Đơs tàm dơ̆ bơyai lơh, Củ tịc Quôk hội ồng Vương Đình Huệ pà git, tàm ù tiah ờdo ờdă Việt Bắc, nam 1948, Củ tịc Hồ Chí Minh neh tơlik jơnau hòi jà tàm pơrlòng kờñ gơboh dà lơgar mờ pơn jờng: “Tàm pơrlòng là kờñ gơboh dà lơgar, kờñ gơboh dà lơgar den pal tàm pơrlòng, ală cau tàm pơrlòng là ală cau kờñ gơboh dà lơgar ngan rlau jơh”. Sùm 75 nam do, nùs nhơm hơ̆ là bơta pơn jờng dờng màng ngan bơh srơh tàm pơrlòng kờñ gơboh dà lơgar dê ngai sơlơ bơtàu tơnguh, pơgồp bơnah lơh gơs ală cồng nha dờng màng, geh kuơ kah yau tàm broă lơh bơt bơtàu mờ sền gàr dà lơgar Việt Nam, lơh gơs bơta niam dà lơgar bè tŭ do.

Tuyên Quang là càr lam lài gùt lơgar bè sền gàr brê mờ bơtàu tơnguh lơh sa brê. Bă ù tam sền gàr brê geh 76% bă brê geh is. Càr tŭ do rơndap ù tiah sac rơwah 3 bơta brê; lam lơh niam ngan broă lơh sền gàr mờ bơtàu tơnguh brê; tam pa rlau 11 rbô lồ brê pah nam; lơh gơs tiah tam phan mờ mờr 200 rbô lồ, khà jơm glòm brê geh rlau 65%; gàr sùm tiah kis li la, kơ̆ kơljap, pơgồp bơnah kuơmàng ngan tàm broă prap gàr gen mờ lơh gơlik phan kis tàm dà; rơcang lài sơndră dùl bă geh cồng nha càl rbut dờng, dà kŏ dà cò, trồ prang dờng soat dà, tơrlah ù,… ai tiah dòr đah tô dà lơgar in.

Củ tịc Quôk hội ồng Vương Đình Huệ đơs nền, nam 2023, Tuyên Quang pal gàr niam bơhiàn ƀòn tờm kac màng mờ ală cồng nha neh lơh geh, sơlơ tơnguh rlau tai srơh tàm pơrlòng kờñ gơboh dà lơgar, lơh gơlik bơta gơ rề pơn jờng kwang bàng, đảng viên mờ làng bol ală jơi bơtiàn kòn cau lơh ngan lam lơh tơl làm mờ wil tơl ală jơnau kờñ, kơnòl broă ai tơlik: “Di dơ̆ do, añ sồr ală anih lơh broă dà lơgar, lài ngan mờ lơh tơn là Ƀộ Nông nghiệp mờ Phát triển Nông thôn dong kờl càr Tuyên Quang sơlơ tơnguh rlau tai broă ngui kông nghệ kao tàm broă sền gàr mờ bơtàu tơnguh brê, bơtàu tơnguh lơh sa tam sền gàr brê, pơgồp bal broă tam brê, sền gàr brê mờ bơtàu tơnguh broă drơng ala sền gàr tiah ơm kis brê mờ nhơl chờ brê bơnơm, sền gàr niam chài mờ bơt bơtàu ƀòn lơgar pa”.

Củ tịc Quôk hội sồr ală kâp, ală gah broă lơh pơn jat tai tam gơl pa mờ chồl pràn ndrờm bal, ngan ngồn mờ geh cồng nha rlau tai ală srơh tàm pơrlòng kờñ gơboh dà lơgar gơ jat bal mờ bơsram, lơh jat bồ tơngoh, nùs nhơm, niam chài rài kis Củ tịc Hồ Chí Minh dê; ngai sơlơ ngui niam nùs nhơm tam klac bal, bơta pràn bơh jơh gùt anih lơh broă cíñ trị dê, bơta ring bal dùl nùs, pơgồp bal bơta pràn bơh jơh gùt làng bol dê lam lơh jat niam ală Nghị quyết bơh Đảng, Nghị quyết bơh Quôk hội dê bè bơtàu tơnguh lơh sa- mpồl bơtiàn mờ kes priă dà lơgar nam 2023 nàng kờñ ngui tơl bơta pràn, bơta ƀuơn, sơlơ chồl pràn bơtàu tơnguh lơh sa- mpồl bơtiàn, gàr niam rài kis mpồl bơtiàn mờ jơnau kờñ tờm là tơnguh rài kis tơl bơta bơh làng bol dê.

