Anih duh broă Lơh kơnòl broă sùm Quôk hội neh ai jơnau đơs mblàng lơh loh, cih tam, tam gơl, lơh sir jơnau rơcang cih Adat rơcang lài kơryan, crùh ồs sa mờ dong kờl rềs àr. Pơn drờm mờ Jơnau rơcang cih adat boh lam yal tàm Pơrjum dơ̆ 7, jơnau rơcang cih adat boh lam dơ̆ do cih 1 bơta is ồn bè rơcang lài kơryan ồs sa gơ wèt mờ hìu ơm; 1 bơta is ồn bè rơcang lài kơryan ồs sa gơ wèt mờ hìu ơm pơgồp bal mờ kă bro; Bơ tơl jơnau cih gơ wèt mờ 2 bơta hìu ơm do jat jơnau sồr bè bơta pal geh lơngăp lơngai rơcang lài kơryan, crùh ồs sa, lik klàs rềs àr. Bulah bè hơ̆, jat Phó Kwang atbồ Anih duh broă adat boh lam ồng Nguyễn Trường Giang đơs, jơnau cih do gam cèng bơta ndrờm bal, ờ gơtùi lam lơh jat ngan ngồn gơ wèt mờ anih lơh jat adat boh lam mờ làng bol: “Bol he cih là geh phan yal ồs sa, geh broă lơh càl mut, phan rơhiăt nhơm ồs sa, nhơm khih jat jơnau sồr. Bơta gơ kòl là cau lơi cih bè do den ờ git loh. Dơ̆ 2 do là broă lơh mờ tŭ do geh ngui uă ngan tàm ală tiah drà, ală hìu bồ mat gùng ndrờm geh pơgồp bal kă bro lơm. Dilah ờ cih mùl màl den pal jàu ai Cíñ phủ halà Ƀộ trưởng Kwang àng in cih”.

Ală kwang geh jơng tàm Anih duh broă Lơh kơnòl broă sùm Quôk hội đơs nền uă ngan tus bơta kal ke tàm rơcang lài kơryan, crùh ồs sa gơ wèt mờ hìu jơnhua cờn. Kwang atbồ Anih duh broă niam chài bơto bơsram ồng Nguyễn Đắc Vinh sồr: “Hìu jơnhua cờn den jơnhua ngan, tơrgùm gal cau tai. Dilah pơn yơu gơlik geh broă lơi bè ồs sa den kal ke ngan lam lơh broă dong kờl rềs àr. Den tàng niam ngan rlau jơh là pal geh broă lơh rơcang lài kơryan den là di nga. Mơya broă dơ̆ 2 là ală broă lơh nàng rơndeh, phan crùh ồs sa in mut crùh ồs ai hìu jơnhua cờn in den kal ke rlau, den tàng pal cih mùl màl bè broă do”.

Ai Phó Củ tịc Quôk hội ồng Trần Quang Phương den đơs nền: “Jơh ală bơta hìu ndrờm pal geh bơta tơl khà. Mơya tŭ do, hìu ơm bal jơnhua cờn kung là bơta geh sền gròi ngan rlau jơh bè rơcang lài kơryan, crùh ồs sa. Pơn yơu geh uă hìu ơm bal lơh tàm gùng dềt, ờ geh gùng nàng rơndeh crùh ồs sa in mut. Mìng geh 2, 3 hìu ơm bal pa tŭ do geh lơh jat tơl khà bơt bơtàu tiah drà den geh”.

Kung tàm poh lài, tŭ ai jơnau đơs bè broă mblàng lơh loh, cih dờp, tam gơl lơh sir jơnau rơcang cih Adat Dia gơguh tai (tam gơl), Anih duh broă Lơh kơnòl broă sùm Quôk hội đơs là, broă tam gơl priă dia phơng sih 0% gơ gơs kong priă dia 5% den làng bol lơh broă sa rơp kong gơ rềng uă ngan tài giă phơng sih rơp gơguh, lơh tơguh phan bơna bơh suơn sre. Củ tịc Mpồl duh broă Jơi bơtiàn ồng Y Thanh Hà Niê Kđăm đơs loh: “10 nam do, giă phơng sih ờ gơmù. Jat jơnau yal khà phơng sih lơh gơlik gơguh mơya giă den ờ gơmù mờ làng bol lơh broă sa pal kong uă ngan. Cau sền gròi ngan tus bơta niam phơng sih mờ jat añ den do hơ̆ sồng là kơnòl bơh dà lơgar dê tàm broă atbồ pal sền gròi rlau”.

Bulah bè hơ̆, jat bơta sền sơ wì bơh Liên đoàn Kă bro Lơh sa mờ măi mok Việt Nam dê, ồng Đậu Anh Tuấn pà git, broă tam gơl phơng sih nàng kong priă dia 5% rơp ờ lơh priă blơi phơng gơguh: “Pràn jak lơh phơng sih bol he dê dờng ngan, den tàng dilah ngui dia tă 5% den hơ̆ ndrờm mờ broă blơi phan bơh lơgar ndai kung kong 5%, tàm lơgar priă tă lơh phơng gơmù. Bè hơ̆ den phơng sih tàm lơgar ờ geh bơta lơi nàng tơnguh mờ geh tŭ digơlan geh lơh tờm drà kă bro tai. Do kung là dùl bơta kal ke pal kòp dŭ bè lơi nàng bol he ờ mìng gơtùi lơh tờm pràn jak lơh phơng sih mờ gam gơtùi gàr gah lơh phơng sih tàm lơgar tai”.

Đơs pơn dut dơ̆ pơrjum mìng dùl tơngume adat boh lam nhai 8, Củ tịc Quôk hội ồng Trần Thanh Mẫn sồr ală ală anih lơh broă geh gơ rềng lơh sir 10 jơnau rơcang cih adat boh lam nàng pơyua sră nggal tus pơrjum cau ala mat Quôk hội mìng lơh kơnòl broă ala mat, kờp dŭ geh lơh bơh ngai 28 tus ngai 30/8. Củ tịc Quôk hội kung pà git, pơrjum dơ̆ 36 bơh Anih duh broă Lơh kơnòl broă sùm Quôk hội dê rơp geh lơh bơh ngai 19 tus ngai 22/8, tơngume pal sền gròi tàm dơ̆ pơrjum do là Anih duh broă Lơh kơnòl broă sùm Quôk hội rơp lùp 3 Ƀộ trưởng: “Pơrjum dơ̆ 36, lùp mờ hơ jơnau lùp bơh ală ƀộ, gah broă lơh dà lơgar dê. Kwang đơng lam bồ Quôk hội, Củ tịc mờ ală Phó Củ tịc neh đơng lam ală ƀộ, gah broă lơh dà lơgar mờ Cíñ phủ nàng rơcang ai dơ̆ lùp mờ hơ jơnau lùp dơ̆ do in. Tàm hơ̆, Ƀộ Broă lơh sa mờ Bơtàu tơnguh ƀòn lơgar, Ƀộ lơh sa mờ măi mok mờ kă bro phan hờ lơgar ndai, Ƀộ Niam chài, Tàp pràn să jan mờ Lòt nhơl rơp hơ jơnau lùp”.