Đơng lam tơnggume dơ̆ pơrjum, Phó Củ tịc Quôk hội mò Nguyễn Thị Thanh đơs sùm Anih duh broă Lơh kơnòl broă sùm Quôk hội tơlik nùs nhơm kah rơngal uă ngan mờ pơyua jơnau chờ hờp bal niam bơnĕ ngan rlau jơh tus mờ jơh ală cau pơgru dờng sơnam, bal mờ mờr 1 tơlak 600 rbô nă cau pơgru, kwang bàng ătbồ bơto bơtê tàm làm bă tiah bơh Dà lơgar dê. Mơkung sồr cau ala măt Quôk hội sền gròi cribơyai bè ală broă gơ ai tơlik tàm Adăt Cau pơgru.

Đơs tus jơnau cih bơh adăt dê bè broă rwah ngui cau pơgru, cau ala măt ồng Trần Văn Thức, mpồl cau ala măt Quôk hội càr Thanh Hoá pà gĭt, tŭ do broă rwah ngui cau pơgru tàm ală hìu bơsram dà lơgar dê lơh gam lơh jăt jơnau sồr bal bè rwah ngui viên cưk, do là bơta ờ hềt dipal lơh gơlik bơta jơngkah ờ tơl cau pơgru tàm bàr pe tiah, là jơnau tờm lơh uă tiah ờ gơtùi rwah ngui geh cau pơgru, ờ gơtùi lam bơto bơsram bàr pe môn bơsram nàng lam lơh broă lơh bơto bơtê pe kâp nam 2018. Ồng Trần Văn Thức, đơs: Añ dồ nùs bal ngan mờ ring bal uă mờ broă jơnau rơcăng cih adăt jàu gơnoar rơcăng lài ai gah bơto bơtê in tàm rwah ngui, ngui cau pơgru. Jăt mờ hơ̆, Ƀộ Bơto bơtê mờ Bơsram, Ƀộ Lơh broă Cau ling sồt să mờ Mpồl bơtiàn là anih lơh broă đơng lam drơng lơh geh broă lơh, ală jơnau neh lơh nền, broă rơndăp lơh bơtàu tơngguh jơh ală cau sa priă nhai mpồl cau pơgru gơ wèt gơnăp gơnoar ătbồ, jun yal mờ kâp geh gơnăp gơnoar in lơh nền, đơng pơlam pơgồp bal cau lơh broă sa priă nhai cau pơgru tàm ală hìu bơsram dà lơgar dê lơh geh anih lơh broă geh gơnăp gơnoar dê jàu, ală anih lơh broă ătbồ bơto bơtê halà anih bơto bơtê đơng lam drơng lơh tàm rwah ngui cau pơgru. Do là jơnau cih kwơmàng ngan gơtùi tă bơsong tơn ală broă kal ke, ngan là ngai sơlơ kơn jơ̆ kơn jŭt ngan bè jơngkah ờ tơl pơgru bơh uă nam do tàm uă tiah.

