Càr Dăk Lăk tŭ do geh pơgăp 41 rbô lồ sầu riêng mờ plai digơlan lơh geh bơh nam do dê geh pơgăp 400 rbô tấn, gơguh pràn pơndrờm mờ ală nam lài. Plai geh uă lòt bal mờ bơta kơn jơ̆ bè bơta niam, ngan là tŭ uă kơnhoàl ù tiah tam sầu riêng tàm ală càr rềp bal gam gơ ơm tàm bơta “sơrbì jơnau dan blơi”, ờ lơh geh tơl jơnau sồr, gơrềng tus bơngă pin dờn gah phan dê. Mò Nguyễn Thị Thành Thực, Củ tịc Mpồl duh broă ătbồ broă Kông ty AutoAgri đơs là, sầu riêng Dăk Lăk gam uă bơta pràn nàng bơtàu tơngguh, gơnoar ătbồ mờ gah geh gơnoar kờñ pal sền gròi tus màh sồ tiah tam.

“Màh sồ tiah tam hơ̆ là jơnau yal là jơtài cau tam dê, mơya neh gơlik geh uă broă uă mpồl lơh sa kă bro sơmờm màh sồ tiah tam lơh ờ niam, tus lơgar Lo cau ơm màh sồ bol he dê, là bol he hoàc hươr. Añ dan mờ gơnoar ătbồ ƀòn lơgar, ală sờh mpồl gah pal geh kơnòl broă dùl nam pal bơsong, lơh geh nđờ màh sồ tiah tam”.

Sờh Broă lơh sa sươn sre mờ Tiah ơm kis càr Dăk Lăk neh pơgồp bal mờ Tơrgùm ală mpồl sầu riêng càr mờ ală mpồl lơh sa kă bro, mpồl lơh broă bal, lơh pràn sền swì gĭt nền bơta niam, ai dồ êt phan mblàng sền jơngkah khà, hơ ờ ngui ală sơnơm kơryan ờ ai, is ồn sok sền kràñ sơnơm rơmĭt ô mờ cadimi. Ồng Lê Anh Trung, Củ tịc Tơrgùm ală mpồl sầu riêng Dăk Lăk, pà gĭt:

“Tơrgùm ală mpồl neh pơgồp bal mờ ală anih tờm kơlôi sơnơng bal mờ ală mpồl lơh sa kă bro, mpồl lơh broă bal ai dồ êt phan nàng gĭt nền tiah Dăk Lăk là tiah niam sàng goh lơh cơng tàng bơta pin dờn nàng geh tŭ tàm rề ơnàng tăc bro đah sầu riêng Việt Nam mờ tăc mờ lơgar ndai. Tàm ală “gùng tơlir” bol hi gam pơlam ală mpồl lơh sa kă bro pơgồp bal mờ Kụk Sền gàr phan tam geh ală broă jàu ai điềm jòi gĭt anih tờm lơh dùl bă niam. Bơh hơ̆ rơ̆p gơmù bơnah gơrềng tus sền swì, sŏk sền. Tơngai lơh sră nggal sền swì phan tăc blơi mờ lơgar ndai rơ̆p mhar rlau”.

 Tơrgùm ală mpồl kung bơto sồr làng bol ờ gŏ di tăc plai ờ hềt dum tŭ ờ hềt tus tơngai dum, pleh bơta gơ aniai gơtìp bơcăp giă halà roh bơngă pin dờn. Ală mpồl lơh sa kă bro, mpồl lơh broă bal geh sồr hơ lơh jăt kràñ ală jơnau sồr niam sàng goh, ală broă pơlam klơm ơn mờ geh tơl priă jền nàng pleh jơnau “sơrbì jơnau dan blơi”, lơh gơbàn hoàc hươr ai cau lơh broă sa in.     

 Nàng sầu riêng Dăk Lăk mùl màl tăc tus dunia, pal lơh broă ndrờm bal bơh lơh gơlik sàng goh, lơh jăt tơl jơnau sồr, jòi lùp anih tờm lơh loh làng song dơ pă tus sŏk sền kràñ ală anih lơh gơlik. Gơnoar ătbồ, mpồl lơh sa kă bro mờ cau tam pal sơm băt tê bal bơ̆t bơtàu gah phan sầu riêng ngan ngồn, kơ̆ kơl jăp, tơl pràn tàm pơrlòng mờ ală lơgar. Mờ bơta lòt bal bơh gơnoar ătbồ mờ gah geh gơnoar dê, bơta lơh ngan bơh cau lơh broă sa mờ mpồl lơh sa kă bro dê, Dăk Lăk gam kràñ cê jơh nùs gàr kơnhăp măt kă bro sầu riêng niam sàng goh, rơhời pờ ơnàng drà tăc, pơgồp bơnah đơs nền anih ơm sầu riêng Việt Nam dê tàm sră wăc rùp phan lơh geh bơh sươn sre tăc mờ lơgar ndai.