Bơh ală broă lơh hòi jà kă bro phan geh bơyai lơh tàm dơ̆ bơyai lơh Pơrjum hòi jà bơcri priă càr Dăk Lăk nam 2026 pa do, rlau 150 cơldŭ phan bơh 80 mpồl lơh sa kă bro, mpồl lơh broă bal mờ anih lơh gơlik phan tàm dơlam mờ bơdìh càr neh yal tơnggĭt uă phan bơna geh bơta pràn bè kơphê, ka kau, macca, tiêu, dà lơ we, phan lơh sơnơm, phan sa neh trŭ gơm, phan lơh mờ tê niam chài bal mờ uă phan bơna OCOP mờ phan bơna lơh sa mờ măi mŏk ƀòn lơh broă sa sươn sre pơnrơ. Do là tŭ niam nàng ală cau tờm lơh gơlik phan yal oă măt kă bro phan, jòi cau lơh broă bal, rề ơnàng drà tăc ai phan lơh geh bơh sươn sre in. Ala măt dùl mpồl lơh broă bal, ồng Nguyễn Duy Hùng pà gĭt, geh cả ai tơl bơta tus bal lơh ală broă lơh hòi jà kă bro phan neh dong ală cau tờm OCOP tìp geh uă rlau năc blơi phan mờ cau tăc blơi phan.

"Pơrjum drà do lam lơh niam ngan. Ală cau tờm OCOP đơs niam ngan bè broă lam lơh mờ broă yal tơnggĭt oă. Mờ is ồn hơ̆ là di dồ dơ̆ mờ càr Dăk Lăk yal rơndăp ù tiah mờ bơcri priă bơh càr dê tàm tơngai do den gơhòi gơ jà uă ngan năc lòt tus ndo nàng yal bơta sền gŏ mờ bol hi kung yal tơnggĭt uă ngan phan bơna”.

Bal mờ tàm tơrbŏ gùng lòt rê kă bro phan jăt gùng dà broă lơh ờs mờng bơh lài, càr Dăk Lăk gam dong kờl mpồl lơh sa kă bro, mpồl lơh broă bal jăt ngui tam gơl sồ tàm yal tơnggĭt oă mờ tăc blơi phan bơna. Ală dar tăc phan pờ tơn tàm internet, tàm tơrbŏ tàm bơnàng jă sồ dong phan bơna lơgar ndai tus mờ năc blơi phan mhar rlau, ơnàng rlau, pơgồp bơnah tơngguh uă cồng nha tăc blơi. Tus bal tăc phan tàm bơnàng jă sồ, mò Lê Thị Hồng Thơm, ala măt mpồl lơh sa kă bro lơh gơlik phan bong bơka niam să bơh chi lơh sơnơm sàh Cư Prao, càr Dăk Lăk pà gĭt:

"Dơ̆ do là pơrjum drà tam gơl sồ bơh chờm càr Dăk Lăk dê tơnơ̆ tơmŭt bal. Bal mờ broă cèng phan bơna tus pơrjum drà mờ ală gùng dà broă lơh ờs mờng bơh lài nàng tăc tơn den đah kông ty bol hi gam tus bal ală dar live tam gơl sồ bơh đah Kụk Hòi jà mờ Anih tờm Hòi jà Kă bro phan càr dê dong kờl. Kơ̆p kờñ là yal tơnggĭt uă geh phan bơna bơh he dê jăt uă broă lơh krơi is mờ gơtùi tus bal mờ năc blơi phan bơh uă bơnàng jă krơi is, ală gah krơi is”.

Jăt ồng Nguyễn Hải Triều, Phó Kwang Lam bồ Sờh Lơh sa mờ măy mŏk mờ Kă bro phan càr Dăk Lăk dê yal, jơnau kờñ bơh càr dê ờ mìng ơm wơl tàm broă tơngguh uă bơta niam phan bơna mờ gam lòt bal mờ mpồl lơh sa kă bro, mpồl lơh broă bal mờ làng bol lơh broă sa tàm bơ̆t bơtàu măt kă bro phan, tàm tơrbŏ tăc mờ blơi, hòi jà kă bro phan mờ bơtàu tơngguh drà kă bro. Do là ală gùng dà broă rơndăp lơh kwơmàng nàng tơngguh uă bơta kwơ phan lơh geh bơh sươn sre, tơngguh pràn tàm pơrlòng mờ gơhòi gơ jà bơcri priă tàm broă lơh gơlik phan, tăc blơi phan lơh geh bơh sươn sre bơh ƀòn lơgar dê.

“Jơnau sồr gơ tơlik bơh càr dê gơ wèt mờ ală mpồl lơh sa kă bro ờ mìng là lơh broă lơh gơlik ală phan bơna geh tơl jơnau sồr bơta niam lơm mờ gam pal lam lơh niam ală bơta lơh broă tàm tơrbŏ tăc mờ blơi, hòi jà kă bro phan mờ bơ̆t bơtàu măt kă bro bơtàu tơngguh drà tăc blơi. Ngan tài bè hơ̆, bơh pơrjum drà, càr Dăk Lăk kung kơ̆p kờñ yal tơnggĭt dồ bă ngan ngồn, mờ sền gŏ mờ măt tơn ală cồng nha lơh geh tàm bơtàu tơngguh tàm broă lơh sa mờ măy mŏk ƀòn lơh broă sa sươn sre càr dê. Mơkung rơ̆p ai tơl bơta tàm tơrbŏ mờ yal tơnggĭt uă măt phan kă bro, jòi cau lơh broă bal mờ wèt tus là lơh broă bal bơcri priă”.

Bơh dong kờl tơngguh uă bơta niam phan bơna tus tàm tơrbŏ drà tăc blơi, tam gơl sồ mờ bơ̆t bơtàu măt kă bro, bơta lòt bal bơh gơnoar ătbồ dê bal mờ ală gah geh gơnoar dê gam bơtơl tai bơta gơn kơnờm nàng làng bol lơh broă sa, mpồl lơh broă bal mờ mpồl lơh sa kă bro tơngguh uă priă jền phan lơh geh bơh sươn sre ƀòn lơgar dê. Do kung là bơnàng jă kwơmàng nàng broă lơh sa sươn sre càr Dăk Lăk dê bơtàu tơngguh jăt gùng pa, kơnhăp jŏ mờ tơngguh uă pràn tàm pơrlòng tàm drà tăc blơi phan tàm lơgar kung bè ală lơgar.