Ală hìu tam sầu riêng tàm sàh Krông Pắc, càr Dăk Lăk pà gĭt, broă lơh tơrgùm blơi gam ntrờn bơh tàm pơrlòng lơh is khăt gơboh tus lơh bal jăt mpồl, ai lài ală tiah tam geh màh sồ, sok sền bơta niam bơh sơnrờp mŭt lơh tơn.

Ồng Mai Hữu Sơn, ala măt mpồl lơh sa kă bro mờng tơrgùm blơi sầu riêng tăc mờ lơgar ndai pà gĭt, tŭ mpồl lơh sa kă bro mờ làng bol tam pà bal kơnòl tàm ală tŭ lơh sa, broă lơh geh ală jơnau sồr bơh drà blơi phan dê rơ̆p ƀươn ƀoài rlau, mơkung lơh gơlik bơnàng jă ai bơta lơh bal jŏ jòng in, tơrmù ƀà ală rềs àr gơ aniai tàm tŭ tơrgùm blơi.

"Mpồl lơh sa kă bro neh lam lơh bal mờ làng bol tàm 4 tus 5 màh sồ tiah tam. Ală màh sồ do bơh să tờm jơnum lơh broă bal, làng bol geh gơnoar ngui, mpồl lơh sa kă bro mìng lơh bal tăc blơi phan bơna. Bơta kwơmàng là bơta pin dờn, mpồl lơh sa kă bro lơh sa geh bơngă pin dờn den làng bol rơ̆p dòn kơnờm mờ lòt bal”.

Bè đah Tơrgùm ală mpồl sầu riêng, ồng Lê Anh Trung, Chủ tịch Tơrgùm ală mpồl Sầu riêng Dăk Lăk đơs, bơta gơ ơm wơl bơh drà dê tềng đăp kàl tơnhàu là tềl tơnggŏ niam. Tŭ mpồl lơh sa kă bro ờ gam ur ar tong lài priă bơh gờñ, ală jơnau gơ aniai gơlời wơl bè blơi prăp kơ̆p gơguh giă, ờ lơh jăt jơnau neh tong priă lài, pìt blơi, pìt tăc kung rơhời geh kơryan.

“Broă blơi lài jơh sươn gờñ bè lài do geh sùm uă jơnau pơhìn rềs àr. Dilah giă drà gơmù tĕ, bàr đah ƀươn ngan gơlik jơnau tàm gơjrañ gơlam tus ờ lơh jăt jơnau lơh bal. Den tàng bè hơ̆, broă bơ̆t bơtàu ală mpồl lơh bal kơ̆ kơl jăp rơ̆p dong săc rwah geh ală mpồl lơh sa kă bro tơrgùm blơi geh bơngă pin dờn, gơtùi lơh geh di jơnau kờñ sră dan blơi phan”.

Ală tam gơl do lơh geh kơnờm bơh bơta mŭt lơh bal bơh bồ kàl tơn bơh gơnoar ătbồ ƀòn lơgar dê. Ồng Lại Đình Đại, Chủ tịch Anih duh broă Làng bol sàh Krông Pắc, càr Dăk Lăk pà gĭt, sàh neh tơnggơs Mpồl đơng lam pơgồp bal mờ Jơnum jăt sền, pơgồp bal mờ gah lơh broă ờs mờng, Tơrgùm ală mpồl Sầu riêng mờ ală mpồl lơh broă sền swì gĭt nền pơlam làng bol lơh sa di broă pơlam; jăt sền broă ngui phan bơcri (hơ̆ là sơntìl, phơng, sơnơm…) tàm broă lơh sa sươn sre, ai mẫu sền swì jơngkah khà sơnơm Cadimi mờ sơnơm sền gàr phan tam, mơkung ătbồ niam màh sồ tiah tam.

Ƀòn lơgar kung rơcăng lài tàm tơrbŏ mpồl lơh sa kă bro tơrgùm blơi, tăc mờ lơgar ndai bơh bồ kàl tơn nàng gĭt geh jơnau kờñ drà dê. Digơlan lồi nhai 7, sàh rơ̆p lam lơh dar tàm pơrlòng giă bơh sơnrờp gơ wèt mờ rlau 14 lồ nggùl sầu riêng geh màh sồ tiah tam, plai geh pơgăp 300 tấn mờ bơta tus bal bơh uă mpồl lơh sa kă bro dê. Ồng Lại Đình Đại pà gĭt tai:

"Nam do ai tơmŭt tàm bơta ătbồ jăt rơndăp tăp sèng cau lơi geh pà sră ai gơnoar den hơ̆ sồng geh tơrgùm blơi, mờ ală anih ơn tơrgùm kung bè hơ̆ sơl, mpồl lơh broă lơi geh pà sră ai gơnoar den hơ̆ sồng geh tơmŭt phan. Bơta dơ̆ bàr tai là ală ƀlàng anih ơn phan pal lơh geh ală jơnau sồr, gàr niam bè lơh niam sàng goh phan sa. Dơ̆ pe tai pal geh bơta ătbồ ai gơnoar bơh ƀòn lơgar dê den hơ̆ sồng geh lơh broă. Rơhời rơ̆p ai rơndăp tăp sèng tơrgùm blơi phan bơna sầu riêng tàm ƀòn lơgar gơlòt mŭt tàm bơta rơndăp tăp sèng rlau”.

Dăk Lăk tŭ do geh pơgăp 44 rbô lồ sầu riêng, tàm hơ̆ rlau 33 rbô lồ gam gơ ai tơnhàu, plai kàl lơh sa nam 2026 kờp dŭ pơgăp 500 rbô tấn. Tơnơ̆ uă nam tìp mờ bơta tơrgùm blơi is khăt gơboh, pìt blơi, pìt tăc mờ lơh tơn roh bơta lơh bal, drà sầu riêng Dăk Lăk gam rơhời geh lơh wơl geh bơta rơndăp tăp sèng. Tŭ gơnoar ătbồ lơh kràñ ătbồ, mpồl lơh sa kă bro bơ̆t bơtàu lơh bal kơnhăp jŏ mờ làng bol lơh jăt broă pơlam lơh sa, gah phan sầu riêng gam geh tai bơta gơn kơnờm nàng bơtàu tơngguh kơ̆ kơl jăp, lơh geh niam rlau jơnau sồr bơh drà tăc mờ lơgar ndai dê tàm tơngai tus.