Rlau 53 tơmàn dolar Mỹ lơh geh bơh tăc phan mờ lơgar ndai ală bơta phan lơh sa suơn sre, phan brê mờ phan tàm dà tàm nam 2023 neh lơh tềl ală bơta pơn đơl pràn lơh ngan ờ tŭ lơi ơm rlô bơh làng bol cau lơh broă sa, bơh ală cau atbồ, cau khoa họk dê tàm gah broă do, bơh hơ̆ nàng lơh geh bơnàng jă mờ bơta gơn kơnờm nàng gah lơh sa suơn sre in pơn jat tai brồ guh ngài rlau tai, lơh geh ală kàl tơnhào uă rlau tai tàm nam 2024 do.

Bơta chờ hờp bơh ală cau lơh broă sa sih tam kòi, bơh ală cau lơh suơn tam sầu riêng, biăp bùm kơnuh plai đo dê tàm nam 2023 neh pà gŏ bơta niam pal chờ hờp ngan tàm broă lơh sa mờ tăc phan mờ lơgar ndai phan lơh geh bơh lơh sa suơn sre tŭ tăc phe mờ lơgar ndai mờ biăp bùm kơnuh plai đo lơh geh khà jơnhoa ngan rlau jơh.

Nam 2023, gah lơh sa suơn sre kung gam gàr niam khà gơguh lơh sa uă, bơtàu tơnguh tơl làm, mờ khà gơguh GDP gùt gah dê lơh geh 3,83%, jơnhoa ngan rlau jơh tàm uă nam pa do. Kờp jơh priă lơh geh tăc mờ lơgar ndai phan lơh sa suơn sre, phan brê mờ phan tàm dà gàr niam tàm kha jơnhoa, rlau 53 tơmàn do lar Mỹ; tăc uă phan lơh geh khà jơnhoa ngan rlau jơh là 12 tơmàn 070 tơlak dolar Mỹ, gơguh 43,7%. Thứ trưởng Ƀộ Nông nghiệp mờ Phát triển Nông thôn Phùng Đức Tiến đơs sùm: Lơh sa suơn sre pơn jat tai đơs nền gơnoar broă kwơ màng, là bơta tờm dong kờl bơh rài lơh sa dê, gàr tơl bơta kơ̆ kơl jăp kòi phe, ală bơta tàm pơn ring dờng bơh rài lơh sa dê mờ pơgồp bơnah lơh kơ̆ kơl jăp lơh sa dờng. Ồng Phùng Đức Tiến đơs:“Tàm tơngai kal ke uă ngan, mơya mờ bơta sơm bat tê bal, dùl nùs bal bơh jơh gùt mpồl bơtiàn, bơh ală tiah dê bal mờ Ƀộ Nông nghiệp mờ Phát triển Nông thôn, bol he neh lơh sir uă ngan jơnau kờñ kwơ màng. Dùl nam pơnđơl pràn lơh ngan nàng bol he in lơh sir ală jơnau kờñ kwơ màng ngan, geh Cíñ phủ jờng rơ uă ngan, kung đơs nền là bơta tờm dong kờl bơh rài lơh sa dê, pơgồp bơnah kwơ màng tàm rài lơh sa Dà lơgar dê tàm tŭ kal ke”.

Nam 2023 là nam tềl lời wơl niam ngan bơh gah kòi phe dê tŭ tăc phe mờ lơgar ndai bơh lơgar he dê lơh geh pơgap 8 tơlak 2 rơbô tấn mờ priă lơh geh mờr 4 tơmàn 800 tơlak dolar Mỹ, gơguh 40% pơndrờm mờ nam lài, tàm khà jơnhoa ngan rlau jơh tàm ală nam pa do. Ồng Nguyễn Như Cường, kwang atbồ Gah tam phan pà gĭt, kờp dŭ lài nam 2024, bơta drà kă bro kòi phe jơnau kờñ ngui kung gam tàm khà jơnhoa ngan, gah tam phan pơn jat tai đơng lam sơlơ tơnguh tam phan, ngan là kòi bơkah nàng gàr tơl kòi phe tăc mờ lơgar ndai dùl bă kơ̆ kơl jăp. Ồng Nguyễn Như Cường đơs:“Bè lơh gơlik kòi phe Việt Nam tàm nam 2024 jat broă rơndăp lơh Ƀộ Nông nghiệp mờ Phát triển Nông thôn dê bal mờ ală tiah sih tam pơgap 7 tơlak 100 rơbô lồ halà hơđơm dùl ết, tàm hơ̆ kung gam gàr tơl cồng nha lơh geh 43 tơlak tấn. Mờ bè hơ̆ den bol he kung gơtùi gàr tơl lơm kòi phe tàm khat dùl bơta gơlik geh lơh tàm tơl bơta. Mờ bol he kung gam gàr tơl tăc phe mờ lơgar ndai bè tàm nam 2023 sơl”.

