Anih lơh kơnrồ ro Huy Vũ Đăk Đoa (càr Gia Lai) sùm ờ ru ngan mờ broă ơn klơm tàm kơldung nàng pơyua sră dan blơi phan lòt ngài tàm jơh gùt lơgar. Rềp tềng anih ơn klơm, bi Nguyễn Thị Diễm Kiều – cau tờm anih do ơn dùl nơm kơƀàng dềt, dùl prèng kơnrồ ro, bàr pe kơldung phan bơna mờ dùl nơm điện thoại tàm phan đơ nàng livestream tăc phan. Bi Kiều yal: 3 nam lài, bulah phan bơna kơnrồ ro he dê neh geh cơng tàng OCOP 4 sơrmañ kâp càr, mơya kung gam kal ke sơl tàm pơrlòng mờ ală phan bơna gơlềng gơlàng tàm drà. Geh phan bơna, giă blơi mìng ờ hềt tus 100 rbô đong dùl kĭ. Tàm bơta hơ̆, tam gơl sồ, ai phan bơna tăc tàm ală drà kă bro phan điện tử neh dong bi lơh tam gơl wơl bơta kal ke. Bi Nguyễn Thị Diễm Kiều pà gĭt, geh tơngai lơh geh priă kă bro 1 tơmàn đong dùl nhai mờ neh geh ală sră dan blơi phan tăc tus drà lơgar Singapore.

"Mùl màl, đah tăc rah rài mìng gơguh tai bơh 10 tus 15%, mơya cồng nha lơh geh là geh ală sră dan blơi phan uă ngan mờ phan dờng ngan. Khà cau lơh broă bal git tus bol hi bơh ală anih tàm internet geh tus khà uă ngan. Broă tam gơl sồ bè do neh dong kờl kông ty uă ngan. Tŭ jơnau bè ală broă lơh gơlik phan bơna geh lơh gơrề uă, tơl nă cau gĭt mờ wă loh jơnau bơh tài mờ giă gơgơs phan tăc jơnhoa; năc blơi phan tŭ do kung ngăc ngar ngan. Ală kông ty sền gròi tus bơta niam neh kĭ hơ sră pơrgon mờ bol hi uă ngan”.

Tàm Kông ty Pơgồp bal priă Broă lơh sa sươn sre AgriS Gia Lai (sơnah ƀòn Ayun Pa, càr Gia Lai), tam gơl sồ neh geh lam lơh ndrờm bal mờ lơh jơh tàm ătbồ tiah tam tàu. Jăt mò Trần Thị Lê – Phó Kwang Lam bồ Duh broă sùm Kông ty, broă ngui măy mŏk sồ dong mpồl lơh sa kă bro bơsong geh cồng nha ală jơnau kal ke bè ătbồ priă tă lơh, bơcri priă di broă di tŭ, mơkung song dơ pă loh làng jơh ală broă lam lơh broă. Is ồn, tàm broă tơnhàu, ală sră wăc rùp sồ ai gơnoar gĭt nền loh cau tờm geh ngui tơl bă tàu, pleh tàm hŭi đah ală hìu tam, jăt nền broă rơndăp lơh tơnhàu mờ lơh geh cồng nha uă ngan rlau jơh bơh hìu măy dê.

Ờ mìng ơm wơl tàm ală cồng nha bơh chờm lơm, AgriS Gia Lai pơn jăt tai rề ơnàng tam gơl sồ bơh ală broă lơh Demo Farm (anih lơh sa sươn dờng geh bơ̆t bơtàu nàng “lơh lài”). Mpồl lơh sa kă bro ai ală jơnau yal tơnggĭt dờng bơh sră wăc rùp ù, ală jơnau yal tơnggĭt trồ tiah nàng geh jơnau bơto sồr di tŭ ai làng bol lơh broă sa in bè tơngai kàl, bơta chài tam phan mờ broă lơh bơsong rơcăng kơryan tu kòp. Broă lơh loh làng bơcri priă jăt bơta ù tiah mờ nhơm trồ tiah bơh tơl tiah dê ờ mìng tơngguh uă cồng nha lơh tàu mờ gam wèt tus bơ̆t bơtàu broă lơh sa sươn sre ngăc ngar, kơnhăp jŏ, pơgồp bơnah dong cau lơh broă sa kơ̆ kơl jăp broă lơh broă sa. Mò Trần Thị Lê pà gĭt: “Bè ngui măy mŏk sồ, tŭ do kông ty lơh jăt ătbồ jăt tơl bă. Bol he ndrờm tô was mờ cih ală jơnau yal tềng sră wăc rùp MapInfo. Broă ătbồ nền cê tơl bă ù pơgồp bal mờ phan ngui ătbồ rơndeh jun pơndiang TMS dong gàr niam tơnhàu di bă ù, mờ di bơta ơnàng. Khà tàu tơnơ̆ tŭ tơnhàu geh jun rê hờ hìu măy tàm pơgăp 24 jiơ, gàr niam làng bol lơh broă sa in ờ gơtìp hoàc hươr tàu”.

