Rlau 1 lồ sầu riêng hìu bơnhă mò Nguyễn Thị Hồng dê, tàm sàh Ea K’nuếc, càr Dăk Lăk gam mŭt tàm tơngai lì bơkàu, tơngai kwơmàng lơh nền cồng nha lơh geh. Bulah bè hơ̆, trồ tiah ờ niam lồi dŭt hìu bơnhă mò pal tam gơl jơh broă ơm kis nàng sơngka sền gàr sươn chi. Mò Hồng yal:

“Trồ tiah tơngai duh tơr ồ bè do bol hi pal guh bĭc bơh 3 giơ àng lơh, jơh tuh dà hơ̆ sồng tus 8, 9 jiơ drim là rlô. Tơngai duh ir, ờ jai kong, bòl glar ngan gơ wèt mờ làng bol lơh broă sa”.

Ờ mìng sầu riêng lơm, ală chi tam tờm kwơmàng tàm hơ̆ geh 210 rbô lồ kơphê, mờr 29 rbô lồ tiêu, kung gam kong bơta kơn jơ̆ uă bơta jơnau ờ tơl dà. Uă làng bol lơh broă sa neh rơcăng lài tam gơl bơh tuh dà sùh ñàm ờs mờng bơh yau tus tuh dà tềm pềr nàng gơdờp. Ồng Nguyễn An Sơn, ơm tàm sàh Cư Mgar, càr Dăk Lăk pà gĭt, hìu bơnhă ồng neh crăp lơh ală ding tuh dà tềm pềr bơh bàr nam do, dong gơmù 1/3 khà dà pơndrờm mờ lài.

“Ala tài bè lài he tuh dà mờ ding dà hoàc ngan dà, mờ roh tai uă tŭ jiơ. Tŭ do ngui ală ding tuh dà dềt ntờc gơ tềm pềr geh dà mơkung tơrmù geh cau lơh broă, cồng nha lơh sa kung jơnhoa rlau”.

Bal mờ bơta rơcăng lài làng bol dê, gơnoar ătbồ ƀòn lơgar mờ gah broă lơh sa sươn sre kung gam lam lơh uă broă lơh bơsong drơng wơl mờ jơnau geh trồ tơngai duh jŏ jòng, pơhìn prang dờng soăt dà gơguh uă tai. Tàm ală sàh, ală rbòng dà geh sền swì nền wơl, tam pà dà dipal; mơkung bơto sồr làng bol ngui dà tềm pềr, ngui măy mok tuh dà gơguh jak. Ồng Nguyễn Văn Kiên, Phó Kwang Lam bồ Anih tờm Tăc drơng broă sa priă broă lơh dà lơgar sàh Ea Knốp, càr Dăk Lăk, pà gĭt:

“Anih duh broă Làng bol sàh neh jàu ală mpồl lơh broă mờng lơh sền swì nền wơl jơh ală rbòng dà nàng tam pà dà dipal. Mơkung bơto sồr làng bol ngui dà tềm pềr, ngui măy mŏk tuh dà pa nàng gàr tơl dà drơng lơh sa tàm tơngai trồ tơngai duh soăt dà”.

Jăt jơnau yal lài, trồ tơngai duh tàm Dăk Lăk gam pơn jăt tai gơbàn tàm tơngai tus, jơnau pơhìn ờ tơl dà digơlan gơlik geh, is ồn tàm ală kơnhoàl ù tiah ngai dà halà ală bơtơ̆t tơnau dơng dà lơh sa ờ hềt lơh geh jơnau kờñ. Mò Đặng Thị Thủy, Phó Kwang Lam bồ Sờh Broă lơh sa sươn sre mờ Tiah ơm kis càr Dăk Lăk pà gĭt, càr neh rơcăng ală gùng dà broă rơndăp lơh drơng mờ trồ prang, lam lơh sa dipal ai kàl pơn jăt tai in:

“Ală mpồl lơh broă mờng lơh gam pơgồp bal jăt sền ngan broă gơbàn bơh trồ tiah dê tàm kàl Mrềt Prang mờ tơngai tus nàng tam pà dà dipal. Mơkung rơcăng lơh sa kàl Duh Hàm gam geh hòi là kàl bồ nam, pơlam ƀòn lơgar tam gơl rơndăp chi tam dipal mờ jơnau tơl pràn tàm pà dà. Bơdìh hơ̆, pơn jăt tai sền swì nền wơl ală tơnau dơng dà, rơcăng lài gùng dà broă rơndăp lơh pà dà ai lơh sa mờ ơm kis in”.