Lơh jăt jơnau bơto pơlam bơh gơnoar ătbồ mờ gah lơh broă sa sươn sre kơnhoàl Kon Plông dê tàm ală ngai trồ tiah mrềt noăt ir, trồ geh dà sơtŭ dà mhual klam jơngo, mìu mrềt, 145 hìu làng bol kòn cau Sơdàng tàm ƀòn Kon Vơng Kia, thị trấn Măng Đen neh lơh jăt uă broă lơh nàng sền gàr mpồl phan ròng. Bal mờ broă tơn jơh tĕ jơnau ê ròng tơngklàs khăt gơboh gơlềng gơlàng rơpu, kơnrồ tàm brê ală hìu làng bol neh tàm tơngkah bal mờ gơ̆p lơh 35 nơm wàng ròng krơ̆ tơgròn phan ròng tơrgùm bal dùl anih nàng ƀươn tàm broă sền gàr mờ ătbồ.

Bi A Ka Riắc là dùl nă làng bol tàm ƀòn do pà gĭt, pah ngai, ală hìu làng bol tàm jàu gơ̆p sền gàr niam broă rơcăng lài sơndră jơgloh, sơndră mrềt ai mpồl rơpu, kơnrồ in. Bi A Ka Riắc, đơs: Ngai lơi hìu lơi lòt ròng den hìu hơ̆ toès ñhơ̆t bơh tàm mìr cèng rê tàm hìu nàng tơn siam rơpu kơnrồ in sa. Geh bal è rơpu kơnrồ kung bè hơ̆ sơl, ngai lơi hìu lơi lòt ròng rơpu kơnrồ den hìu hơ̆ chŏ wàs è rơpu kơnrồ dê, tŭ lơi wàng ròng kung sàng goh lơm ờ gŏ geh brih brơm. Căng glòm ndơ̆p jơh wàng ròng ờ gŏ ai càl in hềr mrềt tàm wàng, chu rơhe, lơ̆ nàng gàr ram ai rơpu kơnrồ in bĭc.

Là tiah sùm kong gơrềng uă ngan bơh nhơm trồ tiah mrềt geh uă tàm nhai mrềt, ală nam rềp ndo, kơnhoàl Kon Plông, càr Kon Tum sùm lơh pràn broă mblàng yal, hòi jà làng bol jơi bơtiàn dồ êt nă cau sền gròi tus broă rơcăng lài sơndră jơgloh, sơndră mrềt ai phan ròng in. Kơnờm tơrmù geh broă ê ròng tơngklàs khăt gơboh gơlềng gơlàng phan ròng tàm brê mờ tàm ù tiah kơnhoàl Kon Plông ờ gam tai jơnau rơpu, kơnrồ chơ̆t dùl ròt tàm ală dơ̆ mrềt noăt, mpồl phan ròng bơh kơnhoàl dê gơguh mhar ngan bal mờ kờp jơh tŭ do geh mờr 24 rbô nơm.

Ồng Võ Đình Tân, Phó Kwang ătbồ Cơldŭ Lơh broă sa sươn sre mờ Bơtàu tơnguh Ƀòn lơgar kơnhoàl Kon Plông, đơs: Nhai mrềt tus, càl khồm mrềt den làng bol kung neh gĭt sơl căng glòm ndơ̆p jơh wàng ròng. Bè phan tơn siam phan ròng in den làng bol kung gĭt sơl ngui rơhe tơnơ̆ tŭ toès kòi den lời prăp wơl nàng tơn siam rơpu kơnrồ in. Bơdìh hơ̆ tai gam gĭt tam ñhơ̆t, hơ̆ sồng tam tờm prìt ai rơpu kơnrồ in sa tai. Tŭ mờ trồ mrềt noăt den krơ̆ halà tơgròn rơpu kơnrồ tàm wàng. Uă ngan làng bol tŭ do gĭt ròng tề rê mờ trồ mang den lam rơpu kơnrồ rê mŭt tàm wàng, sùm lơh broă lơh sàng goh wàng ròng, ƀồm sơnơm tơn jơh khih ờs mờng pah dơ̆.