Ơ ồng, lồi nam 2024, lơgar Lo neh tơwơl wơl ờ uă khà plai sầu riêng lơgar Việt Nam dê tài gơtòp Auramine O (phan rơmit O). Ồng đơs bè lơi bè broă do mờ Mpồl lơh sầu riêng càr Dăk Lăk neh geh ală broă lơh lơi nàng sền gàr bơngă pin dờn gah phan dê?

Ồng Vũ Đức Côn: “Lài mờ Satềp bol añ neh pơrjum pờ tơlik tàm internet mpồl duh broă mờ tus bal tơn là ală cau tờm tàm càr Dăk Lăk dê. Bol añ neh sồr anih lơh broă geh gơnoar tờm mà đah Tam phan mờ Sền gàr phan tam geh tus pơrjum bal. Tơnơ̆ mờ hơ̆ ring bal ờ uă tơngu me nàng geh jơnau sồr. Dùl là, bơta mùl màl blăc pơrlồm màh sồ tiah tam mờ hìu dăp phan. Dơ̆ bàr là cadimin mờ rơmit O, jơnkah phan kră gam là bơta, broă lơh lơi kung pal lơh glài. Dơ̆ pe, tơnguh broă sền gròi bơta bơkah. Đah lơgar Việt Nam he dờp, mờ đah lơgar blơi cau dờp mờ ală broă lơh pal là anih lơh broă geh gơnoar tờm mờ dà lơgar pal geh broă gàr niam”.

Ơi, tềng đăp mờ ală jơnau sồr sền nàng git ngai sơlơ kal ke ir bơh drà blơi phan, bè hơ̆ jăt ồng, bơta lơi là ală gùng dà broă lơh kwơ màng nàng gàr niam plai sầu riêng càr Dăk Lăk đơs is mờ plai sầu riêng lơgar Việt Nam đơs bal gàr kơl jăp bơta pràn tăc mờ lơgar bơdìh?

Ồng Vũ Đức Côn: “Gùng dà broă lơh geh cồng nha ngan kung gam là pal lơh pràn broă ai màh sồ tiah tam mờ màh sồ hìu dăp phan. Bơta tờm tŭ do là khà ai ờ uă ngan pơn drờm mờ mùl màl khà geh lơh, den tàng kal ke ngan kờñ pleh mờ jơnau tàm bơrlŭ bal sùm. Dùl đah tai là pal sền bơta bơkah nàng tŭ bơta bơkah phan geh lơh bal mờ ală jơnau kờñ bè sền gròi kòp tàm phan tam mờ broă jơnkah ờ uă rơlao den jơnau pơrlồm rơ̆p ờ gam kơlơi rơcang tai. Dơ̆ bàr là cadimin mờ phan rơmit O, jơnkah phan kră bŭ lah tàm bơta lơi kung pal lơh glài. Anih lơh broă dà lơgar pal lơh loh broă do neh tus tàm bơta lơi, tŭ lơi, ală phan lơi geh ngui mờ ngui kàr lơi nàng lam den rơ̆p gơmù rơhời. tàm tŭ he ờ hềt geh bơsong mhar broă ai màh sồ den pal lơh lài bàr broă do. Dơ̆ pe, broă tăc geh uă ngan tàm bơta bơh ală ƀộ, gah lơh broă dà lơgar dê tài gơrềng tus mờ lơgar blơi. Mơya càr kung pal lơh ngan rơlao tai nàng ai tơngŏ bơngă bơh dùl càr geh khà uă ngan, bè hơ̆ bal mờ kung ờ gơtùi kơ̆p bơta bal sơl”.

Ơi, tàm mùl màl tŭ do, khà lơh jăt nền nòn jơnau pal jăt bè sền nàng git bơta bơkah bơh ală mpồl lơh sa kă bro tăc plai sầu riêng mờ lơgar bơdìh bè lơi ơ ồng?

Ồng Vũ Đức Côn: “Añ kung neh git jơnau yal bơh ală mpồl lơh sa kă bro tus bal tàm mpồl. ală mpồl lơh sa kă bro tus bal tàm mpồl dê kung neh git ală jơnau do sơl bơh jŏ bloh mờ tàm jơh broă lơh, cau neh rơcang git jơnau yal bơyai lơh ală broă lơh geh kwơ mờ ờ pal tus tŭ do, mờ cau neh rơcang uă bloh nàng gơdờp mờ bơta tơnguh nền nòn bơh đah lơgar blơi phan dê”.

Broă lơh ală anih sền nàng git bơta bơkah tơn tàm càr Dăk Lăk geh sền là gùng dà broă lơh nàng dong kờl mpồl lơh sa kă bro rơcang rơlao tai tàm broă di pal mờ jơnau kờñ tăc phan mờ lơgar bơdìh dê. Kung geh ờ uă mpồl lơh sa kă bro dan gùt mpồl bơtiàn lơh bal broă do. Ồng geh jơnau đơs lơi bè bơta do mờ Mpồl geh jơnau dan lơi mờ anih lơh broă geh gơnoar?

Ồng Vũ Đức Côn: “Hơ̆ là jơnau kơ̆p kờñ bơh jŏ ngan bloh, neh geh ală jơnau dan di pal bơh anih lơh broă geh gơnoar tờm bal mờ gơnoar atbồ. Mơya nàng geh lơh jăt mhar, lơh uă rơlao den pal geh gùng dà broă lơh bơh anih lơh broă dà lơgar, bơh ală ƀộ, gùt mpồl bơtiàn tus bal, lam lơh. Ờ gŏ di hìu dăp phan, hìu măi lơh gơs phan neh geh gùng dà broă lơh. Mơya bơta do pal geh lam lơh, geh tŭ pal dong kờl cau geh uă bơta nàng lơh mhar. Lơh bè lơi jơh gùt gah phan, geh bal bơta niam ndrờm sền gròi mờ ndrờm bơsong bơta do den gah phan sầu riêng he dê hơ̆ sồng rơ̆p bơtàu tơnguh kơ̆ kơl jăp”.

Ơ, dan ưn ngài ồng!

Cau mblàng mờ sền: Ndong Brawl/Cau cih Hương Lý (VOV Tây Nguyên)