă lơh gơrềng bal tus mờ màh sồ tiah tam, màh sồ hìu dăp klơm phan.

Bal mờ hơ̆, Anih do kung bơyai lơh bơto, bơsram tàp ai mpồl lơh broă bơto pơlam broă lơh sa suơn sre in, tàm hơ̆ uă ngan là cau lơh broă dong kờl bơto pơlam broă lơh sa suơn sre kấp sàh mờ bơto pơlam broă lơh sa suơn sre mpồl bơtiàn. Do là mpồl lơh broă tơn mờ làng bol tàm tiah lơh sa, dong kờl làng bol geh tus bal mờ ală jơnau geh ai pa mờ bơsong ală bơta gơlik geh tàm mùl màl”.

Ơi, geh ai màh sồ pa mìng là broă lơh lài ngan. Di bè hơ̆, gùng dà broă lơh lơi nàng ală tiah lơh sa geh sùm niam màh sồ, gàr bơta niam mờ jòi gŏ geh tiah tam, ơ ồng?

Ồng Lê Quốc Thanh: “Bơdìh mờ prang sră bơto sồr dan cih măt, yal màh sồ tiah tam tàm điện tử, bol añ gam sền sơwì ală broă lơh sa mùl màl mờ bơyai lơh bơto nàng làng bol lơh di tơn tàm tiah lơh sa.

Màh sồ tiah tam mìng là dùl bơta geh. Bơta kwơ màng rơlao là cau lơh sa pal ngui mờ geh sùm broă lơh di mờ bơta chài. Den tàng, Anih bơto mpồl cau lơh broă dong kờl bơto pơlam broă lơh sa suơn sre mờ mpồl dong kờl bơto pơlam broă lơh sa suơn sre mpồl bơtiàn tàm ală tiah nàng sùm lơh broă, pơlam ai làng bol in.

Tàm broă lơh sa, bơh broă ngui phan lơh broă lơh sa suơn sre lài ngan tus mờ broă rơcang kơrian tu kòp ha là ală bơta gơlik geh, làng bol gơtùi cri bơyai tơn mờ mpồl dong kờl bơto pơlam broă lơh sa suơn sre nàng geh bơto sồr di tŭ. Mìng tŭ atbồ mờ geh sùm bơta niam màh sồ tiah tam den phan geh lơh hơ̆ sồng gơtùi di pal mờ bơta kơl jăp bơh jơnau sồr drà kă bro dê”.

Ơ ồng, gơwèt mờ tờm plai màk tàm càr Lâm Đồng, Anih dong kờl bơto pơlam broă lơh sa suơn sre geh gùng dà broă lơh bè lơi nàng lơh uă broă lơh sa jăt broă lơh, pơgồp bal tiah tam mờ lơh gơs phan mờ tăc mờ lơgar bơdìh?

Ồng Lê Quốc Thanh: “Tŭ do neh geh uă mpồl lơh sa kă bro bơcri priă lơh hìu măi lơh gơs phan. Broă kwơ màng là pal lơh geh tiah tam kơl jăp mờ bơyai lơh di jăt mpồl geh kwơ.

Tàm hơ̆, gơnoar bơh mpồl lơh broă bal, mpồl lơh broă bal mờ gơnoar atbồ ƀòn lơgar kwơ màng ngan. Mpồl dong kờl bơto pơlam broă lơh sa suơn sre mờ mpồl dong kờl bơto pơlam broă lơh sa suơn sre mpồl bơtiàn rơ̆p dong kờl làng bol bè bơta chài, lơh geh broă rơndăp lơh sa, rơwah broă lơh bal mờ măi mok mờ ală gùng dà broă lơh geh ngui di pal.

Ală broă pal geh bơyai lơh ndrờm bal, tài di lah ờ lơh nền nòn là ală bơta gơrềng bal lơi den mpồl geh kwơ ndrờm di gơlan gơtìp koh gơl. Tàm broă lơh sa bè tŭ do kung gam dềt, ờ pràn, rơndăp wơl broă lơh sa là bơta tờm kwơ màng nàng lơh gơs tiah tam phan tơl dờng mờ kơl jăp.

