Ngui măi mok pa tàm suơn sầu riêng, ồng Lê Văn Thành ơm tàm sàh Ea Yông, kơnhoàl Krông Păk, càr Dăk Lăk ờ gam pal kơlôi rơcang ƀồm dà kàr lơi den tơl, ơn phơng tàm tŭ tơngai lơi halà ală ngai ờ ru ờ gơtùi mut còp suơn. Tŭ do, ồng neh gơtùi iang nùs rau tài jơh ală khà sồ sơñio bè sùh iò, jơnau kờñ dà ƀồm, tơngai sơngka sền gàr… ndrờm geh măi đal git ngac ngar cih dờp mờ tơngkah tơn tàm điện thoại.

Ồng Lê Văn Thành yal, gơtuì jat sền sùh iò mờ sồr ƀồm dà bơh ngài, suơn sầu riêng rlau 3 lồ ồng dê sùm gơs tơlir bulah trồ tiah ờ niam: “Geh măi mok do den làng bol lơh ƀuơn rlau, geh phan ngui do den he gơtùi git tàm ù ờ tơl bơta lơi, he pal ơn phơng lơi, dà tơl halà ờ nàng sơngka sền gàr dipal rlau”.

Ai mò Hroda Ayun ơm tàm sàh Ea Kênh, kơnhoàl Krông Păk pà git, tŭ jơnau sồr bè cồng nha lơh geh mờ bơta niam phan tam dê ngai sơlơ uă, làng bol lơh broă sa pal tam gơl nàng gơ dờp. Hìu bơnhă mò dê neh rơhời tam gơl bơh tam kơphe ờs mờng nàng tam kơphe ngac ngar. Ală bơnah broă tam, sơngka sền gàr ndrờm geh lơh mờ măi mok lơm bè măi ƀồm dà hòr ntờc, ơn phơng is, măi sòl àng năng lượng mat tơngai… neh dong mò ờ huan roh uă tŭ jơ sơngka sền gàr, tơrmù khà dà ƀồm, ơn phơng, phan bơna blơi nàng lơh broă.

Jat mò Hroda Ayun yal, bulah priă crăp bơh sơn rờp uă, mơya cồng nha cèng wơl den dipal ngan, ngan là tàm tŭ tơngai sồr lơh sa tơlir – ngui sa tơlir bè tŭ do: “Sơngka sền gàr kơphe ngac ngar ờ mìng dong tơrmù tuh tơlik nhơm ƀơ̆ lơh aniai tus tiah ơm kis mờ gam sền gàr ù, dà mờ tiah kis brê bơnơm tai. Làng bol kung gam lơh geh cồng nha uă mờ gam gơtùi sền gàr pràn kơldang să jan he mờ mpồl bơtiàn tai”.

Tàm bơta dờng rlau, Mpồl lơh broă bal Broă drơng ala broă lơh sa suơn sre sàng goh kơnhoàl Krông Păk, càr Dăk Lăk neh ngui măi mok sò tàm rlau 200 lồ sầu riêng Vietgap. Ồng Mai Đình Thọ, Củ tịc Mpồl duh broă pơlam Mpồl lơh broă bal pà git, broă lơh bal lơh sa ngui măi mok sồ ờ mìng tơnguh cồng nha phan lơh gơs mờ gam lơh gơlik bơta kuơ pa ai phan sầu riêng in tai bơh broă yal loh làng ală bơnah broă. Tus do den Mpồl lơh broă bal rơp lam lơh crăp màh QR ai tơl suơn in nàng atbồ tàm măi mok sồ, dong jòi git anih lơh gơlik, đal git ù tiah mờ lơh gơs dồ nă să is ai tơl tờm sầu riêng in. Bơh hơ̆, ờ mìng tơnguh bơta pin dờn mờ cau ngui sa mờ gam tơnguh bơta kuơ phan lơh gơs tai. Ồng Mai Đình Thọ pà git: “Bơta chài măi mok sồ dong tơl jơnau tơnggit gơ gơs loh làng. Tơl suơn, tơl tờm chi ndrờm geh mat is, gơtùi jòi git jơnau yal tŭ tơngai sơngka sền gàr, tŭ tơngai tam… Cau ngui sa ƀuơn đal git phan niam jat jơnau sồr halà ờ. Ală anih atbồ kung ƀuơn jat sền rlau”.

Broă lơh sa suơn sre tŭ do kung gam là broă tờm ngan, geh mờr 1/3 rơndap tap sèng rài lơh sa Dăk Lăk. Bè hơ̆ den tàng gah lơh broă sa suơn sre càr neh rơcang lài mblàng yal, dong kờl làng bol lơh broă sa mờ mpồl lơh sa kă bro git ngui tam gơl sồ tàm lơh sa, kă bro, tac phan lơh gơs. Tus tŭ do, uă làng bol lơh broă sa neh git broă lơh pa sơngka sền gàr phan tam, sơlơ tơnguh pràn jak atbồ mờ jat sền broă lơh sa. Gơ wèt mờ broă lơh kă bro, uă phan OCOP mờ phan bơh suơn sre geh pơn rơ neh geh tơmut tàm anih kă bro điện từh halà ală pang mạng sàh hội nàng yal tơnggit, tac tàm internet.

Nàng tơnguh rlau tai cồng nha tam gơl sồ tàm broă lơh sa suơn sre, ồng Nguyễn Thiên Văn, Phó Củ tịc Anih duh broă làng bol càr Dăk Lăk pà git: “Càr gam lam lơh ală jơnau neh lơh nền dong kờl, tàm hơ̆ geh ngui măi mok pa, tam gơl sồ tàm broă lơh mat kă bro, lơh màh sồ tiah tam gơ jat bal mờ màh yal tơnggit, ngui măi mok sồ. Bơh hơ̆ dong bơta kuơ mat kă bro phan lơh gơs bơh suơn sre tàm càr Dăk Lăk ngai sơlơ geh tơnguh kung bè lơh geh priă jền, cèng wơl bơta kuơ ai làng bol lơh broă sa mờ mpồl lơh sa kă bro in”.

Tam gơl sồ gam rơhời ai gŏ gơnoar broă tờm tàm broă tơnguh priă jền lơh geh bơh phan bơh suơn sre, rề ơnàng drà kă bro tac phan lơh gơs mờ chồl tơnguh bơtàu tơnguh lơh sa ƀòn lơgar tàm càr Dăk Lăk. Bơta pơgồp bal jơh nùs đah gơnoar atbồ, mpồl lơh sa kă bro mờ làng bol rơp là bơta lơh nền nàng lơh gơs dùl rài lơh broă sa suơn sre tam gơl pa, kơ̆ kơljap jŏ jòng sùm mờ mut gơ rờm bal jrô ơnàng.