Tơl gah broă lơh, tơl tiah, tơl mpồl lơh broă, anih lơh broă pơn jat tai git nền mờ đơng lam kràñ cê ală srơh tàm pơrlòng mờ jơnau kờñ tàm pơrlòng loh làng, tơngume dipal, broă lơh geh cồng nha nàng kờñ gơ hòi gơ jà uă tơl rơnàng làng bol, tơl sơnam, làm gùt tơl gah broă lơh, ù tiah, lơh srơh tàm pơrlòng ngan ngồn gơ gơs mờng kwèng rài kis pah ngai, gơ gơs jơnau kờñ ndrờm mờ ală bơta kuơ ndai, pơn jờng lơh jat ngan ngồn tềm pềr, jơh nùs rơcang sơndră sa kuề sa kuà, pơhì pơhà, broă ờ niam, lơh niam wơl hàñ cíñ; ngan là lơh niam broă lơh git gŏ, bơto pơlam, lam lơh uă ală broă lơh geh cồng nha; tam gơl pa broă lơh pà khà jờng, lơh gơlik bơta pràn pơn jờng ală mpồl bal, tơl nă cau lơh gơs jak kơnòl broă jat gơnăp gơnoar mờ kơnòl he dê, ngan ngồn tơngkah 75 nam Ngai Bác Hồ tơlik jơnau hòi jà tàm pơrlòng kờñ gơboh dà lơgar (11/6/1948- 11/6/2023).

Củ tịc Quôk hội đơs nền, sơnam pa Quý Mão 2023 pơn jat tai là “Sa tềp tam chi” geh sơn đờm lam lơh bơh sơnam pa Canh Tý, tờm 63 nam lài jat jơnau hòi jà bơh Củ tịc Hồ Chí Minh dê; là bơta hơ pơrgon bơh broă lơh jat jơnau sồr bơh Ƀan Ƀí thư dê tàm Kơrnuat sồr sồ 13 bơh Đảng dà lơgar dê bè sơlơ tơnguh bơta đơng lam bồ Đảng dê gơ wèt mờ broă lơh atbồ, sền gàr mờ bơtàu tơnguh brê nàng bơt bơtàu dùl “rài lơh sa tơlir” bơtàu tơnguh kơ̆ kơljap: “Jơh ală lam lơh gơtùi bơta tờm ngan rlau jơh, hơ̆ là ală cau tam brê pal kis gơtùi bơh brê mờ pas bơh brê, lơh ngan lam lơh jat ngan ngồn jơnau kờñ bơt bơtàu Tuyên Quang là tiah tờm tam sền gàr brê ngui kông nghệ kao mờ tiah tờm tam, lơh gơlik dơm chi tiah dòr mờ tiah kơh bơnơm đah tô dà lơgar jat jơnau sồr tàm Nghị quyết sồ 11 bơh Ƀộ Cíñ trị dê bè gùng dà bơtàu tơnguh lơh sa, mpồl bơtiàn, sền gàr dà lơgar, sền gàr lơngăp lơngai tiah dòr mờ tiah kơh bơnơm đah tô dà lơgar tus nam 2030, broă wèt sền tus nam 2045, do là jơnau kờñ tơrgùm jơh ală bơta”.

Mờ nùs nhơm pa, bơta pơn đơl pràn pa, broă lơh pa, Củ tịc Quôk hội pin dờn “Sa tềp tam chi sùm sùm kah ưn ngài Bác Hồ” sơnam pa Quý Mão 2023 bơh càr Tuyên Quang dê ngan là gơtùi lơh geh uă cồng nha niam rlau, pơgồp bơnah bơt bơtàu dà lơgar Việt Nam hàng niam, tơlir niam, bơtàu tơnguh kơ̆ kơljap, bè bơta kơp kờñ king crŭ ngan bơh Củ tịc Hồ Chí Minh dê: “Sơnam pa là sa tềp tam chi/ Lơh dà lơgar in sơlơ ngai sơlơ pa”.