Lơh broă sa sươn sre jăt gùng dà ngui măy mok pa, lơh gơlik phan lơh geh bơh sươn sre jăt sră dan blơi phan, lơh sa bơh làng bol dê ngai sơlơ bơtàu tơnguh. Làng bol tàm tiah do gam bơyai lơh wă rò sơnam pa sa tềp tàm nùs nhơm chờ hờp chờ hờñ ngan, hờm ram mờ ram mhŭt.

Wă rò bol añ tàm hìu niam ngan, ram mhŭ mờ wil tơl ngan phan ngui, ồng Kră Jañ Ha Sung, ơm tàm thôn R’Chai, xã Phú Hội, kơnhoàl Đức Trọng, càr Lâm Đồng chờ hờp pà gĭt, kơnờm bơh trồ tiah niam, giă geh sùm mờ drà tăc phan geh sùm den tàng kàl lơh plai màk pa do dong hìu bơnhă ồng lơh geh priă cồng tus rhiang tơlak đong. Bal mờ priă lơh geh bơh 2 lồ kơphê, 4 sàu biăp, khuah rbài ală bơta tam tàm bơrlŭ bal jăt gùng tam uă phan tam, hìu bơnhă ồng ờ mìng mhar ngan sơrlèt gan kal ke tài gơrềng bơh kòp Kovid-19, mờ gam tềm pềr geh dùl bơnah priă uă đau sơl nàng rề ơnàng bă ù lơh sa. Jăt ồng Kră Jañ Ha Sung đơs, cồng nha do là kơnờm tàm broă lơh bal lơh sa mờ tăc blơi phan jăt sră dan blơi phan bơh ală mpồl lơh sa kă bro, hợp tak xã tàm tiah do dê. Lơh sa kơ̆ kơl jăp, priă lơh geh gơgu uă den tàng sa tềp nam do, hìu bơnhă ồng Ha Sung bơyai lơh sa tềp wă rò sơnam pa wil tơl mờ hờm ram bal mờ ƀòn lơgar. Ồng Kră Jañ Ha Sung yal: Bè lơh sa kờp bơh tơnơ̆ kòp dờng Kovid-19 tus tŭ do, hìu bơnhă añ tam plai màk tàm bơrlŭ bal mờ mrĕ den tàng priă lơh geh sùm, lơh sa gơ geh rlau. Mờ tàm nam 2021 tơn, bulah geh kòp lơh bơtờp kal ke mơya priă jền lơh geh kung gam geh sơl. Lài do, làng bol kòn cau he dê ờ hềt chài gĭt geh bơta jak chài măy mok, broă lơh sa priă lơh geh ờ hềt uă. Ală nam rềp ndo, lùp bơsram bơh ală broă lơh sa bơh cau Yoan dê, bal mờ kơphê den làng bol tam tai biăp, bùm khuah rbài jăt gùng dà lơh broă sa sươn sre măy mok pa den tàng lơh sa hìu bơnhă bơtàu tơnguh.

Broă lơh tam biăp, bơkàu, bùm, plai đo jăt sră dan blơi bal, lơh bal tàm ală broă lơh bal lơh sa gam gơrề uă tàm ƀòn lơgar kòn cau K’Ho tàm Phú Hội. Tŭ do, xã neh geh mờr 900 hìu kĭ sră hơ lơh bal lơh sa mờ tăc blơi phan lơh geh bơh sươn sre mờ ală mpồl lơh sa kă bro, hợp tak xã, tàm hơ̆ geh mờr 300 hìu cau kòn cau dùl êt nă cau. Bal mờ hơ̆, làng bol jơh nùs ngui bơta jak chài măy mok tàm broă lơh sa nàng tơnguh uă cồng nha lơh sa. Đơs bè bơta tam gơl bơh ƀòn lơgar he dê, bi K’Hoan, kòn cau K’Ho ơm tàm ƀòn Chi Rông, xã Phú Hội, yal: Lài do, kòn cau K’Ho mìng lơh uă kòi sre dùl kàl mờ dùl êt bă kơphê neh kra, gơ ai cồng nha dùl êt, ờ hềt chài ngui bơta jak chài măy mok tàm broă lơh sa, den tàng rài kis làng bol dê tìp uă ngan kal ke, bòl glar. Bàr pe nam rềp ndo, geh dà lơgar sền gròi dong kờl, pờ ală ơdŭ bơto pơlam, pơlam bơta chài tam bơkiar kơphê, tam biăp, khuah rbài ală bơta, rài kis làng bol dê ngai sơlơ bơtàu tơnguh ngan pơndrờm mờ lài do.

Jăt ồng Nguyễn Thành Trung, Phó Củ tịc Ủy ƀan Ñân zân xã Phú Hội đơs, kơnờm bơh khin cha tam gơl bồ tơngoh tam phan, priă jền geh bơh lơh sa sươn sre kờp bal bơh xã dê neh lơh geh rlau 270 tơlak đong dùl lồ dùl nam. Jơh gùt xã, khà hìu rƀah gơmù tŭ do mìng gam ờ hềt tus 1%. Nàng pơn jăt tai gàr niam ală cồng nha neh lơh geh, tàm nam 2023, kâp ủy mờ gơnoar ătbồ xã rơ̆p pơn jăt tai lơh pràn tam gơl rơndăp tăp sèng lơh sa, tơnguh cồng nha lơh geh, phan lơh geh mờ priă jền kă bro phan lơh geh bơh sươn sre. Broă tờm là pơn jăt tai tam gơl pa broă lam lơh sa gơ jăt bal mờ ală broă lơh bơh bơtàu tơnguh lơh sa bal, ngan là tàm tiah jơi bơtiàn dùl êt nă cau. Ồng Nguyễn Thành Trung, yal: Tàm tơngai tus, bol añ rơ̆p ngui ală bơnah priă nàng bơcri ai ală tiah làng bol kòn cau dùl êt nă cau in, ai lài ai ù lơh sa, ai tơl ală bơta ai khi in bơtàu tơnguh lơh sa hìu bơnhă. Bol añ geh ala măt làng bol in nàng làng bol geh gĭt, tam tìp mờ ală mpồl lơh sa kă bro, mpồl lơh broă bal, hợp tak xã nàng cau in lòt sền, lùp bơsram bơh ală broă lơh, lùp bơsram bơh ală broă lơh sa gơ jăt bal mờ bơtàu tơnguh lơh broă sa sươn sre măy mok pa. Bơh hơ̆ geh gùng dà tam gơl rơndăp tăp sèng chi tam, gơguh priă lơh geh tàm dùl bă ù bal, gơguh priă lơh geh bơh làng bol dê ngai sơlơ uă.

Phú Hội tŭ do geh 6 rbô 700 lồ ù lơh sa sươn sre, tàm hơ̆ geh 3 rbô 680 lồ ù lơh sa sươn sre jăt gùng dà măy mok pa. Do là bơta kwơmàng nàng xã in pơn jăt tai rề ơnàng tai uă broă lơh lơh bal lơh sa đah làng bol mờ mpồl lơh sa kă bro, geh sùm drà blơi phan lơh geh bơh sươn sre, bơtàu tơnguh rài kis phan bơna mờ nùs nhơm làng bol dê.