Tàm sàh tiah jơnhoa Pà Cò, càr Phú Thọ, ồng Sùng A Chênh, Ƀí thư Đảng ủy, Củ tịc Mpồl duh broă Làng bol sàh pà gĭt: Broă lơh kwang bàng geh Đảng ủy sàh gĭt nền là kơnòl broă kwơmàng ngan rlau jơh. Tơnơ̆ tŭ tơrgùm bal nhàr ù tiah sră pơ àr gơnoar ătbồ, sàh neh bơyai lơh kờp sền nền wơl jơh ală, sền swì wơl mpồl kwang bàng kông cưk mờ geh broă rơndăp lơh rơndăp, rơndăp tăp sèng lơh bè lơi dipal mờ pràn jak lơh ngan ngồn ngồn geh bơto mờ jơnau sồr mùl màl tàm tŭ lơh jăt broă lơh tơrlòng lài gơnoar ătbồ rềp làng bol.

Nàng lơh geh tàm tơngai jòng mờ nàng gơnoar ătbồ 2 kâp lơh broă niam, tơngai tus, gơ wèt mờ ală sàh tiah sar, tiah ngài bol añ dan càr, Dà lơgar geh ală broă lơh dong kờl gơhòi gơ jà kwang bàng rê tus tiah làng bol jơi bơtiàn dồ êt nă cau, tiah sar, tiah ngài, tàm ală broă bè măy mŏk yal tơnggĭt jơnau, ù tiah, niam chài mpồl bơtiàn…hơ̆ là ală bơta pràn mờ ƀòn lơgar kờñ ngan.

Ai lài bơto kwang bàng làng bol jơi bơtiàn dồ êt nă cau, lơh geh jơnau sồr tam gơl pa cồng nha kwang bàng bơh kâp hơđơm tơn là jơnau pal geh lài ngan, bơnàng jă nàng kơnhoàl ù tiah bơnơm, tiah làng bol jơi bơtiàn dồ êt nă cau brồ guh pràn kơldang tàm tơngai tus.

Ồng Lê Anh Đức, Phó Kwang Lam bồ Sờh Broă dơlam is càr Lào Cai pà gĭt: Mờ bơta mùl gŏ is là càr tiah bơnơm, nhàr lơgar, uă jơi bơtiàn, càr gĭt nền kờñ bơtàu tơngguh mhar mờ kơ̆ kơnhăp, den dùl tàm ală kơnòl broă tờm kwơmàng là pal bơ̆t bơtàu mpồl kwang bàng, ngan là kwang bàng đơng lam, ătbồ kâp hơđơm geh bơta khin cha cíñ trị kơ̆ kơl jăp, geh bồ tơngoh kơlôi sơnơng tam gơl pa, geh pràn jak ătbồ broă pa, geh tơl nùs nhơm niam, pràn jak lơh broă, bơngă pin dờn, khin kơlôi, khin lơh, khin kong kơnòl mờ gĭt wă jrô mùl màl ƀòn lơgar.

Pa do, Pơrjum dờng Đảng ƀộ càr Lào Cai dơ̆ sơnrờp, tơngai lơh broă bơh nam 2025- 2030 neh ring bal jơnau lơh nền tàm pơrjum bè ală jơnau kờñ, kơnòl broă tơngai lơh broă tus dê; tàm hơ̆ geh jơnau đơs sồr lơh bè bơ̆t bơtàu gơnoar ătbồ ală kâp mờ mpồl kwang bàng, đảng viên, hơ̆ là: “Bơ̆t bơtàu gơnoar ătbồ rềp làng bol, wă wờng làng bol, sàng goh dòn song, lơh broă, cồng nha; mpồl kwang bàng, công cứk mờng broă, geh pràn jak lơh broă, jơh nùs jơh tồr, tài làng bol drơng broă”.

Mơkung gĭt nền 1 tàm 5 kơnòl broă tờm kwơmàng khà dùl là: “Bơ̆t bơtàu mpồl kwang bàng, ngan là kwang bàng đơng lam ătbồ ală kâp, cau lam bồ geh tơl nùs nhơm niam, pràn jak lơh broă mờ bơngă, geh bồ tơnggoh kơlôi sơnơng bơtàu tơngguh, nùs nhơm lơh is mờ jơnau kờñ pơnđơl uă, ndrờm pal kơnòl broă, duh hồl ngăc ngar, bơceh lơh, sùm geh nùs nhơm tă pơgồl, tơryăng tơryồng lơh broă, jơh nùs sơnơng kơlôi, mùl màl iăt kơno, rềp làng bol, wă wờng làng bol, tài làng bol; ai lài kwang bàng kơnòm să, kwang bàng ùr, kwang bàng cau jơi bơtiàn dồ êt nă cau”. Đơs bè broă lam lơh loh làng kơnòl broă do, ồng Lê Anh Đức, pà gĭt: Bơh bơta sền sơnơng bơh anih lơh broă mìng lơh dùl kơnòl broă, bol hi rơ̆p tơrgùm tàm bàr pe mpồl broă lơh bơsong tờm kwơmàng: Lài ngan là tơrgùm kờp sền nền wơl, tam gơl, bơtơl, lơh tơl jơnau sồr loh làng, ndrờm bal ală jơnau sồr, broă pơlam lơh bè broă kwang bàng nàng kờñ gàr bơta ring bal, ndrờm bal, kơ̆ kơl jăp tàm lam lơh jăt. Dơ̆ bàr là, tơngguh uă cồng nha broă lơh rơcăng, săc rwah mờ ngui kwang bàng, pal làng bol lơh tờm, loh làng, song dơ pă, ai nùs nhơm niam, cồng nha broă lơh mờ pràn jak lơh broă mùl màl lơh gai was. Mơkung pơn jờng, lơh geh broă lơh gơhòi gơ jà mờ gàr jơng kwang bàng kơnòm să, kwang bàng geh bơta bơsram dờng.

Khà làng bol jơi bơtiàn dồ êt nă cau tàm càr Lào Cai tŭ do geh tus pơgăp 66,2% khà kờp làng bol gùt càr. Den tàng bè hơ̆, broă bơtàu tơngguh mpồl kwang bàng là cau jơi bơtiàn dồ êt nă cau geh gĭt nền là kơnòl broă kwơmàng, jŏ jòng mờ sùm sùm gơcèng jơnau gơtha kwơmàng ngan tàm broă bơ̆t bơtàu pràn kơldang ală anih lơh broă cíñ trị kâp hơđơm, gàr geh bơta kơnhăp jŏ tàm bơtàu tơngguh tiah jơnhoa, nhàr lơgar.