Càr Kon Tum rơndăp ù tiah tam kơnuh sơnơm Ngọc Linh ơnàng mờr 32 rbô lồ tàm bàr kơnhoàl: Đăk Glei mờ Tu Mơ Rông, pơgăp 17 rbô lồ tam tàm tiah tam tờm mờ 15 rbô lồ tiah rềp kềng brê. Ồng Hồ Công Vũ, Phó Kwang ătbồ Cơldŭ Ngui mờ Bơtàu tơngguh brê, gơ wèt Ci Kụk Sền gàr brê càr Kon Tum pà gĭt, lài do, broă bơtàu tơngguh tiah tam kơnuh sơnơm Ngọc Linh tìp uă kal ke, gơkòl. Jơnau là tài bơh rlau 50% bă ù rơndăp ù tiah bơtàu tơngguh kơnuh sơnơm Ngọc Linh gơ ơm tàm tiah sền gàr kràñ cê ngan bơh brê sền gàr dà lơgar dê, ờ ai gơnoar lơh gơrềng jăt ală jơnau cih kơrnoăt boh lam gơrềng tus ù tiah, broă brê bơnơm. Jăt ồng Hồ Công Vũ, gơkòl do neh geh Adăt Ù tiah nam 2024 tă bơsong, lơh geh cơng tàng kơrnoăt boh lam nàng làng bol, mpồl lơh sa kă bro, gơnoar ătbồ tiah do in bơtàu tơngguh tiah tam kơnuh sơnơm Ngọc Linh. Ồng Hồ Công Vũ, đơs: Càr Kon Tum neh uă dơ̆ dan mờ Dà lơgar den pa do, Bơta 248 Adăt Ù tiah nam 2024 neh ai gơnoar tam tờm chi lơh sơnơm hơđơm mƀur brê sền gàr dà lơgar dê. Cíñ phủ gam rơcang ai lơh jăt Jơnau lơh nền bơh Cíñ phủ dê bè bơtàu tơngguh tờm chi lơh sơnơm hơđơm mƀur chi brê, Jơnau lơh nền bơh Cíñ phủ do dê neh tam gơl, ai jơnau đơs dơ̆ 3. Cơng tàng adăt boh lam nàng làng bol tam kơnuh sơnơm Ngọc Linh tềng hơđơm mƀur chi brê in đơs bal mờ brê sền gàr dà lơgar dê in đơs is là tơl cơng tàng.

Tàm càr Dăk Nông, ồng Hồ Văn Mười, Củ tịc Anih duh broă Làng bol càr đơs nền, Adăt Ù tiah nam 2024 neh lơh gơlik geh cơng tàng kơrnoăt boh lam, pờ tơlik tŭ niam nàng càr in lơh pràn bơtàu tơngguh lơh sa tàm bă brê ơnàng 254 rbô lồ, geh tus mờr 40% kờp jơh bă ù geh is bơh càr dê. Ală jơnau cih pa bè lơh nền giă mờ ai apah brê rơ̆p dong ătbồ geh cồng nha phan kwơ geh is brê, is ồn là brê geh is mờ brê rơcăng gàr bồ tô dà tŭ bơtàu tơngguh lơh sa tềng hơđơm mƀur brê. Càr Dăk Nông gam sồr ală sở, mpồl, gah, gơnoar ătbồ ală kơnhoàl lam lơh kràñ cê jơh nùs ală kơnòl broă nàng gờñ ai Adăt Ù tiah nam 2024 mŭt ngui tàm rài kis ngan ngồn, bơsong ală broă jal mhar kung bè jŏ jòng bơh tiah do dê. Ồng Hồ Văn Mười, đơs: Adăt Ù tiah là bơta kơ̆p gơn dờng ngan bơh làng bol gùt lơgar dê, tàm hơ̆ geh Dăk Nông. Adăt geh ală tam gơl niam ngan, gơlòt mŭt tàm rài kis ngan ngồn. Do là tŭ niam ai Dăk Nông, Tây Nguyên, làng bol in bơtàu tơngguh lơh sa, ngan là gơrềng tus ù tiah broă lơh sa sươn sre brê bơnơm.

Kơnhoàl ù tiah Tây Nguyên geh mờr 2 tơlak 600 rbô lồ brê, tàm hơ̆ geh pơgăp 2 tơlak 200 rbô lồ là brê geh is. Adăt Ù tiah nam 2024 geh làng bol, mpồl lơh sa kă bro mờ gơnoar ătbồ ală tiah jờng rơ ngan tàm broă lơh geh cơng tàng adăt boh lam nàng bơsong ală kal ke, gơkòl tàm broă bơtàu tơngguh lơh sa tàm ù broă brê bơnơm, ngan là bơtàu tơngguh lơh sa tềng hơđơm mƀur brê geh is, brê sền gàr dà lơgar dê. Gĭt nđờ tơlak lồ geh ai tơl bơta ƀươn rơ̆p là bơta pràn dờng ngan nàng ală càr Tây Nguyên in bơtàu tơngguh.