Đình Tuấn, cau lơh ƀăo anih jơnau đơs Việt Nam tàm Tây Nguyên neh geh dơ̆ lùp ồng Vũ Đức Côn, Phó Kwang atbồ Sở Nông nghiệp mờ Phát triển Nông thôn, mờ kung là Củ tịc Mpồl Sầu riêng càr Dăk Lăk bè bơta do, bal mờ ală broă lơh nàng tơmù bơta kơrlôi rơcang do bơh càr dê.

Ơ ồng Vũ Đức Côn, Phó Kwang atbồ Sở Nông nghiệp mờ Phát triển Nông thôn, mờ kung là Củ tịc Mpồl Sầu riêng càr Dăk Lăk, tus tŭ do càr Dăk Lăk neh tơn jơh kàl tơnhào plai sầu riêng nam 2023, ồng gơtùi pà git bơta tơngŏ tờm ngan bơh geh cồng nha bơh kàl tơnhào do dê là bè lơi?

Ồng Vũ Đức Côn: “Bơta tờm lài ngan là bă ù geh tơnhào gơguh 3 rơbô lồ. Priă tăc kung gơguh uă mờ khà plai tơnhào neh sơrlèt mờ 200 rơbô tấn. Dơ̆ bàr là làng bol lơh broă sa tam tờm sầu riêng geh tơnhào den geh cồng nha uă ngan, cồng nha geh uă rơlao mờ nùs nhơm kơ̆p gơn”.

Ơi, bè ồng neh đơs, nam do làng bol lơh broă sa geh cồng nha rơlao mờ nùs nhơm kơ̆p gơn, mơya sơlơ̆u wơl, ală mpồl lơh sa kă bro den gơtìp uă kal ke. Ơ ồng, bơta do là tài bơta lơi?

Ồng Vũ Đức Côn: “Di gơlan tài priă tăc gơguh den bơta lài ngan lơh gơbàn tus mờ broă tàm pơrlòng ờ ring bal, tàm pơrlòng blơi, tàm pơrlòng tăc…. Hơ̆ sồng tài lơh ngan kờñ sơgràm jơh tiah tam den geh uă mpồl lơh sa kă bro neh tơnguh priă blơi uă ngan. Dơ̆ bàr tai là geh uă cau tus bal tàm broă lơh sa kă bro tăc mờ blơi plai sầu riêng mờ lơgar ndai mờ ờ hềt git loh làng jơnau tơngit kung bè gơtìp ờ uă bơta bè git wă drà kă bro”.

Bè hơ̆, tàm broă bơrlŭ bal đah bơta ƀuơn mờ bơta kal ke bè hơ̆, den tàm nam sơnrờp lơh broă, Mpồl Sầu riêng càr Dăk Lăk neh geh gơrềng bè lơi tus gah phan do?

Ồng Vũ Đức Côn: “Mpồl mìng rơ̆p geh lơh bơh nhai 3 nam 2023 tus tŭ do, den tơnơ̆ mờ hơ̆ neh mŭt lơh ờ uă broă mờ geh gơrềng uă ngan tus mờ gah phan do. Bol añ kung neh bơyai lơh geh pơrjum tìp bal đah mpồl lơh sa kă bro blơi lơh phan mờ cau tam; bal mờ hơ̆ là đah anih lơh broă atbồ dà lơgar, anih lơh broă tờm. Bol añ neh ai uă ngan jơnau tơngit tơrgùm bal bè gah phan, ai geh ală jơnau kơlôi sơnơng bè gùng dà broă lơh, bơta ƀuơn, bơta kal ke gơwèt mờ gah phan sầu riêng càr Dăk Lăk dê”.

Ồng gơtùi yal lài bè lơi bè kàl tơnhào plai sầu riêng càr Dăk Lăk nam 2024 lah ờ? Geh ờ uă mpồl lơh sa kă bro đơs là, mìng ờ geh dùl thoa mờ khà plai sầu riêng càr Dăk Lăk dê geh tus nggùl tơlăk tấn, mờ mìng tàm rơlao 2 nhai, den càr Dăk Lăk geh rơcang lơh bè lơi ơ ồng?

Ồng Vũ Đức Côn: “Di gơlan càr Dăk Lăk ngan là càr geh khà gơguh uă ngan tàm ală càr tus bal mờ gah phan do. Mơya gơguh bơh càr Dăk Lăk dê kung gam ờ gơrềng uă tus mờ broă gơguh bơh gùt lơgar dê đơs is mờ ală lơgar tus bal gah phan sầu riêng đơs bal. Mờ loh làng là kung gơrềng mơya añ đơs là ờ hềt gơrềng uă tài broă kờñ bơh đah lơgar Lo kung gam uă. Bơdìh hơ̆ tai, he kung bơyai lơh wèt tus broă bơtàu tơnguh drà kă bro pa”.

Bè bơta pràn bơyai lơh gah phan do, tàm hơ̆ uă ngan là phan bơna logistics càr Dăk Lăk dê, tàm hơ̆ geh gơdờp bal mờ khà gam gơguh mhar ha là ờ ơ ồng?

Ồng Vũ Đức Côn: “Ngan bè hơ̆, do là broă pal kơlôi rơcang ngan. Sầu riêng bơh càr Dăk Lăk dê mìng rơ̆p bơtàu tơnguh 6 nam pa do. Ală broă pơgồp bal đah ală cau tam kung gam ờ hềt nền nòn, mờ đah ală cau tam mờ ală mpồl lơh sa kă bro blơi, lơh kung ờ hềt nền nòn. Bơdìh hơ̆ tai den ală hìu lơh bơh he dê kung ờ hềt bơtàu tơnguh sơl. Pơgăp mờ do tàm 2 nam den càr neh sền gŏ bơta phan sầu riêng là gah phan kwơ màng ngan gơwèt mờ càr dê den tàng Tỉñ ủy, Ủy ƀan neh đơng lam Sở Nông nghiệp mờ Phát triển Nông thôn bơtàu tơnguh dùl rơndăp broă bơtàu tơnguh bơta pràn bơh broă lơh do là, lài ngan là pal sền wơl jơh broă lơh, tàm hơ̆ geh bơh sơntìl tus mờ broă pơgồp bal lơh mờ dơ̆ pe là lơh pràn broă lơh nàng tăc mờ lơgar bơdìh mờ dơ̆ poan tai là ngui niam gơnoar bơh mpồl dê mờ anih lơh broă tờm bơh broă bơto pơlam, lam sồr, tơnơ̆ mờ hơ̆ den dan ală anih lơh broă lơh gơs ală khà măt phan kă bro nàng atbồ nền nòn rơlao”.

Ơi, dan ưn ngài ồng uă ngan!