Tus tŭ do, kòp jê ndul gơjroh sur câu Phi neh gơtìp tàm git nđờ jơ̆t sàh, sơnah ƀòn tàm càr Dăk Lăk, pal tơ̆p pơrgŭc rơlao 1 rơbô nơm bơh di pơgăp 100 hìu ròng. Mò Đặng Thị Thủy, Phó Kwang lam bồ Sờh Broă lơh sa suơn sre mờ Tiah ơm kis càr Dăk Lăk pà git, broă sền gròi kòp geh lơh pràn ờ mìng geh kwơ tàm broă sền gàr gah ròng phan in, gàr kloh niam phan sa mờ gam pơgồp bal tàm broă brồ guh wơl broă kă bro phan sa: “Do là bơta tờm dong kờl làng bol iang nùs tàm broă ròng phan, kung bè tŭ phan geh lơh tăc tàm drà bơh ală hìu gơsơ̆t phan ròng lơh poăc dê. Tŭ do, bol añ tơnguh broă sền gròi kloh niam phan sa, nàng gàr niam phan geh lơh tus mờ cau ngui sa geh kloh niam, di mờ gơnoar kwơ. Do là bơta tơngŏ niam, dong kờl cau ngui sa iang nùs rơlao”.

Bal mờ broă sền gròi bơh broă ròng phan mpồl lơh sơnơm phan ròng dê, kloh niam rơcang kơrian kòp gơtờp tàm hìu gơsơ̆t phan ròng lơh poăc kung geh lơh jăt nền nòn, tềng đăp mờ broă sền gròi nền nòn. Ồng Phạm Quốc Thương, cau tờm hìu gơsơ̆t phan ròng lơh poăc tơrgùm bal tàm thôn Tân Hiệp, sơnah ƀòn Tân An, càr Dăk Lăk pà git, nàng pơgồp bal tàm broă rơcang kơrian kòp jê ndul gơjroh sur câu Phi, hìu gơsơ̆t phan ròng lơh poăc neh sền gròi rơlao tus mờ wàng ròng sur: “Jơh ală khà sur geh cèng tus tàm hìu gơsơ̆t do ndrờm geh sền gròi nền nòn ngan. Sur blơi bơh ală wàng ròng dờng ndrờm geh sră yal wàng ròng loh làng, ờ di sur blơi ờ git wàng ròng, den tàng iang nùs ngan gơwèt mờ drà kă bro tus mờ cau ngui sa, geh khà kloh niam mờ broă lơh nền nòn bơh kwang bàng lơh sơnơm phan ròng, den tàng hìu gơsơ̆t phan ròng lơh poăc añ dê sùm gàr niam”.

Kòp jê ndul gơjroh sur câu Phi gơtờp tàm uă tiah tàm càr Gia lai. Bơdìh mờ bơta lơh gơtìp hoàc huơr uă tus mờ cau ròng, kòp kung neh lơh gơrềng ờ niam tus mờ broă kă bro bơh ală cau tăc poăc phan ròng dê tài làng bol kơlôi rơcang tus mờ bơta kloh niam phan sa bơh poăc sur dê. Ồng Huỳnh Ngọc Diệp, Ci kụk atbồ Ci kụk Ròng phan mờ Lơh sơnơm phan ròng càr Gia Lai pà git, mpồl lơh broă do neh mờ gam pơgồp bal nền nòn mờ ală tiah nàng lơh jăt ală gùng dà broă rơcang kơrian mờ kòp nền nòn. Mờ mpồl lơh broă geh gơnoar kung rơ̆p tơnguh broă lòt sền, sền gròi nền nòn ală hìu gơsơ̆t phan ròng lơh poăc mờ kă bro. “Bơh broă git khà sur geh gơsơ̆t tàm ală hìu gơsơ̆t phan ròng lơh poăc tơrgùm bal tàm càr den geh gŏ gơmù pơn drờm mờ ală nhai lài. Gah lơh broă do kung sùm mblàng yal mờ bơto pơlam làng bol là kòp jê ndul gơjroh sur câu Phi ờ gơtờp tus kòn bơnus, den tàng làng bol iang nùs ngui sa, pal rơwah poăc tàm ală hìu tăc, ală hìu tăc geh bơngă pin dờn, ală tiah geh broă sền gròi bơh anih lơh broă gah lơh sơnơm phan ròng den poăc sùm kloh niam”.

Jăt jơnau yal bơh Ƀộ Broă lơh sa suơn sre mờ Tiah ơm kis dê, tŭ do gùt lơgar geh mờr 1000 tiah gơtờp kòp tàm 34 càr, ƀòn dờng. rơlao 330 rơbô nơm sur pal tơ̆p pơrgŭc. tềng đăp mờ bơta kòp jê ndul gơjroh sur câu Phi gơtờp uă tàm gùt lơgar, Phó Thủ tướng ồng Trần Hồng Hà pa lơh broă mờ Ƀộ Broă lơh sa suơn sre mờ Tiah ơm kis, ală ƀộ, gah lơh broă dà lơgar gơrềng bal bè bơta kòp gơtờp mờ ai geh gùng dà broă lơh gơdờp bal, geh cồng nha nàng sền gròi kòp gơtờp, gàr niam poăc sur geh tăc tàm ală nhai lồi nam 2025. Phó Thủ tướng ồng Trần Hồng Hà sồr Ƀộ Broă lơh sa suơn sre mờ Tiah ơm kis mhar sền wơl jơh jơnau pal jăt geh ai tŭ do bè broă rơcang kơrian, lơh kloh kòp gơtờp, tàm hơ̆ sền kwơ kơnòl geh ai sền phan gơtìp kòp, khà broă nàng git bơta kòp gơtờp, gơnoar broă yal kòp gơtờp tus tơl kấp (sàh, càr, dà lơgar), yal Cíñ phủ in nàng tơlik sră nggal di jăt broă lơh tơrmù di pal nàng lơh wơl, bơtơl gùng dà broă lơh, broă lơh glài di pal gơwèt mờ broă lơh gơnoar atbồ ƀòn lơgar bàr kấp dê.