Tơnggơs bơh nam 2021 mờ 7 nă cau tàm mpồl, tus tŭ do, Mpồl lơh broă bal Lơh gơlik – Kă bro phan – Drơng broă sa priă Mắc ca Ea H’leo neh geh rlau 30 nă cau tàm mpồl, ătbồ pơgăp 140 lồ kơphê mờ mắc ca. Nam 2025, phan bơna mắc ca bơh Mpồl lơh broă bal dê geh tăc uă di gùng tus lơgar Hàn Quốc, mơkung lơh geh Sră măt Phan bơna lơh sa mờ măy mŏk ƀòn lơh broă sa sươn sre pơnrơ ngan kâp dà lơgar, tơnơ̆ lơh geh Khà jờng Mai An Tiêm nam 2024.

Jăt ồng Nguyễn Trọng Huê, Kwang Lam bồ Mpồl lơh broă bal, cồng nha lơh geh ờ mìng tus bơh broă rề ơnàng tiah tam phan halà tơngguh uă bơta niam phan bơna dê lơm mờ gam là bơh tam gơl bồ tơngoh ătbồ broă, song dơ pă loh làng tàm đơng lam lơh jăt mờ lơh niam gơnoar broă bơh tơl nă cau tàm mpồl dê.

“Broă lơh tơrlòng lài Mpồl lơh broă bal là broă lơh tơrlòng lài bơtàu tơngguh kal ke ngan rlau jơh, mơya dilah lơh jăt di rơ̆p bơtàu tơngguh mhar mờ kơnhăp jŏ. Nàng lơh broă niam rlau kờñ geh bơta lơh bal mờ song dơ pă loh làng bè broă yal priă jền, pà kâp, jàu gơnoar, jàu kơnòl broă ai tơl nă cau in den Mpồl lơh broă bal rơ̆p niam rlau”.

Bal mờ tam gơl pa ătbồ broă, uă Mpồl lơh sa kă bro tàm Dăk Lăk gam tơnggŏ cồng nha bơh broă lơh tơrlòng lài lơh bal lơh sa. Tàm Mpồl lơh broă bal Broă lơh sa sươn sre – Drơng broă sa priă Công bằng Ea Tu, sơnah ƀòn Tân Lập, 49 nă cau, tàm hơ̆ 90% là cau jơi bơtiàn dồ êt nă cau, gam ătbồ rlau 250 lồ kơphê. Kơnờm lơh sa jăt ală jơnau sồr, kơphê Mpồl lơh broă bal dê sùm tăc jơnhoa rlau mờ drà tăc blơi bơh 2 tus 2 tơlak mờ nggùl đong dồ tấn, dong tơl hìu cau tàm mpồl gơguh tai bơh 10 tus 25 tơlak đong dồ nam. Tam pà mờng chài lơh broă, ồng Nguyễn Đình Trọng, Kwang Lam bồ Mpồl lơh broă bal pà gĭt:

“Mpồl lơh broă bal pal lơh is, bañ kơldìng wơl, lài ngan bol he pal lơh niam, bơngă tàm lơh sa den bơh hơ̆ ală năc blơi phan khi rơ̆p jòi tus he, hơ̆ là bơta ờ gơtùi pleh klàs he pal lơh lài, ai Dà lơgar dong kờl mìng là dồ bơnah gời nàng ai tơl bơta ai he in lòt mhar rlau, mờ ờ gŏ di là mìng kơ̆p kơldìng tơmăng tàm bơta dong kờl jơh lơm bơh Dà lơgar dê”.

Tàm sàh Ea Nuôl, càr Dăk Lăk, Mpồl lơh broă bal Broă lơh sa sươn sre mờ Drơng broă sa priă Lòt nhơl Phú Nông Buôn Đôn săc rwah wơl gùng lòt bơh bơtàu tơngguh bơta pràn ƀòn lơgar dê tŭ pơgồp bal broă lơh sa sươn sre mờ lòt nhơl sền gŏ. Tơnggơs bơh nam 2019, tus tŭ do Mpồl lơh broă bal neh geh 46 nă cau tàm mpồl pơrjum bal priă lơh sa, pơgồp bal pràn bơtàu tơngguh broă lơh tơrlòng lài broă lơh sa sươn sre – lòt nhơl gùt dar tơnau đèng dà Srepok 3. Ồng Trần Văn Toàn, Kwang Lam bồ Mpồl lơh broă bal pà gĭt, bơta lơh gơs cồng nha ờ mìng là priă jền lơm mờ là bơta tam klăc mờ bơta tam pà kơnòl đah ală cau tàm mpồl, đơs sền di bơta pràn dơlam is mờ jòi lơh niam bơta pràn mùl geh bơh ƀòn lơgar he dê.

