Là mpồl lơh broă tăc kơphê mờ lơgar ndai khà dùl lơgar Việt Nam dê, Kông ty Kong kơnòl is Dồ nă să tăc mờ blơi phan mờ lơgar ndai 2-9 Dăk Lăk (Simexco Daklak) neh ai kơphê tus 89 dà lơgar mờ kơnhoàl ù tiah dà lơgar. Nam 2023, mpồl lơh sa kă bro tăc mờ lơgar ndai rlau 100 rbô tấn kơphê, priă geh rlau 287 tơlak dolar Mỹ. Pa do, Simexco Daklak là mpồl lơh broă mìng dùl lơm lơh geh Măt kă bro dà lơgar Việt Nam ai phan bơna kơphê gar mờ tiah tam kơ̆ kơl jăp, rơ̆ ru phan bơna, is ồn là kơphê bơkah pơnrơ is Fine Robusta. Ồng Lê Đức Huy, Củ tịc Mpồl duh broă tàm mpồl mơkung là Kwang lam bồ dờng Kông ty dê yal: “Gĭt nền cau lơh broă sa rơ̆p lơh nền bơta niam phan lơh geh bơh sươn sre dê. Nàng phan lơh geh bơh sươn sre tăc tus dunia den bol he pal lòt sơlơ̆u wơl mờ lòt rềp bal ngan mờ cau lơh broă sa. Bol hi tam gơl geh jơnau gĭt wă mờ kơnòl bơh cau lơh broă sa dê. Cau lơh broă sa gơgơs cau lơh broă bal, gơgơs cau kă bro broă lơh sa sươn sre, tŭ geh jơnau gĭt wă bè hơ̆ den cau lơh broă sa lơh broă niam ngan. Hơ̆ kung là anih kơldìng kơ̆ kơl jăp ngan nàng ală kông ty ai phan lơh geh bơh sươn sre he dê lòt tăc tus dunia”.

Sùm tam gơl pa, broă lơh sa sươn sre càr Dăk Lăk dê ngai sơlơ bơtàu tơngguh jăt gùng dà uă broă tờm. Bal mờ ală bơta phan ờs mờng bơh yau bè kơphê, tiêu, kau su, dà sŭt lơ we…ală nam rềp ndo, ală phan bơna ka kau, sầu riêng, macca…càr Dăk Lăk dê neh tăc tus ală drà tăc blơi kal ke ngan bè: Mỹ, Nhờk, câu Âu. Is ồn, nam 2023, tŭ sầu riêng Việt Nam ngan ngồn geh tăc uă tus lơgar Lo, priă jền phan bơna sầu riêng Dăk Lăk sùm gơguh tai. Tàm kơnhoàl Krông Păc, tiah tờm sầu riêng càr Dăk Lăk dê, nam 2024, priă geh bơh tăc sầu riêng geh rlau 6 rbô tơmàn đong. Gĭt nền bơta niam lơh gơs măt kă bro, mò Ngô Thị Minh Trinh, Phó Củ tịc Anih duh broă Làng bol kơnhoàl Krông Păc, càr Dăk Lăk pà gĭt, pơlam gùng dà bơtàu tơnguh măt sầu riêng kơnhoàl dê: “Pal geh bơta gĭt wă tam mờ ătbồ ală chi tam mờ phan bơna phan lơh geh bơh sươn sre tiah do dê, is ồn là tăc mờ lơgar ndai. Dơ̆ bàr tai là bol hi gam tă dồ bơnah kes priă nàng jăt ngui măy mŏk pa tàm mblàng sền bơta ù, bơta phơng sih, nhơm trồ tiah nàng rơndăp ù tiah tam kờñ gơ in dipal mờ gah phan sầu riêng do. Bal mờ hơ̆ tai, bol hi jăt ngui măy mŏk pa tàm lơh gơlik, lơh phan kung bè tàm ătbồ, nàng tŭ phan bơna sầu riêng tăc tàm drà pal lơh geh jơh ală bơta niam”.

Jăt ồng Nguyễn Hoài Dương, Kwang Lam bồ Sở Broă lơh sa sươn sre mờ Bơtàu tơngguh Ƀòn lơgar càr Dăk Lăk dê, bơta ƀươn ù tiah bal mờ nhơm trồ tiah ƀươn ƀoài dong càr lơh gơlik geh uă phan lơh geh bơh sươn sre priă jền lơh sa uă tăc ai drà tàm lơgar mờ tăc mờ lơgar ndai in. Nam 2023, geh sền là dồ nam lơh geh cồng nha bơh broă lơh sa sươn sre càr Dăk Lăk dê, gơ ai priă jền bơh tăc mờ lơgar ndai bơh sơnrờp lơh geh 1 tơmàn 600 tơlak dolar Mỹ. Nàng ai phan lơh geh bơh sươn sre pơn jăt tai tăc tus drà lơgar ndai, ồng Nguyễn Hoài Dương pà gĭt, bal mờ đơs nền bơngă, bơta niam, càr rơ̆p sền gròi rlau tai tus hòi jà, yal tơnggĭt, rề ơnàng drà tăc blơi: “Dồ đah là pơn jăt tai lơh kơ̆ kơl jăp ală drà tăc blơi ờs mờng bơh yau mờ broă gĭt wă loh jơnau sồr bơh ală drà tăc blơi do bơh bơta phan, mpồl phan tus ală jơnau sồr bơta niam jơnau sồr gơ ai tơlik. Geh bal kờñ pal wèt tus geh ală bơta ờ hềt dipal, ờ hềt wil tơl tàm tơngai lài nàng geh ală tŭ niam ngan rlau jơh tăc mờ lơgar ndai mờ rề ơnàng drà tăc blơi ờs mờng bơh yau. Bal mờ hơ̆, rề ơnàng ală drà tăc blơi bềng bơta pràn pa pơnrơ bè drà tăc blơi lơgar Ấn Độ dê, drà tăc blơi Halal (phan bơna lời ai cau jăt Yàng Isslam in). Dăk Lăk rơ̆p yal tơnggĭt mờ tàm bơyai bơh ală gah krơi is nàng gờñ tăc tus ală drà tăc blơi do”.