Bơh nhai 06 nam 2023, Kục Sền gàr phan tam gơ wèt Ƀộ Broă lơh sa sươn sre mờ Bơtàu tơnguh Ƀòn lơgar, tŭ do là Ƀộ Broă lơh sa sươn sre mờ Tiah ơm kis pơgồp bal mờ Anih Cribơyai kơphê gùt plai ù lơh jăt sền swì bơta gơrềng bơh broă tam bơrlŭ bal dê tàm sươn kơphê tus phan kis lơh aniai tờm mờ hòi jà ngui sơnơm sền gàr phan tam geh kơnòl nàng bơtàu tơngguh kơ̆ kơ̆ kơl jăp tàm ală càr Tây Nguyên. Tàm hơ̆, lùp kờp, jăt sền, gĭt geh phan kis lơh aniai mờ ngui sơnơm sền gàr phan tam gơ wèt mờ sươn kơphê tam bơrlŭ bal; tơngguh uă pràn jak gĭt mờ rơcăng kơryan phan kis lơh aniai ai kwang bàng drơng broă măy mŏk in mờ cau lơh broă sa sươn sre tam kơphê in; tơngguh uă pràn jak lùp sền sền swì ai kwang bàng gah Sền gàr phan tam in; tơngguh uă gĭt wă mờ kơnòl sền gàr tiah ơm kis ai ală anih lơh gơlik mờ kă bro sơnơm sền gàr phan tam tàm Tây Nguyên in.

Jăt Kụk Tam phan mờ Sền gàr phan tam, broă lơh tơrlòng lài tam bơrlŭ bal kơphê mờ tiêu, sầu riêng tŭ do gam geh cau lơh broă sa sươn sre ală càr tàm kơnhoàl ù tiah Tây Nguyên lơh jăt nàng ngui jơh ù tiah mờ tơngguh priă lơh geh. Broă lơh tơrlòng lài do pà gŏ cồng nha cèng wơl loh làng, tơrmù bơta kơn jơ̆ tu kòp mờ gơguh tai li la phan kis. Bulah bè hơ̆, tàm uă ƀòn lơgar, làng bol kung gam mìng tam kơphê gời lơm lơh tờm kơphê ƀươn gơtìp aniai tềng đăp ală kòp bơtờp aniai. Ai gơ wèt mờ broă lơh tơrlòng lài tam bơrlŭ bal, ờ dồ êt nă cau lơh broă sa sươn sre ờ hềt gĭt ngui sơnơm sền gàr phan tam bè lơi gơ in dipal. Ồng Nguyễn Qúy Dương, Phó Lam bồ Kụk Tam phan mờ Sền gàr phan tam đơs là, bơta do kờñ pal gờñ bơsong nàng tơngguh uă bơta niam phan bơna lơh geh.

“Kung gam uă ngan sơl làng bol lơh broă sa sươn sre ờ hềt geh wă wờng loh broă ngui sơnơm, is ồn tàm tŭ tam bơrlŭ bal bè hơ̆ den pal ngui sơnơm bè lơi nàng lơh geh cồng nha gĭt tu kòp lơh aniai mơya kung gàr niam sàng goh phan sa ai chi tam tờm in kung bè chi tam tàm bơrlŭ bal in. Do là dùl bơta lòng dờng tàm ală broă lơh tus do bơsong gah phan nàng kờñ sền gàr kơphê bơtàu tơngguh kơ̆ kơl jăp”.

Lùp sền ngan ngồn bơh Kụk Sền gàr phan tam tàm 3 càr: Kon Tum, Dăk Lăk mờ Lâm Đồng pà gŏ, sơnơm hóa họk kung gam geh khà uă tàm gĭt geh tu kòp, tàm tŭ ală broă lơh siñ họk mờ bơta chài tam phan tơrgùm bal rơ̆p mìng pa bơh sơnrờp lơh jăt lơm. Pơhìn sơrlèt khà ai gơnoar jơngkah sơnơm tàm ală phan bơna kơphê, tiêu, sầu riêng kung gam sơl là jơnau kơlôi rơcăng kờñ pal geh pơn jăt tai sền gròi sok sền kràñ cê rlau.

Nàng lơh niam wơl broă do, ồng Phạm Quang Trung, Lam bồ Ala măt Anih Cribơyai kơphê gùt plai ù tàm Việt Nam, hơ rơ̆p pơn jăt tai bal mờ ală anih lơh broă geh gơnoar tàm lơgar lơh pràn broă lơh ală anih bơto pơlam bơta chài dipal mờ ală jơnau sồr ală lơgar dê. Dong gah kơphê Tây Nguyên rơhời mŭt gơrờm bal uă tàm ală anih lơh gơlik phan gùt plai ù, tơngguh uă pràn jak tàm pơrlòng mờ bơtàu tơngguh kơ̆ kơl jăp.

“Nàng bơto pơlam mờ tơngguh uă gĭt wă ai làng bol in den bol he kờñ pal geh ală sền swì loh làng, geh ală kơlôi sơnơng nàng ai geh ală broă lơh ala dipal mờ bơta tŭ do. Kờp sền nền wơl, bơtơl mờ tam gơl wơl ală bơta sră pơ àr lời prăp gơ in dipal mờ ală jơnau sồr pa. Jăt tàm bơta hơ̆, pờ ală ơdŭ bơto pơlam rề ơnàng ai làng bol cau lơh broă sa sươn sre in nàng mblàng yal ală jơnau gĭt wă pa, jơnau sồr pa bơh dunia dê”.