Dơ̆ dà tih dà lìu kah yau lồi nhai 11 nam 2025 lơh gơbam jrô ƀòn biăp bơkàu Bình Ngọc, càr Dăk Lăk là ƀòn nhòng bàr dà dờng Đà Rằng mờ Sông Chùa. Dà tih dà lìu dờng gơguh tih mhar ngan mờ jrô, neh cò pơrdô bal uă jơtài phan bơna làng bol dê, tàm hơ̆ geh dùl sào bơkàu lay ơn pa tam di dùl poh bơh hìu bơnhă mò Bùi Thị Hồng dê. Tàm bơta sơnam neh dờng ngan, ồng mò kung gam kơ̆ nùs gàr ù nàng tam bơkàu, tam biăp ơm kis mờ ờ duh pal kơnờm tàm oh kòn kòn sau. Bàr tơlak priă sơntìl bơkàu lay ơn cò pơrdô jăt bal dà tih dà lìu gơ wèt mờ mò Hồng là bơnah priă ờ dồ êt. Mò pà gĭt: “Tam tàm ngai 23 nam he, tus ngai 01 nam he là dà gơ lìu tus. Pa căp bồ măt là gơ cò pơrdô jơh nggùl sàu, tơnơ̆ dà kŏ den he tam wơl”.

“Trồ lơh roh, sồr ù pal tơm”, tơnơ̆ tŭ dà gơhoài soăt tơn, làng bol ƀòn bơkàu Bình Ngọc kŭp tê tơn lơh sa wơl. Tăp ù nđiơm gơs bơh dà tih dà lìu dê cèng tus neh bơtơl bơta nđiơm gơs ù in mờ dong tờm biăp, tờm bơkàu dờng mhar ngan. Ală ngai do, nùs nhơm lơh broă gơlơh bè ờ ru rlau. Rlau 40 lồ ù nđiơm gơs kềng gah dà dờng neh geh glòm mờ dà tơlir bơh biăp, bơkàu dê. Làng bol lơh broă sa gam tàm gơ jàr ơn phơng, tuh dà ai ală àr bơkàu neh sơnđờm căt ntê. Ồng Lê Văn Đệ, làng bol lơh broă sa tam bơkàu tiah drà Ngọc Phước, ƀòn biăp bơkàu Bình Ngọc, pà gĭt: “Geh Sa tềp halà ờ hơ̆ là jơnau ờ chài gĭt lài, ai broă lơh den gơ ƀươn đau rlau mờ nam lài, tài bơh he lơh jơh ală là tơnơ̆ dà kŏ, bơh tam tus sền gàr gơ kung ƀươn rlau đau mờ lài”.

Tàm tŭ hơ̆, gơ wèt mờ ală bơta bơkàu tam tàm sơvàk den kal ke uă rlau pơndrờm mờ ală nam. Mò Phạm Thị Kim Liên, cau tờm sươn bơkàu Đinh Tiên Hoàng, sơnah ƀòn Tuy Hoà, càr Dăk Lăk pà gĭt: “Bơkàu dờng kung lơyài rlau tài gơrềng bơh trồ tiah. Kuk den lì gờñ ngan, ai kwất den đơs bal gơ kung ờ niam, tài gơrềng bơh trồ tiah nha gơ kung bluh jơh. Mai den gơlơh bè tŭ do neh rơmĭt jơh rao”.

Bơkàu sơvàk kal ke tàm tam là dùl jơnau, drà ñhòt ngan cau kung lơh cau tam bơkàu kơlôi rơcăng ờ iang sơl. Ală cau lơh broă sa ngăc ngar ala tài bơcri priă uă tam ală sơvàk bơkàu dờng mờ giă bơh 1 tơlak đong rlau hơđăng den tŭ do tam gơl tus bơcri tam ală bơta bơkàu lơyah ngai, sơvàk dềt, giă dồ êt bơh bàr pe jơ̆t tus pram, prau jơ̆t. Mò Phạm Thị Kim Liên, cau tờm sươn bơkàu Đinh Tiên Hoàng, sơnah ƀòn Tuy Hoà pà gĭt tai: “Drà nam do giă gơ ờ huan uă rlau. Ală nam tŭ do rơndeh cau kă phan tus blơi uă ngan mờ nam do den kung gam geh sơl rơndeh mơya dồ êt ngan, rah rài bàr pe nơm gời, den tàng tăc he kung tăc mờ giă ờ kas sơl. Bè sơvàk bơkàu do tơl nam he tăc 70, 80 rbô đong mờ tŭ do he tăc pơgăp 50 rbô đong bơkàu dờng, ai bơkàu di mơ, dềt rlau den he tăc pơgăp 40 rbô đong, ai ală bơkau dềt rơhền he tăc pơgăp 15 tus 20 rbô đong. Bơta bal là dà tih dà lìu hơ̆, cau lơi kung kal ke lơm”.

Ai ồng Lê Văn Đệ, cau tam bơkàu lay ơn Sa tềp Bình Ngọc den gơn kơnờm: “Tŭ do he kung gơn kơnờm giă tăc blơi gơ in geh đau nàng ai làng bol in geh đau priă jền wơl”.

Mìng gam mờr 1 poh tai là tus Sa tềp bơhiàn nam Ơseh. Tŭ do, tàm ală ƀòn tam bơkàu Sa tềp ờs mờng bơh yau tàm tiah đah măt tơngai Lik càr Dăk Lăk bè Tuy Hoà, Bình Kiến…ală thùng kwất, sơvàk Kuk mờ ală àr bơkàu lay ơn Sa tềp gam duh hồl hô hơng pơñiờ să yal tềl dùl kàl prang sơnam pa gam rê tus. Bulah gơtìp dùl nam kal ke tài bơh trồ tiah lơh aniai mơya làng bol neh kơ̆ nùs jak ngan sơrlèt rlau mờ dòn kơnờm dùl sơnam pa cồng nha uă – Càl rbŭt dờng neh lòt rlau, ù rơ̆p gơ căt wơl bơkàu!