Uă nam đềt mềr mờ tiah tam mãng kầu tàm càr Tây Ninh, bi Lê Minh Trung, Kwang Lam bồ Mpồl lơh broă bal Drơng broă sa priă Broă lơh sa sươn sre Minh Trung pà gĭt, jơnau ờ lơh jăt sră hơ pơrgon tàm lơh bal lơh gơlik bulah neh gơmù mơya kung gam geh sơl. Tŭ giă drà tăc blơi gơguh jơnhoa, uă cau lơh broă sa tăc phan ai cau kă phan in; mơya tŭ gơdùh giă den tơrgùm wơl phan ai Mpồl lơh broă bal in. Bơta do jun jơh ală rềs àr gơ aniai rê hờ đah mpồl blơi jơh phan in. Tềng đăp bơta geh ngan hơ̆, Mpồl lơh broă bal Minh Trung lồi dŭt pal tam gơl wơl tus blơi jăt giă drà tăc blơi ala tài ngui giă ờ tam gơl sùm bơh bồ kàl. Mpồl lơh broă bal blơi jơh phan lơh geh, tàm tŭ priă tă lơh broă geh kờp jăt khà priă lơh geh bơh kă bro.

Ndrờm bè hơ̆ sơl, bi Nguyễn Viết Vị, Kwang Lam bồ Mpồl lơh broă bal Broă lơh sa sươn sre Phước Thiện yal, nàng bơ̆t bơtàu geh tiah tam phan kơ̆ kơl jăp sùm tàm kơnhoàl ù tiah nhàr lơgar Bình Phước lài do, Mpồl lơh broă bal neh pal bơcri priă uă ngan bơh tờm sơntìl, bơta chài sơngka sền gàr tus broă bơ̆t bơtàu măt kă bro mờ jòi drà tăc. Tàm bơta tàm pơrlòng kràñ ngan, broă gàr kơ̆ cau lơh broă bal blơi phan mờ gàr sùm bơngă ai cau lơh broă sa ƀòn lơgar in là jơnau lơh kal ke in.

Bulah bè hơ̆, Mpồl lơh broă bal sùm pal kong mờ broă cau kă phan đah bơdìh mŭt “lơh aniai giă”, lơh giă blơi gơguh jơnhoa sơrbăc mhar ngan nàng geh blơi uă phan, lơh uă cau lơh broă sa crăp rơcăng sơrbì tĕ jơnau hơ neh kĭ. Sơlơ̆u wơl, tŭ drà gơmù giă uă ngan, àñ ơnòng kơn jơ̆ rềs àr gơ aniai gơ wơl àñ kơn jơ̆ wơl tềng hơđăng pơnì Mpồl lơh broă bal dê jăt ală sră hơ pơron blơi jơh phan lài do.

Mpồl lơh broă jòi drà tăc mơkung àñ ơnòng tai priă tă lơh bal, mơya tŭ gơlik jơnau geh ngan ờ lơh jăt sră hơ pơrgon den mờr bè ờ geh kơrnoăt boh lam lơi tơl pràn nàng sền gàr gơnoar kwơ. Bi Nguyễn Viết Vị, pà gĭt:

“Geh ală anih gơkòl kwơmàng ngan mờ digơlan lơh aniai ală anih lơh broă tŭ do. Hơ̆ là ală mpồl lơh broă bal, mpồl lơh sa kă bro kung gam ờ hềt geh sơl kơrnoăt sền gàr dong kờl tơl pràn bơh gơnoar ătbồ mờ ƀòn lơgar dê tàm tus bal lơh bal mờ cau lơh broă sa. Tàm tŭ hơ̆, jơnau geh ngan cau kă phan lơh aniai giă, tàm pơrlòng ờ song mờ jơnau geh ngan làng bol lơh broă sa lơh aniai jơnau hơ pơrgon kung gam gơlik geh uă ngan sơl”.

Tàm gùng lòt jun phan lơh geh bơh sươn sre Việt Nam dê tăc tus dunia, mò Ngô Tường Vi, CEO Kông ty Tăc mờ Blơi phan mờ lơgar ndai Chánh Thu, pà gĭt: uă nam do, mpồl lơh sa kă bro bơh mò dê neh rơcăng lài lơh broă tơn mờ ală drà tăc rah rài mờ cau lơh broă bal blơi phan bơh lơgar ndai, is ồn là tàm drà lơgar Lo, nàng kờñ jòi drà blơi phan kơ̆ kơl jăp sùm. Bơh uă dơ̆ lòt lùp mờ tàm bơyai, mpồl lơh sa kă bro đơs: plai bung kơmhò tơlir (pư̆t), sầu riêng bal mờ uă bơta chi sa plai ndai lơgar Việt Nam dê geh bơta pràn uă ngan tàm drà lơgar Lo, mìng là lơh geh di ală jơnau sồr bơta niam. 

Bulah bè hơ̆, dơ̆ nhơl tăc phan mờ lơgar ndai di gùng ngan ngồn gơ sồr bơta ndrờm bal mờ bơta lơh glài kràñ ngan bơh jơh bal mpồl lơh sa kă bro bal mờ cau lơh broă sa dê. Bơh broă sok sền sơnơm sền gàr phan tam, lơh jăt màh sồ tiah tam tus ală jơnau hơ jàu phan ndrờm pal geh lơh jăt kràñ ngan. Mìng dùl bơta tàm bơrkuăt lơh tìs, jơh ală anih lơh bal rơ̆p gơtìp gơrềng kơn jơ̆ ngan.