 Nam 2024, kờp dŭ lài rài lơh sa pơn jat tai kong mờ uă bơta kal ke, bơta lòng, bè: giă phan bơna phan, sơntìl, phơng sih... drơng broă lơh sa suơn sre kung gam tàm khà jơnhoa, tu kòp lơh aniai tàm phan tam, phan ròng digơlan gam geh uă; mìu dờng dà kŏ dà cò gơlik geh nisơna, trồ tơngai duh uă ir rlau, pơhìn trồ prang dờng soăt dà, ờ tơl dà kơn jơ̆ ngan tài gơrềng bơh El Nino...; ngan là gơrềng bơh dơ̆ tam lơh, bơta ờ niam bơh dunia dê lơh drà kă bro tŭ gơguh, tŭ gơmù. Ồng  Nguyễn Văn Việt, Kwang atbồ Vụ Kế hoạc, Ƀộ Nông nghiệp mờ Phát triển Nông thôn pà gĭt, gah lơh sa suơn sre kung gam pơnđơl pràn lơh ngan sơr lèt gan bơta kal ke, ai tơlik ală jơnau kờñ nàng pơnđơl pràn lơh jat. Ồng Nguyễn Văn Việt, đơs: “Mut tàm nam 2024, bol añ gŏ là gah lơh sa suơn sre den tŭ lơi kung geh 3 bơta kal ke: dơ̆ 1 hơ̆ là drà kă bro, dơ̆ 2 là trồ tiah, dơ̆ 3 là kơryan geh tu kòp lơh aniai. Bè drà kă bro bol añ rơ̆p pơnđơl pràn lơh ngan, tu kòp lơh aniai den bol añ kung pơnđơl pràn lơh ngan sơl nàng bơsong mơya trồ tiah kung là bơta ờ gơtùi gĭt lài ờ. Bè broă jàu tàm nam 2024 dê, ai bơta gơguh mhar gùt gah bơh 3,0 tus 3,5%; Priă lơh geh tăc phan mờ lơgar ndai gah lơh sa suơn sre, phan brê mờ phan tàm dà pơgap bơh 54 tus 55 tơmàn dolar Mỹ. Khà xã lơh sir broă lơh ƀòn lơgar pa 80%”.

 Tàm khà tăc phan mờ lơgar ndai biăp bùm kơnuh plai đo geh bơta gơguh uă ngan, gơguh 70% pơndrờm mờ nam 2022, lơh geh mờr 5 tơmàn 700 tơlak dolar Mỹ, broă rơndăp lơh sa gàr geh jơnau kờñ cồng nha lơh geh, gròi sền phan tam mờ sơlơ tơnguh hòi jà kă bro mờ ală drà kă bro geh gah biăp bùm kơnuh plai đo dê sền gròi. Bơta chờ hờp bồ nam 2024 dê là tŭ ală bơta phan bè sầu riêng ơn mrềt, rơpung jàl ris, bơ, plai bung... mờr tus geh ai gơnoar tăc mờ lơgar ndai mut tàm drà kă bro lơgar Lo dê kơ̆p gơn rơ̆p dong gah biăp bùm kơnuh plai đo gơguh tai ết ngan rlau jơh là 1 tơmàn dolar Mỹ tàm nam 2024. Bal mờ hơ̆, lơgar Việt Nam gơ gơs lơgar sơn rờp tàm dunia sih tam kòi tơrmù nhơm tuh bơ̆ bơl tŭ lam lơh rơndăp broă lơh 1 tơlak lồ mìng lơh kòi bơkah uă pơgồp bal mờ gơguh tơlir tiah ring Dà dờng Cửu Long bơh lồi nam 2023. Bơta hơ̆ pà gŏ, ờ mìng tam gơl bơta kơlôi sơnơng tam phan tus kơlôi sơnơng lơh sa, gah lơh sa suơn sre pơn jat tai wèt tus lơh sa tơlir mờ kơ̆ kơl jăp. Do là jơnau kờñ bơh gah lơh broă tàm nam 2024 do mờ ală nam pơn jat tai, nàng kờñ lơh ngan ngồn Broă lơh bơtàu tơnguh mờ Nghị quyết Dà lơgar neh lơh “Bơt bơtàu ƀòn brê bơnơm, ƀòn lơgar pa ngan, cau lơh broă sa ngăc ngar”.