Tàm bơta nhơm trồ tiah duh tơr ồ ngan ală ngai bồ nhai 4 bơh kàl prang Tây Nguyên dê, bol hi tìp đảng viên ồng Y Tuyên Brkông là kòn cau Rơđê, nam do 53 sơnam ơm tàm ƀòn Dray Hling, xã Hoà Xuân, ƀòn dờng Buôn Ma Thuột, càr Dăk Lăk tŭ ồng gam bal mờ bàr pe nă cau lơh phan gam klài phơng tàm sơntèk dơng dà tuh dơ̆ 3 ai sươn kơphê tam bơrlŭ bal mờ tờm tiêu, sầu riêng. Ồng Y Tuyên yal, mờ gơnoar broă là đảng viên, să tờm sùm lơh jăt niam nùs nhơm lam lài lơh krơh tàm lơh broă lơh sa, tơn jơh jơgloh tơrmù rƀah. Tơnơ̆ uă nam bơtàu tơnguh tam phan, tŭ do hìu bơnhă ồng geh priă sùm rlau 200 tơlak đong dồ nam bơh 1 rbô 500 tờm kơphê mờ 400 jrong tiêu, bal mờ 40 tờm sầu riêng. Tŭ lơh sa tơl ngui tơl sa, ồng jơh nùs dong kờl ală cau ling yau ndai kal ke tàm mpồl mờ làng bol tàm ƀòn lơgar. Ồng Y Tuyên Bkrông pà gĭt: Añ là cau să tờm tơn lòt bơsram tàm xã do bè bơta chài tam kơphê tam tiêu mờ sầu riêng. Tàm ală tŭ bơsram den añ gĭt geh añ rơ̆p bơto pơlam wơl ai làng bol in bơta jak chài bơta chài sền gàr kơphê.

Bi Y Vinh H’đơk là kòn cau Rơđê, 38 sơnam ơm tàm ƀòn Cư Đnuê, xã Hoà Xuân, ƀòn dờng Buôn Ma Thuột, càr Dăk Lăk kung là đảng viên kong bòl glar kal ke, tơryang tơryồng lơh broă lơh sa. Yờ tơnguh nùs nhơm đảng viên khin cha “khin kơlôi, khin lơh”, bơh tam phan mờ broă lơh cau tờm lam bơ̆t bơtàu broă làng bol mờng ngui. Tơnơ̆ uă nam tơryăng tơryồng lơh broă lơh sa, lồi nam 2023 pa do, bi neh lơh geh hìu niam ngan ơnàng 100 thơk vuông, kờp priă gĭt nđờ rhiang tơlak đong. Bi Y Vinh K’đơk, yal: Tơnơ̆ tŭ rê ling den añ rwah broă lơh bơ̆t bơtàu, hơ̆ sồng lòt lơh apah mờ dờp tai broă lơh hìu kâp 4, geh nam den dờp lơh bơh 3 tus 4 nơm, geh nam dồ êt broă den 2 nơm. Añ hòi oh mi cau chài lơh hìu tàm ƀòn, pơgăp 7, 8 nă, 4 nă cau lơh tờm mờ 3 nă cau dong kờl halà 2 nă, tơm priă tơngai cau lơh tờm in den 400 rbô tus 450 rbô đong dồ ngai gơ jăt tàm bơta jak lơh broă, cau dong kờl geh mờng chài tàm broă lơh den 320 rbô mờ cau dong kờl bè ờs den là 300 rbô đong dồ nă dồ ngai. Đơs bal là kờp jơh priă lơh geh bơh kơphe mờ bơh lơh hìu đam kung geh đau bơh 150 tus 200 tơlak đong dồ nam.

Mpồl Cau ling yau ƀòn dờng Buôn Ma Thuột tŭ do geh 8 rbô 80 nă cau, tàm hơ̆ geh 2 rbô 691 nă cau tàm mpồl là đảng viên, pơgăp mờr 600 nă là làng bol ală jơi bơtiàn: Rơđê, M’nông, Tày, Nùng, Dao, Thái, Mông…Ồng Nguyễn Công Tình, Phó Củ tịc Mpồl Cau ling yau ƀòn dờng Buôn Ma Thuột đơs, ală nam do, ală đảng viên tàm mpồl ndrờm lơh niam gơnoar broă lam lài lơh krơh, yờ tơnguh nùs nhơm “Đảng viên lòt lài, làng bol jăt tơnơ̆”. Ală cau ling yau do kung đòm jăt niam bơta kơ̆ nùs, khin cha bơh ală cau ling “Cau ling Wa Hồ” dê tàm bơta pa bal mờ nùs nhơm tơryăng tơryồng, ờ ngòt bòl glar kal ke jơh nùs lơh broă lơh sa, tơn jơh jơgloh tơrmù rƀah. Bơh hơ̆, geh tă pơgồp ờ dồ êt gơ wèt mờ bơta bơtàu tơnguh lơh sa- mpồl bơtiàn bơh ƀòn dờng Buôn Ma Thuột dê, bơ̆t bơtàu mpồl ngai sơlơ pràn kơldang kơ̆ kơl jăp tơl làm, lơh geh broă lơh ai uă cau lơh broă tàm ƀòn lơgar in mờ priă lơh geh sùm. Ală đảng viên bè Y Tuyên Bkrông mờ Y Vinh K’đơk là ală krơh àng pơnrơ bè hơ̆. Ồng Nguyễn Công Tình, pà gĭt: Tàm ală pơrjum, bol hi neh yal krơh là ală cau pơnrơ jak là đảng viên Y Vinh mờ Y Tuyên nàng ală mpồl cau ling yau xã, halà mpồl cau ling yau ƀòn in bơsram lơh jăt bơtàu tơnguh lơh sa. Kwơmàng nàng ală cau tàm mpồl in là cau làng bol jơi bơtiàn dồ êt nă cau sang tĕ bơta ƀàs sìl, jơh nùs lơh sa tơn jơh jơgloh tơrmù rƀah ndrờm bè bàr nă cau tàm mpồl là Y Vinh mờ Y Tuyên. Bơh hơ̆, lơh gơlik bơta pràn lơh gơrề tàm Mpồl Cau ling yau ƀòn dờng Buôn Ma Thuột mờ mpồl bơtiàn.

Gơtùi đơs, ală đảng viên là kòn cau Rơđê tàm Mpồl Cau ling yau ƀòn dờng Buôn Ma Thuột bè ồng Y Tuyên Bkrông mờ Y Vinh K’đơk neh mờ gam lơh gơlik bơta gơn kơnờm, bơta pin dờn mờ bơta pràn lơh gơrề nàng ală cau ling yau ndai tàm mpồl halà làng bol ală jơi bơtiàn tàm ƀòn dờng Buôn Ma Thuột bơsram, đòm jăt brồ guh rơhời lik klàs bơh rƀah mờ geh tŭ là lơh pas, pơgồp bơnah bơ̆t bơtàu ƀòn dờng Buôn Ma Thuộr đơs is mờ càr Dăk Lăk đơs bal ngai sơlơ pas sơm pràn kơldang.