Gia Lai geh uă bơta phan lơh geh bơh sươn sre, phan brê tăc mờ lơgar ndai kong gơrềng tơn bơh jơnau sồr kơryan roh brê bơh EU dê, geh: kơphê, kau su, dơm chi mờ ală phan bơna bơh dơm chi. Ală bơta phan do gam cèng wơl priă lơh geh bơh tăc mờ lơgar ndai pơgăp 500 tus 600 tơlak dolar Mỹ ai càr in. Tàm hơ̆, EU là drà kwơmàng, Mờ jơnau sồr pa bơh EU dê, mpồl lơh sa kă bro pal jòi gĭt anih tờm lơh dipal mờ adăt boh lam, pal hơ ờ geh phan lơh bơh brê gơtìp mus kơl aniai halà gơtìp hoàc hươr brê.

Ồng Lê Đức Vương, kwang bàng drơng broă rơndăp broă lơh bơh Kông ty Nestle Việt Nam dê tàm Gia Lai pà gĭt, tơnơ̆ tu EU yal bè adăt tơn, jơh ală mpồl lơh sa kă bro dờng tăc kơphê tàm EU neh rơcăng lài lơh sir ală jơnau sồr. Tàm tŭ ală mpồl lơh sa kă bro dềt mờ hìu làng bol lơh broă sa tìp uă kal ke tài bơh ờ tơl ală anih jòi gĭt anih tờm lơh kơ̆ kơl jăp mờ bơta pràn lơh jăt ờ pràn. Bulah bè hơ̆, ală jơnau cih do kung pờ tơlik tŭ niam uă ai mpồl lơh sa kă bro càr Gia Lai in tơnguh uă bơta kwơ măt kă bro, lơh gơlik bơta ƀươn tàm pơrlòng tàm drà câu Âu: “Ƀộ Broă lơh sa sươn sre mờ Tiah ơm kis dong kờl mpồl lơh sa kă bro nàng gĭt geh bơta kwơ tŭ tus bal ală jơnau sồr bè kơryan mus brê mờ gĭt nền di. Gơ wèt mờ mpồl lơh sa kă bro dềt mờ hìu làng bol lơh broă sa den pal lơh polygon (dùl phan ngui măy mŏk dong jòi gĭt anih tờm lơh gơlik phan bơna) mờ gĭt anih. Dilah khi lơh tìs den tơnơ̆ do lơh wơl roh uă ngan priă jền. 100 tus 200 hìu làng bol lơh broă sa den ƀươn, mơya dilah bàr pe jơ̆t rbô hìu làng bol lơh broă sa den kal ke ngan. Kơphê tăc tus drà EU geh sră cơng tàng EUDR den geh tăc jơnhoa rlau pơndrờm mờ kơphê bè ờs. Gơ là niam ngan, tài bơta do rơ̆p pơn jờng mpồl lơh sa kă bro geh priă jờng dilah khi lơh jăt ală jơnau sồr do. Do là phan dong kờl uă ngan”.

Jăt ală cau gĭt wă jrô kă bro phan mờ drà kă bro, nàng gơtùi gơdờp mờ EUDR, ală mpồl lơh sa kă bro pal mhar lơh ală anih jòi gĭt anih tờm lơh gơlik kơ̆p kơl jăp, gơtùi ngui măy mŏk blockchain nàng lơh loh làng jơnau yal; Lơh broă bal mờ ală mpồl sền swì nền nàng tơnggŏ phan ngui lơh ờ gơrềng tus mus kơl brê; Ngui broă lơh tơrlòng lài lơh gơlik phan kơ̆ kơl jăp, tơrmù ƀà gơrềng tus tiah ơm kis…

Bơdìh hơ̆ tai, Gia Lai đơs is mờ ală càr Tây Nguyên đơs bal kung pal rơcăng lài tus bal ală rơndăp broă lơh dong kờl tam gơl kơ̆ kơl jăp, tơnguh uă gĭt wă bơh làng bol lơh broă sa dê mờ cau lơh gơlik phan dê bè bơta kwơmàng bơh broă tam phan jăt gùng dà kơ̆ kơl jăp. Ồng Bùi Đức Hào, gơ wèt Mpồl Jơnau kơlôi pa kă bro phan kơ̆ kơl jăp, pà gĭt: “Mìng bàr pe nhai tơnơ̆ tŭ Mpồl Tam klăc câu Âu ai lơh jăt adăt do, den Ƀộ Broă lơh sa sươn sre mờ Tiah ơm kis neh ai lơh jăt broă lơh lơh broă, lơh anih jơnau yal tơnggĭt tiah tam mờ lơh jăt ală broă lơh bơsong lơh geh mờ ală jơnau sồr bơh EUDR dê. Ală càr kung neh sơnđờm mŭt lơh. Kơphê tàm càr Gia Lai gơ ơm rah rài tàm ală kơnhoàl, gơ ơm tàm tiah sar tiah ngài den rơ̆p kal ke rlau. Bulah bè hơ̆, Gia Lai kung là càr bơh sơnrờp geh jơnum lơh broă ODA, bè hơ̆ rơ̆p ai tơl bơta ai ală broă lơh mờr tus in lơh geh cồng nha niam bơnĕ”.