Mìu den ngơr bam dà, trồ tơngai den ro kơnrañ, ù tiah Ea Ñuôl, kơnhoàl Buôn Đôn, càr Dăk Lăk kal ke rề ơnàng bă ù tam uă ală chi tam jŏ ngai. Jòi gùng lòt lơh pas tàm bă ù tờm ƀòn dê, mpồl cau bơyô kơnòm să tàm xã Ea Ñuôl neh khin tam tờm ño mẫu đơn, lơh ală bơta ờ niam bơh trồ tiah, ù tiah dê gơgơs bơta pràn tàm lơh gơlik phan bơh sươn sre. Bi Võ Hoài Ân, kwang bàng drơng broă bơta chài sươn plai ño pà gĭt: Nam 2021, den sơnđờm tam tơrlòng bàr pe tờm chi ño gŏ gơdờp kis dờng niam. Tơnơ̆ hơ̆, ai tai bàr pe sơntìl pa cèng rê tam gŏ kung gơdờp sơl. Tài bơh nhơm trồ tiah ờ ndrờm bal đah ngai mờ mang tàm tiah Buôn Đôn, kàl mrềt prang lin rlau 10 độ C rơ̆p lơh plai ño thồm rlau, bơkah lơngồt rlau”.

Bơh broă lơh tơrlòng lài bơh sơnrờp, tus tŭ do, tàm bă ù ơnàng 1 lồ 8, 10 rbô tờm ño neh gơ ai sa. Bi Nguyễn Quốc Lập, dùl tàm ală cau pơgồp priă, pơgồp să bơcri tàm sươn ño pà gĭt, sơrlèt uă bơta kal ke tàm broă lơh niam wơl ù, bơcri priă lơh ală hìu glòm, ngui jak chài măy mŏk den tơnơ̆ rlau 03 nam, sươn ño neh gơ ai plai kờp bal 10 tấn pah nam. Giă tăc 400 rbô đong dồ kĭ, mơya sră dan blơi phan uă, geh tơngai sươn ờ geh plai ño nàng tăc. Jăt bi Nguyễn Quốc Lập đơs, gùng dà rề ơnàng tam uă ai tờm plai ño mẫu đơn do in kung gam pờ ơnàng sơl. Bi Nguyễn Quốc Lập, đơs: Dilah bè jơh ală bơta ƀươn mờ cau lơh broă sa tàm do dờp dong kờl bal, pơnđơl bal mờ he den he kung kơ̆p kờñ sơl do là tiah mờng tam tờm ño mẫu đơn ai càr he dê in.

Mpồl cau bơyô kơnòm să neh ngui jơh bơta ƀươn bè mblàng yal jơnau tàm gah internet mpồl bơtiàn, yal tơnggĭt broă lơh tơrlòng lài tam tờm ño mẫu đơn bơh he dê ai uă cau in gĭt tus. Tàm tơngai tơnhàu, gĭt nđờ rhiang àr ño song ngan, tơlir niam, rà plai neh gơhòi gơ jà gal ngan năc lòt nhơl. Bi Nguyễn Thị Thu Hằng, geh jơnau đơs bè do: Oh lòt neh uă ngan tiah rao, bơh sươn plai zơu Dà Làc dê, sươn ño Ninh Thuận tŭ rê hờ ƀòn lơgar he dê geh sươn ño bè hơ̆ oh gŏ gơlơh kờñ ngan. Kơ̆p kờñ là ƀòn lơgar he dê geh tai ală sươn ño bè do nàng bơtàu tơngguh lơh sa kung bè là tiah lòt nhơl ai năc in.

Mò Đinh Thúy Lăng, Phó Củ tịc Anih duh broă Làng bol xã Ea Ñuôl, kơnhoàl Buôn Đôn, càr Dăk Lăk pà gĭt, bơh cồng nha lơh geh bơh sơnrờp bơh broă lơh tơrlòng lài tam tờm ño mẫu đơn neh pờ tơlik ală gùng lòt pa ai cau lơh broă sa ƀòn lơgar in. Mò Đinh Thúy Lăng, đơs: Broă lơh tơrlòng lài do cèng uă bơta kwơ. Lài ngan là bơta tam gơl tàm rơndăp tăp sèng chi tam, sơntìl chi tam pa gơdờp ngan mờ ù tiah xã Ea Ñuôl. Bal mờ hơ̆, geh gùng dà bơtàu tơngguh bè lòt nhơl broă lơh sa sươn sre. Dùl gùng dà bơtàu tơngguh gam là pơlam gùng bơh kơnhoàl dê. Bè đah ƀòn lơgar den bol hi kung rơ̆p kơlôi sơnơng rơ̆p yal tơnggĭt broă lơh tơrlòng lài do tus mờ làng bol lơh broă sa sươn sre in tàm ù tiah xã dê nàng uă cau geh gĭt mờ broă lơh tơrlòng lài do. Gùng dà ai ƀòn lơgar in bơtàu tơngguh broă lơh sa sươn sre, tam gơl rơndăp tăp sèng chi tam geh cồng nha rlau.