Hìu bơnhă ồng Y Thêm ơm tàm xã Ea Kpam, kơnhoàl Cư M’Gar, càr Dăk Lăk gam ròng 16 nơm kơnrồ. Jăt bơhiàn mờng kwèng lài do, mpồl kơnrồ sùm geh ròng tơngklàs lềng jòi sa is ñhơ̆t. Mơya tơngai rềp ndo, tài bơh ƀlàng ñhơ̆t ờ gam uă tai den tàng làng bol pal drim bè ồng Y Thêm rơ̆p lam tai mpồl kơnrồ lòt tus hờ tiah geh ƀlàng ñhơ̆t ơnàng nàng ròng tơngklàs, mho lam rê tơmŭt nggròn tàm wàng. Tơngai lơi ờ huan geh uă ñhơ̆t tàm ƀlàng, hìu bơnhă ồng ngui ñhơ̆t tam mờ blơi tai đah bơdìh rê tơn siam ai mpồl kơnrồ in sa bơtơl tai. Ồng Y Thêm pà gĭt, bơh tŭ lơh wàng, mpồl kơnrồ geh ròng geh rơndăp tăp sèng ngan, è đồm di anih, tiah ơm kis sàng goh, ờ huan lơh gơbàn ƀơ̆ ƀơ̆l tiah ơm kis. Ồng Y Thêm, đơs: Rơpu, kơnrồ ntrờn tơmŭt tàm do den gŏ hìu đam sàng goh ờ ƀô ƀơ̆. Lài do, năc yàng lòt ñô bau gŏ è rơpu è kơnrồ ờ khin ngan sền. Tŭ do mŭt tàm do niam rlau ờ gŏ geh ƀô ƀơ̆ ƀô ồm lơi tai.

Ồng Phạm Doãn Thắng, kwang bàng lơh sơnơm phan ròng xã Ea Kpam, kơnhoàl Cư M’Gar, càr Dăk Lăk pà gĭt, lài do tàm xã uă ngan làng bol geh bơta mờng kwèng ròng phan puan jơng jăt broă lơh ròng tơngklàs lềng khăt gơboh, mang rê kơ̆t tềng jrong rồm hìu rơng. Broă do lơh gơlik bơta ƀô ƀơ̆ ngan, roh bơta sàng goh, gơrềng tus pràn kơldang să jan. Bal mờ hơ̆, pah tŭ geh kòp bơtờp tàm phan puan jơng kung kal ke gròi sền sơl. Ngan tài bè hơ̆, gơnoar ătbồ xã, ală gah lơh broă tàm xã neh mblàng yal, hòi jà làng bol nàng làng bol in lơh wàng ròng, kơ̆ kơl jăp ròng phan. Ồng Phạm Doãn Thắng, đơs: Kâp mpồl cau mblàng yal mờ kâp gơnoar ătbồ tiah do neh dong kờl bàr pe hìu lơh wàng ròng. Bàr pe nam do mpồl ơruh pơnu dong kờl lơh wàng ròng. Tŭ do, mpồl kơnrồ ròng tơngklàs lềng dồ êt rao, tŭ do là ròng tơngklàs lềng nggùl tơmời gời. Khi rơcăng lài phan sa ơn prăp tàm kàl mìu.

Jăt ồng Nguyễn Quang Đức, Kwang ătbồ Anih Ròng phan mờ Lơh sơnơm phan ròng kơnhoàl Cư M’Gar, càr Dăk Lăk dê yal, jơh gùt kơnhoàl tŭ do geh rlau 14 rbô nơm kơnrồ. Tàm hơ̆, mìng geh dồ anih ròng siam kơnrồ tơrgùm bal mờ khà rlau 100 nơm, gam wơl là rah rài tàm ală hìu làng bol. Tơnơ̆ uă nam kơ̆ nùs mblàng yal, hòi jà, tŭ do làng bol neh chài broă ròng siam jak chài rlau, cèng wơl cồng nha bè uă bơta rlau. Ồng Nguyễn Quang Đức, đơs: Bơh broă ròng siam mờ wàng ròng bè hơ̆ den broă bơsong kòp bơtờp, cau ròng phan neh ătbồ niam mpồl phan ròng rao. Đah gah lơh sơnơm phan ròng rơ̆p ătbồ cĭt rơcăng lài geh niam rlau mờ dà lơgar ătbồ geh jơh ală mpồl phan ròng bè đah ròng siam phan ròng niam rlau.

Dăk Lăk tŭ do geh kờp jơh mpồl rơpu, kơnrồ pơgăp 280 rbô nơm. Tơnơ̆ uă nam geh mblàng yal, hòi jà, làng bol neh tam gơl bơhiàn mờng kwèng, bơsram gơ̆p nàng tam gơl bơh ròng tơngklàs lềng phan puan jơng tus ròng krơ̆ ròng nggròn halà krơ̆ nggròn nggùl tơmời. Den tàng bè hơ̆, bal mờ bơsong geh broă phan sa, tiah ơm kis, rơcăng lài kòp den cồng nha mpồl phan ròng kung ngai sơlơ geh tơngguh tai, cèng wơl priă jền lơh sa uă rlau ai cau ròng phan in.