Rlau dùl poh do, bi Nguyễn Thị Chuyên ơm tàm sàh Ea Tiêu, kơnhoàl Cư Kuiñ, càr Dăk Lăk gam tơrgùm tơnhàu tiêu. Mờ rlau 300 tờm tiêu gam tàm tơngai gơ ai sa, kàl do, bi rơ̆p lơh geh rlau 1 tấn 3 tạ gar tiêu ro. Bi pà gĭt, cồng nha lơh geh gơmù rlau mờ kàl lài tài bơh trồ tiah ờ ƀươn, giă blơi phan bơcri, cau lơh broă apah kung gơguh sơl mơya mờ giă tiêu bè tŭ do gam ơm tàm khà 160 rbô đong dùl kĭ, den cau lơh broă sa kung gam geh cồng sơl. Bi rơcăng rơ̆p pơn jăt tai bơcri tai sươn chi uă rlau tai ala tài rề ơnàng bă ù tam. Bi Nguyễn Thị Chuyên, đơs: “Bàr pe nam do giă tiêu gơguh uă ngan den cau lơh broă sa bol hi kung chờ hờp sơl. Gơ wèt mờ bàr pe bơta chi gơtìp aniai ờ niam den bol hi rơ̆p tam tàm bơrlŭ bal wơl mờ pơn jăt tai bơcri tàm tờm tiêu. Bol hi do mìng geh tam kơphê, mờ tiêu lơm mờ ờ gŏ gĭt tam ală tờm chi tam ndai tai. Gŏ tam tiêu priă lơh geh kung di đau sơl den tàng là bol hi kung gam pơn jăt tai tam tiêu”.

Ồng Hoàng Văn Tùng ơm tàm sàh Ea Ktur, kơnhoàl Cư̆ Kuiñ, càr Dăk Lăk sền gàr sươn kơphê mơkung tàm gơ jàr pik tiêu tam tàm bơrlŭ bal tàm sươn sơl. Mờ pơgăp 400 tờm tiêu tam bơrlŭ bal, tàm hơ̆ geh rlau 200 tờm tiêu gơ ai tơnhàu, ồng kờp dŭ digơlan nam do lơh geh pơgăp dùl tấn tiêu ro. Neh đềt mềr mờ tờm tiêu uă nam, sơrlèt ală tŭ tơngai bòl glar kal ke bơh giă tiêu dê tŭ den giă jơnhoa ngan rlau jơh, tŭ den gơmù giă ngan gĭt lơh, den tàng 2 nam do giă kơphê, tiêu ơm tàm khà jơnhoa mờ kơ̆ kơl jăp neh dong ồng Hoàng Văn Tùng gŏ chờ hờp mờ gơn kơnờm: “Gơguh giă den kung di đau ai cau lơh broă in, cau lơh gơlik in ờ huan đau bòl glar. Tơnhàu mờ gŏ giă tiêu gơguh den cau lơh broă kung sền gròi bơcri sơngka sền gàr sơl. Añ tơnhàu tus kàr lơi den klah ntê tơn tus kàr hơ̆. Tơnhàu jơh wơl sơngka sền gàr tơn sươn, lơh sàng goh sươn, lơh wơl sàng goh sươn nàng kàl tus lơh geh cồng nha uă rlau”.

Jơh gùt kơnhoàl Cư Kuiñ, càr Dăk Lăk tŭ do geh pơgăp 4 rbô 700 lồ tiêu gam tàm tơngai gơ ai sa, cồng nha lơh geh kờp bal rlau 3 tấn 2 tạ dùl lồ, tiêu lơh geh kờp bal pah nam rlau 15 rbô tấn. Jăt ồng Nguyễn Cảnh Danh, Phó Lam bồ Cơldŭ Broă lơh sa sươn sre mờ Tiah ơm kis kơnhoàl Cư Kuiñ, càr Dăk Lăk, ală nam rềp ndo, giă tiêu ơm tàm khà jơnhoa neh dong làng bol iang nùs bơcri tai lơh gơlik. Bơdìh mờ dong kờl làng bol bè pơlam tàp jak chài măy mŏk, gơnoar ătbồ kung bơto sồr cau lơh broă sa bañ ur ar rề ơnàng bă ù, pơn jăt tai bơcri sơngka sền gàr bă tiêu gam geh tŭ do jăt gùng dà ờ ngui sơnơm sền gàr phan tam, kơ̆ kơl jăp jŏ jòng: “Gah broă lơh sa sươn sre mờ tiah ơm kis kơnhoàl geh ală broă lơh bơsong nàng lam lơh gơlik tiêu kơ̆ kơl jăp, geh cồng nha. Bol hi kung bơto sồr làng bol bañ tơrgùm gơgơs ală mpồl lơh broă bal tàm ală tŭ lơh gơlik, tàm tơrgùm bal wơl làng bol nàng lơh gơlik phan kă bro, lơh geh jơnau sồr drà kă bro dê”.