Mpồl lơh sa kă bro ờ gơtùi nă să is lòt tus dà lềng dờng, mờ cau lơh broă sa kung ờ gŏ di tàm pơgơl bơta kơnhăp kơ̆ ai bơta kwơ dồ êt dồ chềt. Ai lài khà dùl là bơ̆t bơtàu tiah tam phan kơ̆ kơl jăp jơh bal bè bơta niam bal mờ khà phan lơh geh jăt di jơnau kờñ drà dê. Tŭ drà blơi geh gàr sùm, bơta kwơ plai chi Việt Nam hơ̆ sồng mùl màl gơguh bơngă. Mò Ngô Tường Vi đơs sùm, dilah ờ tam gơl bồ tơngoh lơh sa mờ gàr bơta lơh glài lơh bal, cau lơh broă sa rơ̆p sơrbăc mhar gơtìp tơlik dô bơh anih nhơl tăc phan mờ lơgar ndai:

“Bơdìh mờ giă tăc blơi den làng bol pal kơlôi tus bơta kơ̆ kơl jăp tàm broă blơi jơh phan bơna mờ ală mpồl gam lam lơh ai làng bol in, den do là broă mờ làng bol pal kơlôi tus lài ngan. Bol he gơtùi tăc geh giă jơnhoa bàr pe tấn halà tàm 1 nam, mơya làng bol pal jòi tĕ dùl mpồl lòt bal mờ he bơh tơngai sơnđờm tam tus dì uă nam tơnơ̆ do tơn…Ngan tài bè hơ̆ mờ pal sơning tĕ lơh bè lơi nàng lòt ngài rlau”.

Jăt ồng Nguyễn Đình Tùng, Kwang Lam bồ Vina T & T Group, Phó Củ tịc Tơrgùm ală mpồl Biăp plai chi Việt Nam, bơngă phan lơh geh bơh sươn sre Việt Nam dê gam geh lơh kơ̆ kơl jăp wơl kơnhăp kơ̆ ngan tàm muh măt ală lơgar. Broă uă drà kal ke sùm pờ mpồng là tŭ niam ngan nàng tơngguh priă lơh geh kơnhăp kơ̆ ai cau lơh broă sa in. Kơnờm bè hơ̆, cau lơh broă sa gam rơhời sơrbì bơta mờng kwèng tam phan lơi tăc phan hơ̆, rơcăng lài lơh jăt ală jơnau sồr bơta chài mờ jòi gĭt wơl anih tờm lơh nàng tus bal tàm ală drà tăc phan mờ lơgar ndai rơndăp tăp sèng.

Bơh mùl màl lơh broă, ồng Tùng đơs jơnau tờm ngan rlau jơh kung gam sơl là bơta pin dờn đah mpồl lơh sa kă bro mờ cau lơh gơlik. Mpồl lơh sa kă bro tăc mờ dong kờl bơta chài mờ hơ drà tăc; pơgơl wơl, cau lơh sươn pal lơh jăt ală broă pơlam tam phan mờ jàu phan di jơnau cribơyai ring bal. Tàm mùl màl, bơcah bơcài lơm ală anih lơh bal neh gơtùi lơh tai mìng tài bơh nùs hàm hà ntoăt jăt khà giă jơnhoa ngan rlau jơh tềng đăp măt lơm. Bè hơ̆ mơya, tàm tiah kă bro phan gùt plai ù tŭ do, bơta mờng lơh sa ờ kơnhăp, ờ geh bơta lơh bal neh ờ gam anih ơm tai.

Broă rơndăp lơh bơsong mờ ồng Nguyễn Đình Tùng ai geh bơh mờng chài mùl màl geh kwơ ngan ngồn ngan, hơ̆ là lam lơh gơlik bơh ală mpồl lơh broă bal nàng cau lơh broă sa ătbồ is mờ jăt sền bal ndrang gơ̆p:

“Tŭ do, bol hi mìng lơh broă mờ mpồl lơh broă bal mờ ală jơnum lơh broă bal…Tŭ hơ̆, làng bol lơh bal geh is ală jơnau sồr, tàm jăt sền ndrang gơ̆p. Ală cau lơi lơh tìs den khi tơlik bơdìh is, ờ gŏ duh càng pal geh mpồl lơh sa kă bro pal sồr lơh glài halà bơta lơi ndai. Bol hi mìng kờñ hơ là geh lơh broă mờ ală cau gam lơh ngan, lơh di mờ geh bal jơnau kờñ kơnhăp jŏ nàng bơ̆t bơtàu măt kă bro Việt Nam tŭ do”.

Tŭ ală drà tăc mờ lơgar ndai gơ tơlik jơnau sồr ngai sơlơ kal ke ngan, lơh bal lơh gơlik ờ gam tai là dùl săc rwah mờ neh gơgơs bơta pal geh lơh nền lài ngan. Nàng phan lơh geh bơh sươn sre Việt Nam lòt ngài, bơta sơm băt tê bal sền gàr jơnau hơ pơrgon mờ bơ̆t bơtàu bơta pin dờn jŏ jòng đah mpồl lơh sa kă bro mờ cau lơh broă sa là gùng lòt mìng dùl lơm.