Tàm sàh Ia Hiao, càr Gia Lai (geh tơnggơs bơh broă tơmŭt bal 3 mpồl lơh broă sră pơ àr gơnoar ătbồ, geh: sàh Chrôh Pơnan, sàh Ia Hiao mờ sàh Ia Peng, kơnhoàl Phú Thiện yau) nùs nhơm lơh broă ală ngai lồi nam gơgơs duh hồl nggồr chờ hờp rlau mờ tŭ lơi jiơ. Tàm ală gơl gùng ƀòn lơgar, kwang bàng, đảng viên mờ làng bol lik lòt lơh broă bal tă sờr phan ngui lơh hìu đam, pà ù pờ ơnàng măt gùng nàng lơh ală broă bơ̆t bơtàu gùng lòt tờm kwơmàng. Tềng bồ sơnĕ gùng tờm mŭt tàm thôn Sômalơng A là hìu  bơh ồng Siu Hiếu dê, Củ tịc Anih duh broă Mặt trận dà lơgar Việt Nam sàh Ia Hiao. Bă ù măt gùng bal mờ tơl thơk ù bơkang priă jền rơhiang tơlak đong geh ồng pà is ai rơndăp broă lơh pờ ơnàng gùng mờ ờ gŏ geh dồ êt bơta kơlôi sơnơng lơi. Ồng Siu Hiếu đơs:

“Lơh jăt niam gơnoar broă Củ tịc mặt trận dê, là cau lòt lài tàm broă lơh hòi jà làng bol bè geh lơh gùng. Broă lơh tàm do den ờ mìng is bơh thôn dê ờ mờ gam bơh jơh ală sàh Ia Hiao dê tai. Kơ̆p kờñ là làng bol dồ nùs kờñ bal, kơ̆p kờñ lơh bè lơi gùng ngai sơlơ ơnàng mờ sàng goh rlau nàng làng bol ƀươn tàm broă lòt rê”.

Gùng dà lơh ơnàng gùng lòt rê geh bơta ơnàng bơh 3 thơk tus 5 thơk nggùl geh lam lơh ndrờm bal. Mìng tàm tơngai lơyah, 52 hìu làng bol neh pà mờr 4 rbô 500 thơk vuông ù, tă sờr rlau 1 rbô 200 thơk phơng gàr Ƀ40 bal mờ uă tờm chi sa plai, wàng kơnrồ, hìu prăp phan, mờ kờp jơh priă gĭt nđờ tơmàn đong. Kơnờm bơta dồ nùs bal hơ̆, 4 gơl gùng mờ rbòng pơrdô dà, jòng mờr 2 kơi sồ nggùl, rơ̆p geh sơnđờm lơh di tơngai, bơsong jơh jơnau ngơr bam jrô dà, lơh ƀơ̆ ƀơl, sùm lơh gơbàn kal ke làng bol in tàm sùm uă nam do. Làng bol sàh Ia Hiao dờp rò gùng dà do mờ bơta pin dờn mờ kơnòl. Ồng Kpah Nghing, thôn Sômalơng A, yal: “Gơnoar ătbồ, Dà lơgar lơh gùng añ chờ hờp ngan tài bơh gùng hăt hal ngan, tơnơ̆ do cau gal, làng bol uă den rơ̆p ờ gơtùi lòt. Dơ̆ bàr là broă rơndeh rơndồ lòt kung pal tam pleh gơ̆p sơl. Den tàng broă Dà lơgar pờ gùng jăt di broă rơndăp lơh den làng bol crăp rơcăng pà ù”.

Tàm thôn Bình Trang, ồng Nguyễn Văn Nhâm kung jơh nùs jơh tồr ngan lơh jăt: “Bơtàu tơngguh ƀòn lơgar pa pờ ơnàng gơl gùng gơ in ơnàng rơđiàh den bol he ring bal mờ kờñ bal lơm. Tŭ do pờ gùng den pal lơh bè lơi, ai tơl bơta ai làng bol in lơh gùng brong pơrdô dà, dơ̆ bàr là pơng gàr pờ gơ in sir niam ai làng bol bol hi in ring bal ngan dùl nùs bal ngan”.

