Củ tịc Quôk hội ồng Trần Thanh Mẫn pà git, dơ̆ 1, pơrjum dơ̆ 9 neh geh lơh mờ nùs nhơm lơh broă jơh nùs ngan, geh kơnòl, sơrbac mhar mờ lơh ngan cíñ trị uă, lơh gơlik bơta ring bal bơh ală cau ala mat Quôk hội dê. Tàm hơ̆, tơngume geh gơtha cíñ trị - adat boh lam kuơmàng tàm dơ̆ pơrjum do là ring bal Jơnau lơh nền tàm pơrjum, lơh nền broă sền sơ wì tam gơl, bơtơl bàr, pe bơta bơh Sơnua boh lam nam 2013 dê nàng pơn jat tai lơh jat jơnau lơh nền rơndap tap sèng, tơrmù mpồl cau lơh broă sră pơ àr gơnoar atbồ bơh anih lơh broă cíñ trị dê. Lơh jat jơnau lơh nền do, poh lài, Mpồl duh broă sùm Anih duh broă Mặt trận dà lơgar Việt Nam kung neh bơyai lơh pơrjum ai jơnau đơs Jơnau rơcang cih jơnau lơh nền tàm pơrjum tam gơl, bơtơl bàr pe bơta bơh Sơnua boh lam nam 2013 dê.

Đơng lam pơrjum, Phó Củ tịc Anih duh broă Mặt trận dà lơgar Việt Nam ồng Hoàng Công Thủy đơs loh: “Broă tam gơl, bơtơl Sơnua boh lam dơ̆ do cèng bơta ai tơlik mùl màl, tơrgùm tàm 8 bơh 120 bơta Sơnua boh lam nam 2013 dê nàng lơh gơs adat boh lam di tŭ jơnau lơh nền bơh Đảng dê bè rơndap tap sèng anih lơh broă bơh Mặt trận dà lơgar Việt Nam, ală mpồl cíñ trị - mpồl bơtiàn, ală mpồl làng bol dê bơh Đảng mờ Dà lơgar jàu kơnòl; lơh sir broă lơh rơndap broă gơnoar atbồ kâp hơ đơm 2 kâp jat gùng dà rềp làng bol, drơng làng bol niam rlau”.

Củ tịc Quôk hội ồng Trần Thanh Mẫn pà git: Jơnau rơcang cih jơnau lơh nền tàm pơrjum bơh Quôk hội dê bè bàr pe gùng dà, broă lơh krơi is bơtàu tơnguh lơh sa dồ nă să is geh 7 tap mờ 17 bơta, tàm hơ̆ jơnau cih bal gơ rềng tus tam gơl anih kă bro, dong kờl geh ngui ù tiah lơh sa kă bro, dong kờl priă jền, ai càn priă mờ blơi phan; dong kờl jak chài măi mok, tam gơl pa bơceh lơh, tam gơl sồ mờ bơto bơtê cau lơh broă, dong kờl mpồl lơh sa kă bro dimơ mờ dờng, mpồl lơh sa kă bro lam lài: “Pal kah ngan rlau jơh là Jơnau lơh nền tàm pơrjum bè lơh sa dồ nă să is. Tài, jơnau lơh nền tàm pơrjum bơh Đảng dê pa kĭ tàm ngai 04/5 den Cíñ phủ, Thủ tướng kung neh pơrjum 2 dar, rơcang ai jơnau lơh nền tàm pơrjum nàng yal Quôk hội in. Đảng neh pơlam gùng dà broă lơh den bol he pal lơh jat, lam lơh ngan ngồn broă do. Añ jàu Anih duh broă lơh sa, priă jền pal pơgồp bal jơh nùs mờ Ƀộ Priă jền kung bè ală anih lơh broă geh gơ rềng rơcang lài bơh gờñ, bơh ngài”.

Củ tịc Quôk hội ồng Trần Thanh Mẫn tơngkah, jơnau lơh nền tàm pơrjum bè bàr pe gùng dà, broă lơh krơi is bơtàu tơnguh lơh sa dồ să nă is nanfg kờñ tam gơl niam anih bơcri priă kă bro; dong kờl geh dờp ù tiah lơh sa, kă bro; dong kờl priă jền, càn priă, blơi phan; chồl tơnguh lơh broă bal đah dà lơgar mờ cau dồ nă să mờ cih lài mat blơi phan mpồl lơh sa kă bro, dong kờl jak chài măi mok, tam gơl pa, bơceh lơh, lơh gơlik tam gơl sồ mờ bơto bơtê cau lơh broă, dong kờl crơng gơs mpồl lơh sa kă bro dimơ mờ dờng, mpồl lơh sa kă bro lam lài… Củ tịc Quôk hội ồng Trần Thanh Mẫn đơs nền: “Bol he pal tam gơl bồ tơngoh kơlôi sơnơng, dà lơgar lơh gơlik ala mờ sền gròi, jat nùs nhơm Tổng Ƀí thư ồng Tô Lâm neh đơs wơl uă dơ̆. Bơta gàr niam bè adat boh lam mờ dong kờl tam gơl sồ, tam gơl pa, bơceh lơh, ngan là broă dà lơgar lòt bal mờ cau dồ nă să tàm gùng bơtàu tơnguh. Añ sồr kờp sền nền nòn ală cau, ală bơta geh dờp broă dong kờl, gàr niam cồng nha bơh broă dong kờl dê tàm ngan ngồn”.

Nàng rơcang tơngume ai dơ̆ 2, pơrjum dơ̆ 9 in, poh lài, Anih duh broă Lơh kơnòl broă sùm Quôk hội kung neh ai jơnau đơs bè 3 tơngume kờp dŭ yal Quôk hội in tàm ngai do, 19/5, geh: jơnau lơh nền bơcri priă rơndap broă lơh bơcri priă lơh gùng ù gờl rơndeh lòt mhar Quy Nhơn – Pleiku, jơnau lơh nền bơcri priă Rơndap broă lơh bơcri priă lơh gùng kềng sồ 4 ƀòn dờng Hồ Chí Minh.