Tổng Ƀí thư ồng Nguyễn Phú Trọng là cau kộng sản song ring, dùl nă kwang đơng lam bồ jak chài, cau sùm ring bal, ờ tam gơl đah jơnau đơs mờ broă lơh, ai làng bol lơh bơta đo was, ai làng bol lơh tơl khà, ai bơta kuơ làng bol dê lơh jơnau kờñ pơn đơl pràn; sùm rềp làng bol mờ geh dùl plai nùs lơbơn niam ngan: “Dà lơgar he dê ờ hềt tŭ lơi geh tŭ niam bơta pràn gơnoar broă mờ bơngă pin dờn tàm dunia bè tŭ do, geh tai bơta niam, bơnàng jă ƀuơn ƀuài nàng kơ̆ kơljap cơnđuà tàm gơl gùng mờ Đảng, làng bol he mờ Wa Hồ kờñ gơboh neh sac rơ wah”.

Do là jơnau đơs nền bơh Tổng Ƀí thư ồng Nguyễn Phú Trọng dê tàm Pơrjum dơ̆ 1 Mpồl duh broă Đảng dà lơgar khoă XIII mờ tàm uă pơrjum kuơmàng tŭ Tổng Ƀí thư tus bal mờ geh ală jơnau đơs sồr lơh kuơmàng.

Ờ di nisơna mờ Tổng Ƀí thư neh đơs nền tus bơta do tŭ mùl màl ai gŏ, tơnơ̆ mờr 40 nam lam lơh broă lơh tam gơl pa, bơh dùl dà lơgar rƀah lơ ời, geh phan bơna, bơta chài măi mok, rơndap tap sèng phan bơna lơh sa – mpồl bơtiàn ờ geh, bơta chài bơsram sră ờ uă, tus tŭ do, Việt Nam neh brồ guh gơs là lơgar gam bơtàu tơnguh, geh priă jền lơh geh dimơ; niam chài, mpồl bơtiàn pơn jat tai bơtàu tơnguh, rài kis phan bơna mờ nùs nhơm làng bol dê geh tơnguh niam; broă lơh bơt bơtàu Đảng mờ ală anih lơh broă cíñ trị geh bơta tam gơl pràn; mpồl tam klac dờng gùt jơi bơtiàn ngai sơlơ geh kơ̆ kơljap; cíñ trị, mpồl bơtiàn geh gàr kơ̆, lơngăp lơngai dà lơgar – bơta lơngăp lơngai, lơngăp lơngai is, gơnoar tờm geh gàr kơ; gơnoar broă mờ bơngă pin dờn dà lơgar dê ngai sơlơ geh tơnguh tàm muh mat ală lơgar: “He là kòn sau Wa Hồ dê, Đảng là Đảng Kộng sản Việt Nam, Jơi bơtiàn là jơi bơtiàn Việt Nam, dà lơgar do ngan là pal bơtàu tơnguh, brồ guh ờ gŏ di gơ plơ̆ gơ ruc pơndrờm mờ ală lơgar ndai, ờ bài kong là ờ jai mờ cau ndai, bol he pal git nền bơta lơh ngan bè hơ̆”.

Nàng ai dà lơgar pơn jat tai bơtàu tơnguh ndrờm bal mờ ală lơgar dờng pràn 5 tiah gùt plai ù bè jơnau Wa Hồ neh geh tŭ kơp kờñ, jat Tổng Ƀí thư, bơdìh mờ bơta pơgồp bal bơta pràn dùl nùs bal bơh jơh gùt anih lơh broă cíñ trị mờ ală rơnàng làng bol tàm gùt lơgar dê den kung pal sền dờng màng tus broă lơh kwang bàng. Tus bal mờ đơs đơng lam tàm dơ̆ pơrjum sơn rờp bơh Cíñ phủ dê tơngai lơh broă bơh nam 2021 tus nam 2026, Tổng Ƀí thư ồng Nguyễn Phú Trọng sồr, lơh niam rlau tai broă lơh kwang bàng, ngan là broă atbồ, ai jơnau đơs, sền sơ wì kwang bàng nàng sac rơ wah, rơndap di ală cau ngan ngồn geh nùs nhơm, geh pràn jak; ngan ngồn “tryăng tryồng, tềm pềr, sàng goh, song ring”, “song dơpă”, ngan ngồn jơh nùs tài dà lơgar, tài làng bol tàm ală gơnoar broă đơng lam bồ bơh mpồl kwang bàng Cíñ phủ mờ gơnoar atbồ ală kâp dê. Tổng Ƀí thư tơngkah: “Bañ sền iar gơ gơs sềm rơgut”, “bañ sền gŏ pơrhê mờ tồn lah neh dum”, “bañ gơtìp pơn jồ tài bơh ală bơta kuơ ờ niam, ală broă lơh bàs sìl. Kràñ cê dră wơl, sang tĕ ală bơta ờ niam, ală cau gơ plơ̆ gơ huc bè nùs nhơm cíñ trị, niam chài, rài kis; dră wơl tơl tềl tơnggŏ blơi gơnoar broă, bơta tàm jat mpồl, rơ wah lài cau pròc mhàm tờm ờ geh tơl bơta jat jơnau sồr”.

Ai tàm dơ̆ mut pơrjum dơ̆ 1, Quôk hội khoă XV tàm ngai 20/7/2021, đơs nền là anih lơh broă ala mat dờng ngan rlau jơh làng bol dê, anih lơh broă geh gơnăp gơnoar dà lơgar dờng ngan rlau jơh bơh lơgar Kộng hòa xã hội củ nghĩa Việt Nam dê, Tổng Ƀí thư ồng Nguyễn Phú Trọng sồr, Quôk hội pal đòm jat ală cồng nha mờ mờng chài bơh 75 nam do dê, pơn jat tai tam gơl pa, tơnguh rlau tai bơta niam mờ cồng nha lơh broă nàng drơng niam ngan rlau jơh jơnau sồr, kơnòl broă cíñ trị dà lơgar dê tàm tŭ tơngai pa. Kờñ bè hơ̆ den Tổng Ƀí thư ồng Nguyễn Phú Trọng kung ờ huĭ tơngkah: “Jơh ală cau ala mat Quôk hội bol he khoă do pal pơn jat tai tơnguh nùs nhơm geh kơnòl, jơh nùs tài dà lơgar, tài làng bol, drơng broă dà lơgar, drơng broă làng bol in, sùm pơlam tàp, sền gàr nùs nhơm, bồ tơnguh, tơnguh bơta chài git wă bè tơl bơta, đềt mềr mờ iat jơnau đơs làng bol dê, lam lơh mờ lơh gơs niam ngan rlau jơh kơnòl broă mờ cau tĕ khà, làng bol jàu”.

Ală jơnau đơs niam ngan bơh Tổng Ƀí thư ồng Nguyễn Phú Trọng dê – cau kộng sản song ring, dùl nă kwang đơng lam bồ jak chài, cau sùm ring bal ờ tam gơl đah jơnau đơs mờ broă lơh, ai làng bol lơh phan đo was, ai làng bol lơh tơl khà, ai bơta kuơ làng bol dê lơh jơnau kờñ pơn đơl pràn, sùm rềp làng bol mờ geh dùl plai nùs lơbơn niam ngan.