Gơwèt mờ broă tam tờm plai màk tàm càr Lâm Đồng, lài ngan añ gŏ làng bol neh lơh tờm broă lơh jăt măi mok. Mơya, kung gam sền gròi niam rơlao bơta niam, tàm hơ̆ uă ngan là nùs nhơm ndrờm bal phan geh lơh.

Broă do pal geh lơh tơn bơh broă lơh lài tiah tam, sơnka sền gàr, kơh ntê mờ ală broă lơh jăt bơta chài ndai. Dùl broă tai là pal bơyai lơh wơl lơh sa jăt mpồl. Tŭ do, geh uă ngan làng bol kung gam tăc phan geh lơh mờ cau tus blơi mờ gơrềng uă ngan tàm kàl lơh sa dê.

Bol añ kơ̆p kờñ ală broă lơh pơgồp bal geh lơh gờñ rơlao, bơh tàm tŭ sơn đờm lơh sa. Làng bol lơh broă sa pal ai tơngŏ bơh lài ngan phan geh lơh rơ̆p drơng tàm drà kă bro lơi nàng ngui di mờ bơta chài bơh drà kă bro hơ̆ dê; mờ pơgồp bal nền nòn mờ mpồl lơh sa kă bro mờ hìu măi lơh gơs phan nàng rơcang lài rơlao bè bơcri priă”.

Di bè hơ̆, tàm tơngai tus, mpồl dong kờl bơto pơlam broă lơh sa suơn sre rơ̆p lơh bè lơi nàng tơrbŏ bal geh cồng nha rơlao đah làng bol lơh broă sa, mpồl lơh broă bal, mpồl lơh sa kă bro mờ drà kă bro, ơ ồng?

Ồng Lê Quốc Thanh: “Lài jơh, pal tam gơl bồ tơngoh bơh cau lơh broă dong kờl bơto pơlam broă lơh sa suơn sre. Lài do, broă lơh dong kờl bơto pơlam broă lơh sa suơnsre lơh uă bè broă tam jào bơta chài; gam tŭ do pal tam gơl bồ tơngoh lơh broă bal, pơlam mờ tam gơl bal mờ cau lơh sa.

Cau lơh broă dong kờl bơto pơlam broă lơh sa suơn sre pal tus bal jăt bồ tơngoh lơh sa suơn sre mờ jơh mpồl lơh geh kwơ. Ờ mìng git bơta chài lơh sa mờ gam pal wă drà kă bro, bơta niam, phan lơh broă lài ngan mờ ală jơnau kờñ gơrềng bal tus mờ tăc phan geh lơh.

Dơ̆ bàr, bol añ pơn jăt tai bơtàu tơnguh mpồl dong kờl bơto bơlam broă lơh sa suơn sre mpồl bơtiàn nàng tơnguh khà cau tus bal dong kờl tơn tàm ală mpồl lơh sa.

Dơ̆ pe, mpồl dong kờl bơto pơlam broă lơh sa suơn sre rơ̆p pơgồp bal nền nòn rơlao mờ gơnoar atbồ ƀòn lơgar tàm broă rơndăp wơl broă lơh sa, pơlam làng bol tus bal mpồl lơh broă bal mờ mpồl geh kwơ tơn bơh tŭ sơn đờm lơh sa.

Jơnau kờñ là bơ̆t bơtàu mpồl dong kờl bơto pơlam lơh sa suơn sre ngai sơlơ jăk chài, sùm lơh broă bal, dong kờl, pơlam, yal lài mờ tơrgùm jơnau yal ai cau lơh sa in. Geh bè hơ̆, hơ̆ sồng mpồl dong kờl bơto pơlam broă lơh sa suơn sre mùl màl gơs anih tơrbŏ bal đah làng bol lơh broă sa, mpồl lơh broă bal, mpồl lơh sa kă bro mờ drà kă bro”.

Ơi, dan ưn ngài ồng!