Ồng Trần Thanh Mẫn - Chủ tịch Quốc hội pà git, Dơ̆ pơrjum ờ ờs mờng dơ̆ Dùl Quốc hội khoă XVI dê pa tơn jơh niam bơnĕ, ring bal 15 adat boh lam, 6 jơnau lơh nền tàm pơrjum geh bơta kơrnuat boh lam mờ 7 jơnau lơh nền tàm pơrjum bè bơtàu tơnguh lơh sa - mpồl bơtiàn. Chủ tịch Quốc hội cih dờp, đơs niam nùs nhơm rơcang lài, geh kơnòl, pơn đơl dờng ngan bơh ală anih lơh broă dê. Tus tŭ do, Chủ tịch Quốc hội neh kĭ ală adat boh lam, jơnau lơh nền tàm pơrjum bơh Dơ̆ pơrjum ờ ờs mờng dơ̆ Dùl dê.

Dar pơrjum dơ̆ 6 bơh Anih duh broă Lơh kơnòl broă sùm Quốc hội geh bơyai lơh 2 dơ̆, jŏ jòng mờr 6 ngai, sền swì rlau 40 tơngume. Jat Chủ tịch Quốc hội, do là dar pơrjum tơrgùm uă bè bơt bơtàu adat boh lam, mờ kung là bơta rơcang tơn, kuơmàng ngan ai Dơ̆ pơrjum dơ̆ 2 Quốc hội khoă XVI dê in. Bơh nùs nhơm hơ̆, Chủ tịch Quốc hội sồr tơrgùm uă tàm 3 jơnau sồr dờng bè broă lơh crơng gơs adat boh lam; pal ơn bơta niam, bơta gơtùi lơh jat ngan ngồn mờ jơnau sồr bơtàu tơnguh lài ngan. Dar pơrjum do, Anih duh broă Lơh kơnòl broă sùm Quốc hội rơp ai jơnau đơs gơ wèt mờ 31 tàm 41 rơndap lơh adat boh lam, jơnau lơh nền tàm pơrjum kờp dŭ yal Quốc hội in tàm Dơ̆ pơrjum dơ̆ 2; uă rơndap broă lơh geh bơta tam gơl ơnàng, gơ rềng uă tus broă lơh bơh Mpồl lơh broă sră pơ àr dà lơgar, làng bol, mpồl lơh sa kă bro mờ rài lơh sa.

Chủ tịch Quốc hội sồr, khà broă uă ngan, tŭ tơngai jal mhar ngan, mơya ờ di tài tŭ tơngai hơ pơrgon mờ tơrmù bơta tơl khà bơta niam. Ală anih lơh broă yal pal rơcang sră nggal nền nòn, gàr bơta kơ̆ kơljap bè chính trị, adat boh lam, jak chài mờ ngan ngồn; gùng dà broă lơh pal loh, gơtùi lơh geh cồng nha ngan ngồn, bơsong di broă mùl màl dê. Anih duh broă Lơh kơnòl broă sùm Quốc hội tơrgùm cribơyai ală broă dờng, ală tơngume gam jơnau đơs krơi is, ală bơta digơlan lơh gơlik bơta tam gơl ngan ngồn: “Nùs nhơm là: adat boh lam pal loh rlau, ndrờm bal rlau, ƀuơn lơh jat rlau; pal gơtùi tă bơsong bơta gơ kòl, tă ai priă jền mờ pờ gùng ai bơtàu tơnguh in. Dơ̆ 2, pal lơh kràñ bơta duh rơngòt adat boh lam mờ bơta duh rơngòt pal jat rơcang Dơ̆ pơrjum. Tŭ sền swì broă lơh crơng gơs adat boh lam nam 2027, añ sồr sac rơ wah geh bơta tờm, geh tơngume tờm; ai lài ală broă jal mhar, ală bơta gơ kòl kơrnuat boh lam mờ ală gah broă pa kờñ pal lơh sir adat boh lam nàng lơh geh bơtàu tơnguh. Añ đơs sùm, cih tàm broă lơh là hơ pơrgon bè kơnòl. Anih lơh broă lơi yal rơndap broă lơh, git nền tŭ tơngai yal den pal rơcang lài, gàr tŭ tơngai hơ pơrgon mờ bơta niam; bơsong bơta cih tàm sră uă, mơya tơnơ̆ hơ̆ dan ruc, lơh gơ rềng tus broă lơh bal”.

Chủ tịch Quốc hội sồr Chính phủ sền tìs di song dơpă ală ƀộ, gah broă lơh dà lơgar cih mat tàm sră mơya dan ơm ing halà dan ruc lơh gơ rềng tus broă lơh bal. Den tàng pal kràñ cê, pơn đơl lam lơh nàng tă bơsong kal ke, bơta gơ kòl nàng dà lơgar bơtàu tơnguh tàm bơta pa mờ jơnau kờñ lơh geh gơguh tai 2 nơm khà.

Pà git, Dơ̆ pơrjum dơ̆ 2 Quốc hội kờp dŭ sền swì mờr 60 tơngume mờ uă broă kuơmàng ngan, Chủ tịch Quốc hội sồr kờñ pal rơcang bơh gờñ, bơh ngài, pơgồp bal bơh chờm tơn; mìng tơmut tàm broă lơh ală tơngume mùl màl geh tơl bơta. Chủ tịch Quốc hội tơngkah broă tơn jơh Dơ̆ pơrjum ờ ờs mờng dơ̆ Dùl pal ngan ngồn nàng kờñ lơh geh ală broă lơh niam nàng pơn jat tai đòm jat, lơh niam; mờ kung đơs loh ală bơta ờ niam, jơnau bơh tài gơbàn mờ broă lơh bơsong, pal đơs song, đơs ngan. Tơn jơh là nàng lơh niam rlau, ờ di nàng tơn jơh dùl dơ̆ pơrjum.