Trồ mho, tŭ làng bol rê lơh mìr, ală cau geh jơng tàm mpồl atbồ is ƀòn Ea Bông, sơnah ƀòn Buôn Ma Thuột tam pà gơs uă mpồl dềt tus tơl hìu nàng mblàng yal bè ngai tĕ khà 15/3 do. Tơngume ờ mìng là yal bè tŭ tơngai, anih đùh sră pồ mờ gam mblàng lơh loh mùl màl bè gơnoar, kơnòl bơh cau tĕ khà, tơl khà bơh cau ala mat dê mờ ală bơta kuơmàng bơh Adat tĕ khà dê. Mò H’Chuyên Ênuôl, cau atbồ ƀòn Ea Bông yal, broă lơh do lơh jat bơta mờng kwèng tàm rài kis pah ngai bơh làng bol tàm ƀòn dê: “Tài làng bol tàm do uă ngan là lơh suơn sre, he mblàng yal den pal lòt tàm trồ mho, dùl mpồl he lòt tus pơgap bơh 5 tus 10 hìu”. 

Bal mờ broă mblàng yal tơn, broă yal jơnau tơnggit gam geh lam lơh tàm ală dơ̆ pơrjum ƀòn mờ bơh ală mpồl tàm yal jơnau dơlam is ƀòn dê. Nàng gàr tơl nă cau ndrờm git tơngume, broă lơh mblàng yal kung geh tam gơl dipal sơl. Ồng Y Sil Ênuôl, cau geh bơngă pin dờn tàm ƀòn Ea Bông pà git, broă mblàng yal geh lam lơh mờ jơh bal dà yoan mờ dà Rơđê nàng dipal mờ tơl mpồl cau: “Mblàng yal làng bol in jơh bal mờ dà yoan mờ dà kòn cau. Tài đơs bal mờ dà yoan jơh den geh tŭ làng bol ờ wă, tŭ đơs dà kòn cau den làng bol wă mờ kung git bơta kơp kờñ nàng sac rơ wah cau dipal”.

Là cau jat yàng Bàp tàm sơnah ƀòn Ea Kao, mò H’Ploêr Niê Kđăm pà git, jơnau tơnggit bè tĕ khà kung geh mblàng yal tàm ală dơ̆ lòt pơrjum mờ tìp mat cau tĕ khà tàm ƀòn lơgar: “Kung geh ală dơ̆ mblàng yal, tìp mat cau tĕ khà tàm ală thôn, ƀòn. Tàm hìu jum den bàp yàng kung tơngkah là cau jat yàng Bàp tus ngai hơ̆ pal lòt tĕ khà wil tơl”.

Liñ mụk Nguyễn Minh Hảo, đơng lam ƀòn jat yàng bàp Mẫu tâm, mpồl jat yàng Bàp Buôn Ma Thuột đơs là, tơl nă cau jat yàng bàp kung là dùl nă làng bol mờ broă tus bal tĕ khà là lam lơh kơnòl gơ wèt mờ dà lơgar: “Ală gah jat yàng ndrờm là làng bol mờ tài bè hơ̆ nùs nhơm làng bol dê chờ hờp ngan tŭ geh dùl dơ̆ tĕ khà pa. Añ jơh nùs tus bal, lơh jơh kơnòl làng bol he dê. Kơnòl làng bol dê den he pal lơh wil tơl, hơ̆ là dùl jơnau bơto sồr bơh hìu jum dê”.

Tàm ală sàh tiah nhàr lơgar, tài bơta is ồn là ù tiah dờng ơnàng, làng bol ơm kis rah rài, broă lơh mblàng yal geh lam lơh ngac ngar rlau. Jat bi Lang Thị Son, Củ tịc Anih duh broă mặt trận Dà lơgar Việt Nam sàh Ia Lốp, kwang bàng Mặt trận pơgồp bal mờ cau atbò thôn, cau geh bơngă pin dờn tus tơl ƀòn làng bol ơm kis, phát sră cih jơnau yal tơnggit, pơlam làng bol kờp sền mat cau tĕ khà geh lir loh làng: "Sàh Ia Lốp là sàh ơnàng, làng bol ơm kis rah rài den tàng ờ mìng mblàng yal tàm ală pơrjum halà tàm loa pờ tơlik jơnau đơs sàh dê, mờ gam phàt sră cih jơnau yal tơnggit tus tơl hìu làng bol. Tus tŭ do, làng bol neh git loh jơnau yal bè broă lơh tĕ khà mờr tus”.

Ngai 15/3 do, cau tĕ khà gùt lơgar rơp lòt tĕ khà cau ala mat Quôk hội khoă XVI mờ cau ala mat Mpồl duh broă làng bol ală kâp, tơngai lơh broă bơh nam 2026 tus nam 2031. Broă lam jơnau yal tơnggit tus tơl ƀòn, tơl tiah jat yàng tàm càr Dăk Lăk pơgồp bơnah gàr tơl nă cau tĕ khà geh git wil tơl jơnau cih bơh adat boh lam dê bè tĕ khà. Bơh hơ̆, lam lơh wil tơl gơnoar mờ kơnòl làng bol dê tàm broă dờng màng dà lơgar dê.