Tàm Hìu pơrjum thôn 2, sàh Phú Xuân, càr Dăk Lăk uă làng bol bal mờ mpồl atbồ is thôn jal mhar lơh sir broă lơh rơcang ai anih tĕ khà sồ 10 in. Ƀăng rôn, sră cih jơnau yal, bồng bi geh yồng yŭ rơyùm; thùng ơn sră pồ, kơ ƀàng, cơ gĕ, đèng, dà, hìu jă brê ndrờm geh gàr wil tơl, sàng goh. Ồng Trần Văn Hùng, cau tàm Jơnum tĕ khà sồ 10 pà git, ngai 15/3 do, 1 rbô 60 nă cau tĕ khà rơp lòt đùh sră tàm do. Kơnờm bơta rơcang lài bơh gờñ, broă lơh drơng wă rò, phan bơna mờ broă rơndap lơh gàr lơngăp lơngai, rơndap tap sèng neh crăp rơcang ai ngai chờ bơh cau tĕ khà dê in: “Bơh mat cau tĕ khà geh lir tàm hìu pơrjum thôn 2 tàm ală ngai pa do, bol hi kung mblàng yal, pơlam làng bol sền nền nòn ală cau tơlik mat tĕ khà. Bơh hơ̆ sac rơ wah ală cau geh tơl pràn jak, bồ tơngoh bơsram sră mờ mờng chài lơh broă nàng pồ mut tàm Quôk hội kung bè Mpồl duh broă Làng bol ală kâp”.

Sàh Phú Xuân geh crơng gơs bơh bơta tơmut bal 3 sàh là Ea Puk, Ea Dăk mờ Phú Xuân, gơ wèt kơnhoàl Krông Năng yau. Tĕ khà cau ala mat Quôk hội khoă XVI mờ Mpồl duh broă Làng bol ală kâp, tơngai lơh broă bơh nam 2026 tus nam 2031, sàh geh mờr 25 rbô nă cau tĕ khà đùh sră tàm 7 mpồl tĕ khà, 19 anih đùh sră. Ồng Nguyễn Tiến Ấn, Phó Củ tịc Anih duh broă Làng bol sàh, kwang geh jơng tàm Anih duh broă tĕ khà sàh pà git, tus tŭ do, jơh 19 anih neh rơcang sir phan bơna, bơta lơngăp lơngai rơndap tap sèng, drơng broă, wă rò, mat, jơnau yal tơnggit bơh ală cau tơlik mat tĕ khà dê geh lir loh làng tơn mờ tàm internet; ală pơrjum tìp mat cau tĕ khà kung neh bơyai jơh, rơcang ai ngai chờ jơh gùt làng bol in: “Anih duh broă Làng bol sàh Phú Xuân neh rơcang lài lơh niam wơl, bơka ƀăng rôn, sră cih jơnau yal, thùng ơn sră pồ… tàm ală anih tĕ khà jat di jơnau sồr bơh Mpồl duh broă tĕ khà dà lơgar dê. Tus tŭ do, ală broă rơcang ai tĕ khà in neh lơh wil tơl. Broă lir mat loh làng tàm ală anih tĕ khà kung gam geh lơh mờ crăp rơcang ai dơ̆ tĕ khà in”.

Tàm sàh M’Drăk, ngài tiah tờm càr Dăk Lăk mờr 90 kơi sồ, nùs nhơm rơcang kung geh lơh jal mhar ngan sơl. Ồng Nguyễn Đức Thảo, Củ tịc Anih duh broă Làng bol sàh, Củ tịc Anih duh broă tĕ khà sàh pà git, dơ̆ tĕ khà ala mat Quôk hội khoă XVI mờ Mpồl duh broă Làng bol ală kâp tàm sàh geh mờr 15 rbô 800 nă cau tĕ khà lòt đùh sră tàm 10 anih gơ wèt 8 mpồl tĕ khà. Tus tŭ do, broă lơh rơcang sền bal neh lơh sir, crăp rơcang ai ngai tĕ khà in. Ồng Nguyễn Đức Thảo yal: “Tŭ do, bol hi neh lir wil tơl mat ală cau tơlik mat tàm ală anih đùh sră, ală tiah mpồl bơtiàn mờ tàm Hìu lơh broă Anih duh broă Làng bol sàh. Bơyai lơh jơh cribơyai dơ̆ 3 mờ yal mat ngan ngồn 40 nă cau ala mat tĕ khà pồ ai 24 nă cau ala mat Mpồl duh broă Làng bol sàh, tơngai lơh broă bơh nam 2026 tus nam 2031.”

Jat mò Cao Thị Hòa An, Kwang geh jơng Đảng dà lơgar, Phó Ƀí thư Duh broă sùm Tỉñ ủy càr, Củ tịc Anih duh broă tĕ khà càr Dăk Lăk pà git, nàng drơng mờr 2 tơlak 420 rbô nă cau tĕ khà, càr neh crơng gơs 102 Anih duh broă tĕ khà kâp sàh, sơnah ƀòn, rơndap lơh 2 rbô 199 tiah đùh sră. Tus tŭ do, 100% tiah đùh sră neh lơh sir phan bơna, gàr niam lơngăp lơngai, drơng broă, wă rò; ală broă cribơyai, lir mat cau tĕ khà mờ lam lơh tìp mat cau tĕ khà nàng ai ala mat tơlik mat tĕ khà yal tơngume lơh broă geh lơh di jơnau sồr, crăp rơcang ai ngai tĕ khà in. Củ tịc Anih duh broă tĕ khà càr Dăk Lăk sồr ală sờh, gah broă lơh mờ Anih duh broă Làng bol ală sàh, sơnah ƀòn pơn jat tai kờp sền nền nòn mat cau tĕ khà, gàr tơl nă làng bol geh tơl bơta ndrờm geh lam lơh gơnoar tĕ khà he dê: “Pal kah là kờp sền nền nòn mat cau tĕ khà, gàr ờ lời huĭ khat dồ nă cau lơi. Is ồn là mpồl cau tĕ khà gam lơh broă tàm ală tiah, kụm lơh sa mờ măi mok, lòt lơh broă ngài; mpồl cau tĕ khà là kơnòm bơsram, cau bơsram dờng; kung bè ală cau ờ hềt geh lơh kăn kươk làng bol, ală cau dơ̆ sơn rờp lòt đùh sră. Is ồn, cau tĕkhà kòp jê, gam sơm tàm ală hìu sơnơm kung pal geh kờp wil tơl, gàr niam gơnoar làng bol jơh ală cau ndrờm geh tus bal tĕ khà.”

Mờ bơta rơcang ndrờm bal, nền nòn bơh càr tus ƀòn lơgar, 102 sàh, sơnah ƀòn tàm càr Dăk Lăk neh crăp rơcang ai ngai tĕ khà in. Bơh broă lơh sir phan bơna tus kờp sền nền nòn tơl mat cau tĕ khà, jơh ală ndrờm wèt tus jơnau kờñ ờ lời cau lơi gơtìp huĭ gơnoar làng bol. Ngai 15/3 do, bal mờ cau tĕ khà gùt lơgar, rlau 2 tơlak 420 rbô nă cau tĕ khà càr Dăk Lăk rơp mut tàm ngai chờ dờng dà lơgar dê.