Mờ drone HD580 lơh sa suơn sre blơi mờ khà priă 364 tơlăk đong, bơta ñjơ̆ rơlao 70 kĭ, tàm ală ngai do, bi Hoàng Văn Thiện (45 sơnam, tàm sàh Ea Ô, càr Dăk Lăk) dờp geh uă cau kờñ ơpah ƀồm phơng nàng lơh pràn wơl suơn sầu riêng mờ plai màk. Bă ù suơn hìu nhă bi dê tus 10 lồ, den tàng drone sơlơ tơnguh geh broă lơh uă ngan.

Bi Hoàng Văn Thiện pà git: “Bè ờs pah ngai añ sơnka sền gàr suơn kơphe, plai màk in. bơdìh mờ broă ngui drone sơnka sền gàr suơn tam phan hìu nhă in, tŭ ru cau lơi kờñ ơpah ƀồm kòi, kơphe, sầu riêng, plai màk añ ndrờm dờp jơh. Pah ngai añ gơtùi ƀồm bơh 20, 30 lồ mờ priă ơpah geh bơh 3 tus 4 tơlăk đong tàm 1 ngai. Geh măi do ƀuơn ngan tàm broă lơh, sơnka sền gàr suơn geh cồng nha mờ gơtùi lòt ƀồm ơpah tai nàng tơnguh priă geh, dong kờl bơta kwơ tàm rài kis uă ngan”.

Bi Đinh Văn Nguyên, kis tàm sàh Bờ Y, càr Quảng Ngãi pà git, hìu nhă bi geh 3 lồ ù tam sầu riêng gam tàm tơngai geh tơnhào. Kàl tơnhào jal mhar, cau lơh broă ờ geh, den tàng bi neh blơi dùl nơm phan par ờ geh cau măi. Rơ̆p ngui mờr 1 nhai, bi gŏ loh làng cồng nha geh mùl màl bơh phan par do dê: tềm pềr ngan tơngai lơh broă mờ gam lơngăp lơngai rơlao ai ală cau tàm hìu nhă in. “Pe lồ ù tam sầu riêng di lah ƀồm mờ să den pal roh 4 nă cau lơh broă tàm 1 lồ mờ kờp jơh 3 lồ ù pal roh 12 nă cau ƀồm hơ̆ sồng gơs, mơya di lah ƀồm mờ măi par do den mìng roh bơh 2 tus 3 jơ là ƀồm jơh. Ngui măi par do lơh broă sa suơn sre den bơdìh mờ broă tềm pềr dà, phơng sih, bơta pràn lơh uă gam ƀuơn rơlao tai là gàr lơngăp lơngai bơta pràn kơl dang să jan ală cau in”.

Tây Nguyên là bă ù tam kơphe, tiêu, sầu riêng dờng ơnàng ngan gùt lơgar dê mờ di pơgăp 800 rơbô lồ, ờ hềt kờp jơh git nđờ rơhiang lồ ù tam phan ờ jŏ tơngai. Jăt mò Trịnh Thị Vân, Phó Củ tịc Anih duh broă Làng bol sàh Ea Knuếc, càr Dăk Lăk pà git, tàm sàh do geh rơlao 100 rơbô lồ ù lơh sa suơn sre, tàm hơ̆ geh nggùl bă ù tam sầu riêng. Mờ bơta ñhoa tờm rơlao 10 thơ̆k tàm tơngai plai sầu riêng dum, kờñ pal geh bơh 10 tus 20 nă cau sơnka sền gàr pah nam, broă ngui drone tàm sàh ngai sơlơ geh uă. “Sàh neh bơyai lơh ală dơ̆ bơsram tàp, bơto bơta chài nàng làng bol in git ngui phan par ờ geh cau măi tàm broă lơh sa suơn sre bè ƀồm sơnơm, sih phơng, sih kòi… lơh geh cồng nha ngan. Mờ pơgồp bal mờ ală mpồl lơh broă bơto pơlam gùng dà broă lơh, bơto sồr làng bol git ngui phan par di mờ bơta chài, dan cih măt tiah par di jăt mờ jơnau geh ai. Tŭ par, làng bol kung yal anih lơh broă atbồ in git nàng broă sơnka sền gàr phan tam geh ƀuơn mờ lơngăp lơngai rơlao”.

Tàm pơrjum cri bơyai Quốk hội, tàm dar pơrjum pa do ngan, cau ala măt Trần Thị Thu Phước, mpồl càr Quảng Ngãi đơs di lah loh làng: drone tŭ do ờ mìng là phan ngui nàng lơh broă sa suơn sre dê, mờ gam là bơta tờm lài ngan geh ngui tàm broă dong klàs cau gơtìp rềs àr bơh trồ tiah. Tŭ mìu sơr lơh gơbam dà, drone neh gơtùi dong klàs cau tàm dà hòr jơntang; cèng bal ào pơr đồng, phan sa, dà hùc tus mờ cau gơtìp rềs àr. Do là cơng tàng pà gŏ loh làng ngan geh cồng nha bơh broă ngui bơta chài măi mok tàm rài kis.

Cau ala măt Trần Thị Thu Phước đơs là, pal ai tơl bơta niam nàng gah lơh drone tàm lơgar bơtàu tơnguh pràn rơlao, di pal mờ jơnau kờñ ngai sơlơ geh uă: “Cíñ phủ pal geh kơrnoăt boh lam krơi is nàng lam sồr ală mpồl lơh sa kă bro tàm lơgar in kơlôi sơnơng, lơh gơs ală phan măi mok pa jăt gùng dà broă lơh uă bơta broă, uă bơta ngui. He kờñ ală bơta phan mờ tàm rài ring lơngai là phan drơng lơh broă sa tờm, drơng broă bơtàu tơnguh lơh sa suơn sre, pơn diang phan, viễn thông, mơya tŭ gơtìp bơta rềs àr bơh trồ tiah ha là kơnòl sền gàr dà lơgar lơngăp lơngai den gơtùi tam gơl broă ngui gơs bè phan par ờ geh cau măi”.

Ngai sơlơ geh uă làng bol lơh broă sa suơn sre tàm Tây Nguyên ai drone tàm broă sơnka sền gàr phan tam, pà gŏ cồng nha loh làng tŭ tềm pềr ngai lơh broă mờ tơnguh uă cồng nha phan tam in. Ală drone dờng gam gơtùi tus bal tàm broă dong klàs cau gơtìp rềs àr tàm dà hòr jơntang. Bơta gơkòl dờng ngan tŭ do là priă blơi gam kas ngan tài geh uă drone pal blơi bơh lơgar bơdìh. Di lah geh broă lơh pràn lơh gơs drone tàm lơgar, priă blơi drone rơ̆p tàm pơrlòng rơlao, lơh sa suơn sre geh dong kờl niam rơlao mờ broă dong klàs cau gơtìp rềs àr kung tài bè hơ̆ geh cồng nha rơlao.