Tàm bă suơn tam tào hòn gơs niam tàm kơnhoàl Kông Chro, càr Gia Lai, kàl lơh sa do geh uă ngan rơndeh tàm tơrbŏ bal pơn diang tào cèng rê tus hìu măi in. Bơta “geh tơnhào tăc ờ geh priă” neh ờ gam geh tai, ala tàm hơ̆, priă tăc tào kơl jăp mờ broă tăc geh gàr niam sùm.

Ồng Nguyễn Hữu Phúc, dùl nă cau lơh broă sa suơn sre kis tàm ƀòn Brò, sàh An Trung, kơnhoàl Kông Chro tàm ală nam do sùm tam di pơgăp 30 lồ ù tam tào. Ồng pà git, tào neh cèng geh priă uă rơlao ngan pơn drờm mờ ală bơta phan tam pah nam ndai dê, tàm tiah do: “Tam gơl tam tào den cèng geh uă priă rơlao mờ ală bơta phan tam ndai. Tàm 1 lồ ù tam tào geh jơnkah bơh 30 tus 40 tơlăk đong tàm 1 lồ ù. Lơh tơrlòng bă suơn dờng ơnàng den măi mok tus koh tào den priă geh uă rơlao, priă tă lơh broă gơmù”.

Kung ndrờm bè ồng Phúc dê sơl, uă làng bol lơh broă sa suơn sre ndai kis tàm tiah đah măt tơngai lik càr Gia Lai dê kung gam dờp geh bơta kwơ bơh tờm tào dê. Hìu ồng Lê Việt Công, kis tàm sàh Kông Lơng Khơng, kơnhoàl Kbang geh 10 lồ ù tam tào, tơnhào geh mờr 800 tấn tàm kàl do. Kàl lơh sa do, ồng neh tơnhào geh 70% khà bă ù.

Ồng Công đơs niam tòm tào tài kơl jăp tàm broă tăc, geh ală hìu măi blơi jơh lài den tàng iang nùs ngan lơh sa uă. “Tŭ do tàm do bơdìh mờ tờm tào den ờ gam geh phan tam lơi ndai tai lơh tờm, rơcang lài bè tờm tào dê, jăt khà priă tăc do den làng bol neh kờñ tàm broă tam tào, geh hìu măi blơi lài phan geh lơh mờ he kơnờm mờ măi mok lơh tàm bă suơn den tàng làng bol lơh broă sa lơh geh uă”.

Pơgồp bal tàm cồng nha bơh gah lơh tào sơdàng tàm tiah đah măt tơngai lik càr Gia Lai dê, bal mờ broă lơh ngan bơh làng bol lơh broă sa suơn sre là broă bơcri priă di pal bơh mpồl lơh sa kă bro bal mờ ai tơl bơta niam bơh gơnoar atbồ dê tai. Ală broă lơh tơrgùm ù tiah lơh dờng, bơ̆t bơtàu bă ù suơn dờng mờ ngui măi mok tàm lơh broă neh geh lơh pràn kơl dang.

Ồng Lê Thanh Sơn, Phó Củ tịc Anih duh broă Làng bol kơnhoàl Kbang pà git, gùt kơnhoàl tŭ do geh rơlao 10 rơbô 400 lồ ù tam tào, tàm hơ̆ rơlao 3 rơbô lồ ù neh geh ngui măi mok lơh broă, dong kờl tềm pềr priă tă tàm broă lơh sa, tơnguh cồng nha lơh broă. “Kơnhoàl kung neh lơh jăt uă broă lơh, rơndăp broă lơh bal mờ pơgồp bal mờ Hìu măi sơdàng An Khê bơyai lam lơh, mblàng yal mờ làng bol lơh broă sa suơn sre bơyai ngui ală bơta phan gơguh jăk bơh măi mok pa dê, ngui măi mok tàm broă lơh sa, bơh broă lơ-òr ù, tam mờ sền gàr tus mờ broă tơnhào tào, den tàng tềm pềr uă ngan priă tă nàng tơnguh uă rài kis, tơnguh priă geh ai làng bol in nàng pơgồp bal tàm broă tơn jơh jơgloh tơrmù rơƀah”.

Kàl tơnhào tào nam 2024-2025 tàm bă ù tam tào tàm tiah đah măt tơngai lik càr Gia Lai geh rơlao 31 rơbô 500 lồ ù, kờp jơh khà geh tus 2 tơlăk 400 rơbô tấn. Ồng Nguyễn Hoàng Phước, Phó lam bồ Hìu măi sơdàng An Khê, ƀòn drà dờng An Khê pà git, broă dong kờl bơh Cíñ phủ neh dong kờl gah lơh tào sơdàng bơtàu tơnguh kơl jăp tàm uă nam do. 

“Bơh nam 2020 tus tŭ do, Cíñ phủ neh ai geh ală jơnau lơh nền bè tam dră mờ tăc ờ di priă, tam dră mờ kă bro blơ̆ blăc sơdàng neh dong kờl priă sơdàng tàm lơgar sùm gơguh uă bơh nam 2020 tus tŭ do. Priă tăc tào geh tàm khà 1 tơlăk 100 rơbô đong tàm 1 tấn, bơta tào 10 khà sơdàng geh tàm suơn. Do là dơ̆ niam uă ngan dong kờl làng bol lơh broă sa suơn sre lơh geh cồng nha mờ bơh tŭ hơ̆ ngui gùng dà broă lơh pa, chài tàm 4 kơnhoàl đah măt tơngai lik càr Gia Lai in geh nùs nhơm pin dờn uă ngan tàm broă bơtàu tơnguh tào, tam gơl phan tam ờ geh cồng nha nàng tam tào”.

Ală bă ù tam tào gam hòn gơs niam, gam pơn jăt tai ai geh bơta tam gơl tàm ală tiah tàm tiah đah măt tơngai lik càr Gia Lai dê. Mờ broă lòt bal mờ mpồl lơh sa kă bro, gơnoar atbồ bal mờ làng bol dê, broă lơh bă ù tam tào dờng ơnàng tàm do gam pơn jăt tai geh lơh pràn nàng ai geh dùl bă tiah tam tào geh ngui măi mok tơl ală broă lơh. Bơh tŭ hơ̆, lơh sa mpồl bơtiàn ală tiah dê ngai sơlơ bơtàu tơnguh kơ̆ kơl jăp.