Do là dơ̆ sơnrờp dùl bơta phan plai chi geh lơh tơl loh làng jơnau sồr ală broă lơh sok sền niam sàng goh phan sa ring bal tàm jơh gùt lơgar, geh tàm jơh ală broă lơh gơlik bơh tam, tơnhàu, jun pơndiang, sền gàr ơn prăp, ơn klơm tus tăc mờ lơgar ndai.

Jăt ồng Lê Anh Trung – Củ tịc Tơrgùm ală mpồl sầu riêng Dăk Lăk, ală broă lơh sok sền niam sàng goh phan sa geh ai lơh jăt dơ̆ do là dipal mờ broă tăc mờ lơgar ndai sầu riêng Việt Nam dê mờ jơnau sồr bơh đah blơi dê.

 “Jơnau sồr do geh tàm jơh ală broă lơh gơlik mờ tăc sầu riêng, bơh broă tam, tơrgùm blơi, ơn klơm tus jun pơndiang, tăc mờ lơgar ndai. Tŭ lơh jăt wil tơl, mpồl lơh sa kă bro mờ làng bol gơtùi lơm lơh geh jơnau sồr bơh ală drà blơi dê. Do là cơng tàng tơngume adăt boh lam kwơmàng, dong gah phan pleh gơtìp rơmơ̆p ndơl tềng đăp ală bơta kơryan măy mŏk pa digơlan gơlik geh tàm tơnơ̆ do”.

Đơs niam ngan jơnau sồr pa bơh Ƀộ Broă lơh sa sươn sre mờ Tiah ơm kis dê, ồng Vũ Ngọc Huy, Phó Kwang Lam bồ dờng Kông ty Pơgồp bal priă Kă bro Tăc mờ blơi mờ lơgar ndai Dũng Thái Sơn pà gĭt, uă mpồl lơh sa kă bro lài do “kwi kwơ” tài ờ geh bơto pơlam. Mơya tŭ do, jơnau sồr pa neh lơh geh cơng tàng tơngume adăt boh lam loh làng, dong ring bal broă lơh bơh ƀòn lơgar tus mpồl lơh sa kă bro:

“Broă sồr cau kă phan tŭ tơrgùm blơi tàm sươn pal dan mờ ƀòn lơgar halà geh gơnoar broă dipal mờ adăt boh lam loh làng rơ̆p dong broă lơh ătbồ dà lơgar ƀươn ƀoài rlau, lơh jăt ală bơto pơlam ƀòn lơgar dê…Hơ̆ là tềl sơñio niam nàng gah phan in lòt mŭt tàm bơta niam kơ̆ kơl jăp”.

Bè đah anih lơh broă ătbồ ƀòn lơgar, ồng Nguyễn Minh Huấn, Kwang Lam bồ Sờh Broă lơh sa sươn sre mờ Tiah ơm kis càr Dăk Lăk pà gĭt, gah broă lơh sa sươn sre gĭt nền Jơnau lơh nền 3015 bơh Ƀộ Broă lơh sa sươn sre mờ Tiah ơm kis là cơng tàng tơngume adăt boh lam kwơmàng nàng tơngguh uă pràn jak sok sền bơta niam phan bơna lơh geh bơh sơnrờp tơn. Sờh gam jơh nùs pơgồp bal mờ ală ƀòn lơgar, mpồl lơh sa kă bro mờ tơrgùm ală mpồl gờñ bơyai lơh mblàng yal, pơlam tàp ai cau lơh broă sa, cau kă phan in bè ală jơnau sồr pa, mơkung sồr ală ƀòn lơgar lơh jăt niam ală broă lơh jăt sền niam sàng goh phan sa, jòi gĭt anih tờm lơh, lơh geh bơta song dơ pă loh làng mờ sok sền rềs àr gơ aniai bơh gờñ. Ồng Nguyễn Minh Huấn, yal:

“Sờh pơgồp bal mờ Kụk Tam phan, Kụk Sền gàr phan tam mờ Anih duh broă Làng bol ală sàh, sơnah ƀòn tơngguh uă gĭt wă bè ătbồ bơta niam mờ niam sàng goh phan sa; tơngguh tai broă lơh bơto pơlam tam phan, tam sầu riêng jăt tơl jơnau sồr, broă jàu gơdờp mờ tam gơl nhơm trồ tiah; tơngguh tai broă lơh sền swì, jăt sền niam sàng goh phan sa mờ màh sồ tiah tam, anih ơn klơm sầu riêng tăc mờ lơgar ndai”.

Broă Ƀộ Broă lơh sa sươn sre mờ Tiah ơm kis ai lơh jăt ală broă lơh sok sền niam sàng goh phan sa ai plai sầu riêng in, ờ mìng lơh geh di tŭ tềng đăp jơnau sồr ngan ngồn bơh drà tăc mờ lơgar ndai dê lơm mờ gam là broă lơh tơnggŏ loh pơlam gùng tơngguh bơngă phan lơh geh bơh sươn sre Việt Nam dê bơh cơng tàng tơnggume adăt boh lam loh làng. Bơta dùl nùs bal uă bơh tơrgùm ală mpồl gah phan dê, mpồl bơtiàn mpồl lơh sa kă bro mờ gơnoar ătbồ ƀòn lơgar dê pà gŏ gah phan sầu riêng Việt Nam gam rơhời jòi bàn dùl broă lơh bơtàu tơngguh song dơ pă loh làng, kơ̆ kơl jăp mờ mờng chài rlau.