Tă pơgồp jơnau đơs bè ală jơnau cih sền gàr cau pơgru, cau ala măt Quôk hội ồng Nguyễn Văn Cảnh, mpồl cau ala măt Quôk hội càr Bình Định đơs bè bơta geh ngan kung gam geh sơl bàr pe nă mè bèp kơnòm bơsram dê lơh pờng pơgru, kơnòm bơsram lơh tơmƀàs cau pơgru lơh gơrềng ờ niam tus rùp să muh măt cau pơgru dê, lơh gơrềng ờ niam tus bơhiàn ờs mờng ki ngàm cau pơgru sền dờng màng adăt boh lam. Ồng Nguyễn Văn Cảnh, đơs: Añ sồr Bơta 11 pal bơtơl jơnau cih ală bơta mè bèp kơnòm bơsram cau bơsram ờ gŏ lơh gơ wèt mờ cau pơgru tŭ cau pơgru sơrlèt rlau ir mờ bơta ai gơnoar, mè bèp kơnòm bơsram cau bơsram kung ờ gŏ di bơsong bơta tàm gơjrañ tơn mờ cau pơgru, mờ pal kơnờm bơh hìu bơsram, mpồl ala măt mè bèp kơnòm bơsram, anih lơh broă dà lơgar. Bơta 9 cih bè broă pal lơh bơh cau pơgru dê, añ sồr tam gơl gơgơs broă pal lơh mờ kơnòl bơh cau pơgru dê. Gơ wèt mờ bàr pe kơnòl bơh cau pơgru dê den pal bơtơl tơnggume geh bơta pơgồp bal bơh mè bèp kơnòm bơsram mờ cau bơsram dê. Pơnyơu bè tŭ gŏ jơnau chài cau bơsram dê, să tờm cau pơgru ờ gơtùi ngui geh bơta pràn jak bơh cau bơsram dê mờ tơm bơh bơr mờ mè bèp kơnòm bơsram dê.

Bè broă lơh priă nhai mờ priă dong kờl tai gơ wèt cau pơgru, cau ala măt Quôk hội, Mpồl cau ala măt Quôk hội càr Dăk Nông ồng Dương Khắc Mai tơlik nùs nhơm dồ nùs bal uă mờ jơnau rơcăng cih adăt cih priă nhai bơh cau pơgru dê rơndăp ơn jơnhoa ngan rlau jơh tàm ală săp khà priă nhai sră nggal gơnoar ătbồ broă lơh dê, nàng kờñ tă bơsong kal ke mờ bơta is rơmis gơ wèt mờ broă lơh bơh cau pơgru dê. Cau ala măt sồr broă săp khà sèng priă nhai pal gơlòt jăt bal mờ cồng nha bơh cau pơgru dê: Tàm tơngai pa do, bè hơ̆, uă ngan mpồl ală cau pơgru geh bồ tơnggoh jak, bơta pràn jak tàm broă lơh, nùs nhơm bồ tơnggoh niam ngan. Bal mờ hơ̆, kung gam sơl bàr pe nă cau pơgru geh bal kwang bàng kâp ătbồ lơh tìs nùs nhơm broă lơh lời gơlik geh ală jơnau gơlơh muăt jrùm ngan pal bơsong. Bơh tài añ đơs bơta do là tài bơh ngai do, bol he gam lơh adăt gơlòt bal mờ broă lơh jăt broă lơh krơi is priă nhai den tàm ală tŭ lơh jăt adăt kờñ pal geh ală jơnau cih nàng tơngguh uă cồng nha mpồl ală cau pơgru rơhời bơ̆t bơtàu mpồl ală cau pơgru ngan ngồn jak bè broă lơh ờs mờng lơh geh tơl làm ală jơnau sồr bè nùs nhơm bơh cau Pơgru dê jơh nùs jơh tồr geh kơnòl mờ broă lơh.

Đơs iăt kơno jơnau đơs cribơyai bơh cau ala măt Quôk hội dê, Ƀộ trưởng Ƀộ Bơto bơtê mờ Bơsram ồng Nguyễn Kim Sơn tơlik nùs nhơm ưn ngài mờ ală jơnau đơs bơh cau ala măt Quôk hội dê cribơyai bè jơnau rơcăng Adăt Cau pơgru. Ƀộ trưởng ồng Nguyễn Kim Sơn đơs là, mờ ală jơnau đơs kờñ bal, dồ nùs bal uă, ring bal uă neh geh cribơyai, gơtùi gĭt gŏ geh bơta dồ nùs bal bơh ală cau ala măt dê; hơ̆ ờ mìng là bơta kờñ bal mờ jơnau rơcang cih Adăt Cau pơgru, mờ gam là bơta tơnggŏ kơnòl gơ wèt mờ gah Bơto bơtê, mờ dà lơgar.