Tam gơl sồ gam lơh gơlik geh ală tam gơl mpờl gŏ loh ngan tàm broă lơh sa sươn sre Gia Lai dê. Jơh gùt càr neh geh pà 308 màh sồ tiah tam mờ kờp jơh bă ù ơnàng rlau 10 rbô 700 lồ, tàm hơ̆ geh 255 màh sồ tiah tam drơng broă tăc mờ lơgar ndai (rlau 10 rbô 240 lồ) mờ 53 màh sồ tiah tam tàm dơlam is lơgar, lơh geh jơnau sồr bơta chài bơh ală drà Ñờk, Hàn Quốc, Lo mờ câu Âu. Tàm broă tăc phan, ngai sơlơ geh uă cau lơh broă sa, mpồl lơh broă bal mờ mpồl lơh sa kă bro rơcăng lài ai phan lơh geh bơh sươn sre tăc tàm ală drà kă bro phan điện tử, tăc tơn mờ cau ngui sa. Nam 2025, sơñio khà kă bro phan điện tử Gia Lai dê gơh 9 kơnă, rơndăp dơ̆ 37 tàm 63 càr mờ ƀòn dờng. Mò Nguyễn Thị Bích Thu, Kwang Lam bồ Anih tờm Dong kờl bơto pơlam lơh sa mờ măy mŏk mờ Hòi jà Kă bro phan (Sờh Lơh sa mờ măy mŏk mờ Kă bro phan Gia Lai) pà gĭt, ală phan bơna tam gơl sồ là mpồl phan bơna ƀươn tăc mờ cau ngui sa ngan rlau jơh tàm bơta mờng kwèng blơi prăp phan tàm drà kă bro phan điện tử.

"Dilah đơs bè ală phan bơna tam gơl sồ mpờl gŏ loh ngan, hơ̆ ngan là ală bơta phan lơh geh bơh sươn sre goh geh lơh gơlik jăt ală anih lơh gơlik phan. Bơh broă tam tus tơnhàu mờ lơh gơlik is jơh ală broă, geh anih tờm lơh loh làng, geh sơñio yal ù tiah mờ ală cơng tàng kờñ pal geh. Ală phan bơna do tŭ do gam tăc mờ cau ngui sa uă ngan rlau jơh. Bè đah anih tờm bol hi, rơ̆p geh ală broă lơh dong kờl, lòt bal mờ ală broă lơh yal oă, nàng dong mpồl lơh sa kă bro bơtàu tơngguh rlau”.

Jơnau lơh nền tàm pơrjum bơh Pơrjum dờng Đảng ƀộ càr Gia Lai dơ̆ sơnrờp, tơngai lơh broă bơh nam 2025 – 2030 gĭt nền tam gơl sồ là broă lơh bơsong tam gơl pràn tàm bơtàu tơngguh jak chài – măy mŏk, tam gơl pa bơceh lơh mờ lơh sa sồ, pơgồp bal kơ̆ mờ rơndăp tăp sèng wơl gah broă lơh sa sươn sre mờ tơngguh uă pràn jak tàm pơrlòng. Pơlam gùng do rơ̆p pơn jăt tai là jrum sơñio gùng nàng tam gơl sồ geh lam lơh ndrờm bal, jrô ơnàng rlau, pờ gùng ai phan lơh geh bơh sươn sre Gia Lai dê in cơnđoà tus drà pa mờ bơta niam, ală jơnau yal tơnggĭt mờ bơta kwơ kơnhăp jŏ.