Tàm bơta trồ tơngai duh tơ àl ngan, ală sươn tiêu mbòr ngan plai kung gam nggồr nggàc sơl săp cau dê ñŏ chờ hờp. Muh măt rơđồ tơngai sa, bềng dà kơlhề lơm, ală cau tàm hìu bơnhă ồng Nguyễn Tấn Lục dê ơm tàm thôn 4, sàh ia Hlốp, kơnhoàl Cư Sê, càr Gia Lai kung gam chờ hờp ngan sơl. Tài bơh nam do, giă tiêu jơnhoa tus 160 rbô đong dồ kĭ, tàm tŭ cồng nha lơh geh tơl jrong tiêu gơguh tus rlau 3 kĭ tiêu ro, digơlan sươn tiêu 1 lồ bơh hìu bơnhă dê rơ̆p cèng wơl priă lơh geh rlau 400 tơlak đong. Ồng Lục chờ hờp yal: “Kàl tiêu nam 2025 do, añ chờ hờp ngan tài bơh geh rlau mờ ală nam uă ngan. Kờp bal dùl tờm tiêu geh 3 kĭ nggùl tiêu ro. Añ neh kĭ sră hơ mờ kông ty Ô Lam bơh 5 nam lài den tàng geh blơi jơnhoa rlau mờ giă drà kă bro bơh 2 rbô đong tus 3 rbô đong dùl kĭ. Den tàng chờ hờp ngan”.

Bơta chờ hờp kung gơrề uă làm jơh ală tiah tam tiêu tàm Gia Lai. Rlau 100 nă cau bơh Mpồl lơh broă bal Broă lơh sa sươn sre mờ Drơng broă Nam Yang tàm kơnhoàl Đăk Đoa gam kơ̆p gơn kàl do rơ̆p cèng wơl gĭt nđờ jơ̆t tơmàn đong kơnờm 50 lồ tiêu lơh geh cồng nha uă. Ồng Nguyễn Tấn Công, Củ tịc Mpồl lơh broă bal pà gĭt, bơh nam 2018 tus tŭ do, mpồl neh tam gơl gùng tam tờm tiêu mờ kơphê nàng tềm pềr priă tă lơh, tơngguh bơta kơ̆ kơl jăp tềng đăp bơta gơ tam gơl bơh drà kă bro dê. Bal mờ hơ̆, Mpồl lơh broă bal hòi jà làng bol lơh broă sa lơh jăt tam phan ờ ngui sơnơm sền gàr phan tam, lơh geh tơl jơnau sồr tăc mờ lơgar ndai: “Mpồl lơh broă bal kung bơto sồr làng bol ờ gŏ di ngui ală dà sơnơm kơryan ờ ai ngui, is ồn là ală drà câu Âu, Mỹ, Nhờk neh kơryan ờ ai bơh lài do. Pa do, Mpồl lơh broă bal kung tơngkah sơnơm Sudan IV là sơnơm trum dà lơh sa mờ măy mŏk, mơkung bơto pơlam làng bol ngui toaltăng ìs mờ ƀào ìs ờ màu. Do là ală broă lơh bơsong kơ̆ kơl jăp jŏ jòng. Tam uă phan tam, uă chi tam, tam tàm pơdar ờ lơh gơguh priă tă lơh mơya dong priă lơh geh gơguh uă ngan. Tŭ do, giă kơphê jơnhoa den tàng rài kis làng bol dê gơ là niam ngan”.

Kơnờm tam gơl gùng dà tam phan dipal, bă tiêu ờ rề ơnàng bè lài, cau tam tiêu Gia Lai kung gam lơh geh priă jền uă rlau kơnờm giă gơguh mờ cồng nha lơh geh sùm.