 “Tơrgùm hòi jà làng bol pà ù, rề ơnàng ală gơl gùng ngui tàm rài kis làng bol in” là dùl tàm 5 broă tam gơl pràn geh Đảng ƀộ sàh Ia hiao gĭt nền tơn tàm Pơrjum dờng dơ̆ I. Do là kơnòl broă geh lơh jăt bơta mùl màl tàm rài kis bơh bơta ƀòn lơgar dê, lơh bơnàng jă nàng kâp ủy, gơnoar ătbồ mờ ală mpồl cau lơh loh làng gơgơs broă lơh broă ai jơh gùt tơngai lơh broă in. Tàm hơ̆, Mpồl Tam klăc cau ùr sàh geh jàu kơnòl đơng lam mờ kong kơnòl broă lơh hòi jà làng bol – dùl bơnah broă kal ke mơya gơ sồr bơta ngăc chài mờ kơ̆ nùs. Mò Trần Thị Minh Hiền, Củ tịc Mpồl Tam klăc Cau ùr sàh Ia Hiao, pà gĭt: “Mpồl Tam klăc Cau ùr sàh neh geh uă dơ̆ lòt tìp tơl hìu, tơl nă cau nàng hòi jà nàng làng bol in gĭt bè gùng dà nàng pờ gùng mờ lơh rbòng pơrdô dà. Mblàng yal loh ai làng bol in gĭt hơ̆ là pờ ơnàng gùng mờ lơh rbòng pơrdô dà ờ mìng lơh bơka niam wơl ƀòn lơgar mờ bơ̆t bơtàu ƀòn lơgar pa lơm mờ gam ai tơl bơta ƀươn nàng làng bol in ơm kis tàm ƀòn lơgar broă lòt rê ƀươn, gơmù tus khà lơyah ngan rlau jơh tŭ mìu dà tih dà lìu là rơ̆p gơlik geh jơnau ngơr bam jrô dà”.

Pơrjum dờng kung gĭt nền loh jơnau đơs: Đảng ƀộ sàng goh, gơnoar ătbồ dòn song sàng goh – bơceh mòn – lơh broă, Mặt trận mờ ală mpồl cíñ trị - mpồl bơtiàn là anih tờm tam klăc jơh gùt làng bol. Tơl mpồl geh jàu ală kơnòl broă mìng drơng dùl kơnòl broă, tam pà bơta kơn jơ̆ mờ gơnoar ătbồ, lơh gơlik geh ală anih lơh broă crăp rơcăng, geh kơnòl mờ ring bal. Bulah bè hơ̆, kal ke kung gam sơl. Ồng Bùi Hữu Tâm, Phó Ƀí thư Duh broă sùm Đảng ủy sàh Ia Hiao, ai gĭt loh: “Mpồl Lơh kơnòl broă sùm neh gĭt nền geh ală kal ke tàm ală tŭ lơh, tŭ tơngai nàng lơh là broă ai priă bơcri mìng geh tơngai lơh sir tus ngai 31/12/2025 lơm den tàng tàm ală tŭ lơh pal lơh uă broă lơh crăp rơcăng. Tàm ală tŭ lam lơh, bơh iăt kơno jơnau đơs mpồl bơtiàn dê den gŏ làng bol ndrờm ring bal, dùl nùs bal broă pờ ơnàng mờ lơh niam wơl hơ̆. Hơ̆ sồng geh nùs nhơm crăp rơcăng pà ù, phan lơh hìu đam ờ duh kờñ pal dờp priă tơm wơl ờ”.

Tàm ală gơl gùng gam pờ ơnàng, ală broă bơ̆t bơtàu gam sơnđờm lơh…hơ̆ là cơng tàng tơnggŏ loh làng ngan rlau jơh ai nùs nhơm “Làng bol gĭt, làng bol bơyai, làng bol lơh, làng bol dờp ngui”. Tŭ gùng dà dờng geh lơh loh làng bơh broă lơh geh kwơ ngan ngồn, bơh bơta lơh krơh kwang bàng dê, bơta ring dùl nùs bal bơh làng bol dê rơ̆p gơgơs bơta pràn lơh gơrề tàm rài kis. Hơ̆ kung là tŭ jơnau lơh nền tàm pơrjum Đảng dê ngan ngồn gơlòt mŭt tàm rài kis, lơh gơlik bơnàng jă tam gơl tàm tơl tiah làng bol ơm kis.