Tus tŭ do, đah lơgar Lo, dà lơgar blơi sầu riêng uă ngan rlau jơh lơgar Việt Nam dê neh pà mờr 1 rbô 400 màh tiah tam mờ 188 màh anih ơn ai ală tiah tam sầu riêng tàm jơh gùt lơgar in. Jăt mò Ngô Tường Vy, Kwang Lam bồ Kông ty Bơcri priă bal Tập đoàn Tăc mờ Blơi plai chi Chánh Thu, broă geh pà tai màh sồ tiah tam tàm nhai 05 do tơn là tềl sơñio niam ngan ai tăc sầu riêng mờ lơgar ndai in tơnơ̆ ală nhai tìp kal ke. Bulah bè hơ̆, nàng lơh niam bơta ƀươn do, kờñ ngan geh bơta bơto pơlam mờ sok sền kràñ rlau broă ngui phơng sih, sơnơm sền gàr phan tam nàng kờñ lơh geh bơta niam sàng goh phan sa. Mò Ngô Tường Vy geh jơnau dan bè do: “Gơnoar broă ƀòn lơgar dê rơ̆p pal rềp rlau, is ồn là pal kờp sền nền wơl bơta lơh gơlik, lơh bè lơi nàng gàr niam sàng goh phan sa. Bơta do ờ di mìng cau lơgar Lo khi sền gròi lơm ờ, mờ cau lơgar Việt Nam bol he kung sền gròi ngan sơl tus bơta do. Añ sơning là gơ wèt mờ tiah tam phan, bơdìh mờ broă bol he lam lơh nàng cau lơh broă sa in gĭt geh broă pơlam lơh di den bol he kung pal rềp mềl mờ ală anih tăc phơng sih, sơnơm sền gàr phan tam nàng kờp sền nền wơl, sền swì kràñ rlau broă do”.

Jăt ồng Phan Việt Hà, Lam bồ phó Anih kơlôi sơnơng Jak chài măy mŏk Broă lơh sa sươn sre brê bơnơm Tây Nguyên, broă ờ hềt lơh geh ală jơnau sồr bơta niam sầu riêng gam lơh cau lơh broă sa kwi kwơ tàm lơh gơlik. Do là dùl tàm ală jơnau tờm gơlam tus lơh tìs sền swì kòp phan tam mờ niam sàng goh phan sa. Ồng Phan Việt Hà, đơs là: neh tus tŭ kờñ lơh ală jơnau sồr bơta chài ai sầu riêng in jăt tơl tiah mờ tam gơl mờng kwèng tam phan bơh cau lơh broă sa sươn sre dê: “Sầu riêng tàm tơl tiah rơ̆p geh bơta kis dờng krơi is mờ bè hơ̆ dilah bè geh dùl jơnau sồr pal jăt ngan ngồn den kal ke ngan nàng lơh geh broă jàu hơ̆. Añ sơning là, mờr tus, jăt tàm bơta sền swì bơta geh is, lơh sa- mpồl bơtiàn mờ tam phan bơh tơl tiah dê, den bol he rơ̆p geh ală jơnau sồr pal jăt bal mờ tàm hơ̆ rơ̆p geh ală bơnah tam pà jăt tơl kơnhoàl ù tiah krơi is, bal mờ jơnau kờñ dờng ngan rlau jơh là geh phan bơna ndrờm bal ai jơh Việt Nam in”.

Tơnơ̆ jơnau bơsram gơkòl tăc mờ lơgar ndai tàm gùl nam 2025 tài pin gam jơngkah sơnơm Rơmĭt Ô mờ Cadimi, uă jơnau dan đơs là, kờñ ngan pal lơh cơldŭ sền swì gĭt nền sầu riêng tàm ală tiah tờm tam sầu riêng. Ồng Trần Minh Châu, ala măt Kông ty Kơnòl geh gơnoar nă să is Sền swì ngan ngồn bơta niam Vinacontrol, pà gĭt kông ty neh geh broă rơndăp lơh ai broă do in. Tềng đăp măt, rơ̆p lơh ală cơldŭ lòng lơh gùt dar nàng drơng jơnau kờñ tăc mờ lơgar ndai kàl sầu riêng mờr tus bơh Tây Nguyên dê: “Dilah lơh pa dùl cơldŭ lòng lơh pa digơlan gơ sồr tơngume adăt boh lam kung bè tŭ jiơ jŏ rlau, mơya dilah lơh dùl nơm cơldŭ lòng lơh gùt dar, dilah Ƀộ trưởng kràñ cê jơh nùs kung bè geh bơta dong kờl bơh ƀộ, gah ƀòn lơgar dê den bol hi gơn kơnờm digơlan lơh gơs gờñ rlau nàng drơng ai kàl sầu riêng mờr tus tơn in tàm Dăk Lăk”.  

Tàm pơrjum, ală cau ala măt kung geh jơnau đơs dan kờp sền nền wơl, tam gơl, bơtơl, lơh sir ală jơnau sồr bè ătbồ, ngui màh sồ tiah tam, anih ơn klơm, pal loh làng, song dơ pă, gơtùi lơh jăt ngan ngồn, ring bal, dipal mờ bơta ờs mờng ală lơgar dê mờ bơta geh mùl màl lơgar Việt Nam dê. Mơkung lơh pràn kơlôi sơnơng, tàm jàu, đòm jăt ngui măy mŏk pa, tam gơl sồ tàm lơh gơlik, lơh gơs phan, tăc geh, ătbồ bơta niam mờ jòi gĭt anih tờm lơh sầu riêng, ngan là ală broă lơh bơsong tơnơ̆ tơnhàu, sền gàr ơn prăp mrềt, lơh gơs phan niam nàng tơngguh uă bơta niam, bơta kwơ gơguh tai mờ jơnau tơl pràn tàm pơrlòng phan bơna dê.

Tơnơ̆ tŭ iăt kơno ală jơnau đơs jơnau dan, Ƀộ trưởng Ƀộ Broă lơh sa sươn sre mờ Tiah ơm kis ồng Đỗ Đức Duy đơs sùm: pal gĭt nền sầu riêng là phan bơna kwơmàng dà lơgar dê nàng geh bơta bơcri priă dipal: “Bơtàu tơngguh gah phan sầu riêng ờ mìng là tŭ niam bơtàu tơngguh lơh sa lơm mờ gam là kơnòl mờ bơngă pin dờn phan lơh geh bơh sươn sre dà lơgar dê. Añ sồr ală ƀòn lơgar, mpồl lơh sa kă bro, mpồl lơh broă bal mờ làng bol hơ bal tam gơl bơh gĭt wă tus lơh broă ngan ngồn nàng bơ̆t bơtàu gah phan sầu riêng Việt Nam gơgơs rùp lơh krơh lài bơh phan lơh geh bơh sươn sre niam uă dê, geh anih lơh gơlik song dơ pă loh làng, geh kơnòl mờ kơ̆ kơl jăp”.