“Bol hi rơcăng lài tă pơgồp priă lơh sa ờs pal geh, tă pơgồp priă lơh sa lơyah ngai nàng bơcri ală broă lơh tơrlòng lài mờ mpồl lơh broă bal neh săc rwah, ai bàr bơnah tờm lơh bơnàng jă bơtàu tơngguh là lơh broă sa sươn sre pơgồp bal mờ lòt nhơl sền gŏ gùt dar tơnau đèng dà Srepok 3. Bơh tŭ tơnggơs kơnhoàl ù tiah hơ̆ bơh chờm uă ngan gam mìng là sươn, uă bă ù lời gời tus tŭ do neh lơh gơlik gơs dùl ƀòn brê bơnơm niam ngan, rơ̆ ru ngan, gơhòi gơ jà năc lòt nhơl”.

Dăk Lăk tŭ do geh rlau 1 rbô 220 Mpồl lơh broă bal mờ rlau 185 rbô nă cau tàm mpồl. Ƀòn lơgar geh uă bơta ƀươn nàng lơh gơs ală Mpồl lơh broă bal geh broă lơh dờng tàm gah broă lơh sa sươn sre, broă brê bơnơm, phan tàm dà, lòt nhơl mpồl bơtiàn, lơh sa mờ măy mŏk lơh gơlik phan mờ logistics. Bulah bè hơ̆, tàm Dăk Lăk rơ̆p mìng pa pơgăp 20% Mpồl lơh broă bal lơh ală broă lơh bal, tàm tŭ pơgăp 80% kung gam lơh broă is rah rài sơl, jòi is drà tăc ai phan bơna in. Do là jơnau kơryan dờng ngan lơh lơh sa bal ờ hềt jòi lơh niam jơh bơta pràn.

Jơnau lơh nền tàm pơrjum bơh Pơrjum dờng Đảng ƀộ càr Dăk Lăk tơngai lơh broă bơh nam 2025- 2030 gĭt nền, lơh sa bal là dùl tàm ală gơn kơnờm kwơmàng nàng lơh jăt jơnau kờñ gơguh tai GRDP bơh 11%/dồ nam rlau hơđăng tàm uă nam tus. Ồng Lương Nguyễn Minh Triết, Kwang bàng Đảng Dà lơgar, Bí thư Tỉnh ủy càr Dăk Lăk geh jơnau đơs, Mpồl tam klăc Mpồl lơh broă bal pal tơrgùm tơngguh uă cồng nha lơh broă, bơtàu tơngguh jăt broă lơh tơrlòng lài Mpồl lơh broă bal rài pa, gơ jăt bal mờ jak chài măy mŏk, tam gơl pa bơceh lơh, tam gơl sồ, lơh sa gơ wơl wơl, broă lơh sa sươn sre ƀòn brê bơnơm mờ lơh bal ală broă lơh gơlik phan.

“Mpồl tam klăc Mpồl lơh broă bal càr dê pal tơrgùm tơngguh uă cồng nha lơh broă bơh ală mpồl lơh broă bal dê, pal sền ngăc tus khà phan lơh geh, mơkung sền dờng màng bơta niam, tơrgùm bơ̆t bơtàu ală broă lơh tơrlòng lài mpồl lơh broă bal rài pa, ngan là tàm tam gơl broă lơh ătbồ broă, ătbồ jòi gĭt anih tờm lơh, kă bro phan điện tử mờ tàm tơrbŏ drà tăc blơi; gơ jăt bal mờ ngui jak chài măy mŏk, tam gơl sồ, lơh sa tơlir, lơh sa gơ wơl wơl, broă lơh sa sươn sre ƀòn brê bơnơm, broă lơh sa sươn sre hữu kơ mờ lơh bal ală broă lơh gơlik phan”.

Bơh ală broă lơh tơrlòng lài Mpồl lơh broă bal lơh broă geh cồng nha tàm Dăk Lăk gơtùi gŏ, mpồl lơh broă bal ngai do ờ gam là broă lơh tơrlòng lài lơh sa cèng bồ tơngoh kơ̆p kơldìng wơl. Tŭ hơ̆ ătbồ broă pa mờ măy mŏk lơh bơnàng jă, lơh bal ală broă lơh gơlik phan lơh gơn kơnờm mờ bơta kwơ cau tàm mpồl lơh anih tờm, ală Mpồl lơh broă bal gam gơgơs mpồl cau lơh kòn gùng ai phan lơh geh bơh sươn sre Dăk Lăk dê tăc tus drà tăc blơi phan khăt gơboh, tă pơgăp ngai sơlơ mpờl gŏ loh làng n gan tàm bơtàu tơngguh lơh sa ƀòn lơgar dê.