Dơ̆ lùp mờ hơ jơnau lùp duh hồl ngan mờ ală jơnau lùp đơs song tàm broă pờ tơlik ồs đèng ai broă lơh sa mờ ngui tàm rài kis in. Cau ala mat ồng Phạm Văn Hòa, Mpồl Đồng Tháp đơs là, broă kờp giă bè tŭ do ờ hềt dipal mờ jơnau kờñ bơh làng bol dê, ngan là tă 10% priă dia gơguh tai. Ồng Phạm Văn Hòa sồr Ƀộ trưởng Ƀộ Lơh sa mờ măi mok mờ kă bro phan hờ lơgar ndai mblàng lơh loh broă do. Ƀộ trưởng ồng Nguyễn Hồng Diên pà git: “Ƀộ Lơh sa mờ măi mok mờ kă bro phan hờ lơgar ndai neh đơng lam tam gơl, bơ tơl Jơnau lơh nền Cíñ phủ dê sồ 28. Jat hơ̆, tàm jơnau rơcang cih yal Cíñ phủ in drim ngai do den gơmù bơh 6 khà gam 5 khà. Khà sơn rờp tơnguh bơh 0 tus 50 Kwh tus bơh 0 tus 100 Kwh. Bè hơ̆ den jơnau dan bơh ồng Phạm Văn Hòa dê neh geh cih dờp mờ neh geh yal Cíñ phủ in, di bè bơta mờ cau ala mat neh kơp kờñ”.

Hơ jơnau lùp bơh cau ala mat ồng Dương Khắc Mai dê, mpồl càr Dăk Nông bè gàr tơl năng lượng mờ jơnau rơhời tam gơl ngui năng lượng lơh geh wơl. Ƀộ trưởng ồng Nguyễn Hồng Diên đơs: “Việt Nam geh bơta pràn bè năng lượng lơh geh wơl, đèng càl, đèng mat tơngai. Tài geh ală tiah càl khồm pràn ngan, geh tiah den tơngai bè ồs. Bulah bè hơ̆ tàm bơta lơh sa bơta chài măi mok tŭ do bơh Việt Nam dê ờ gơtùi tơnguh khà năng lượng lơh geh ir uă rlau mờ bơta chài măi mok bal mờ broă lơh sa Việt Nam dê. Tài năng lượng lơh geh wơl uă ir den lơh roh lơngăp lơngai tus gùng che đèng. Bơta chài măi mok den bol he gơtùi tơnguh năng lượng lơh geh wơl dilah bơcri priă tàm anih prap gàr đèng; bơcri priă tàm ală mpồl pờ tơlik ồs đèng, ngan là gùng che ồs đèng ngac ngar”.

Lùp Ƀộ trưởng Ƀộ Broă lơh sa mờ Bơtàu tơnguh ƀòn lơgar ồng Lê Minh Hoan bè broă tàm càr Lâm Đồng tơnơ̆ tŭ cit sơnơm vaccine kòp as sồt kơltau gơlik pơ nời geh 6 rbô 631 nơm kơnrồ dà toh gơtìp jê ndul gơ jroh mờ 357 nơm kơnrồ gơtìp chơt, cau ala mat mò Trịnh Tú Anh, mpồl càr Lâm Đồng sồr: “Dan Ƀộ trưởng yal mùl màl bè broă lơh gơlik sơnơm vaccine as sồt kơltau gơlik pơ nời mờ broă sền sơ wì bơta niam bơh sơnơm vaccine do dê gơ wèt mờ kơnrồ dà toh. Bal mờ hơ̆, gơ wèt mờ ală hoàc huơr neh gơlik geh den dan mhar git loh kơnòl mờ ai geh broă rơndap lơh dong kờl ai làng bol gơtìp hoàc huơr in, nàng kờñ gàr niam rài kis làng bol”.

Jat Ƀộ trưởng ồng Lê Minh Hoan đơs, tŭ do Ƀộ tơrgùm hòi jà jơh mpồl lơh sơnơm phan ròng bơh 2 Ci kụk tiah đah jum dà lơgar mờ ală cau geh jơnau git wă jrô pah ngai ơm tàm tiah gơlik geh broă do nàng jat sền, sơm kòp kơnrồ in: “Neh là hoàc huơr den pal geh broă dong kờl. Bol hi rơp bal mờ càr Lâm Đồng nàng mblàng git loh, rơcang lài broă rơndap lơh dong kờl dipal làng bol in. Bol hi neh sồr lơh 2 tơngume bè tơnơ̆ do: Dùl là, gam lùp sền, sền sơ wì, tàm pơn drờm jơh broă lơh gơlik, lơh sră dan ai ngui, cit khà sơnơm vaccine do. Nàng đal git dut ndơl jơnau gơlik geh bơh lơi, bol he ai jơnau bơsram mờng chài bal ai ală mpồl lơh sa kă bro in mờ kờp bal ai ală anih atbồ dà lơgar in bơh dà lơgar tus kâp hơ đơm, ờ lời gơlik geh ală broă ờ niam tai”.

Broă lơh tơnguh priă lơh geh phan lơh gơs bơh suơn sre in, pơgồp bơnah  gàr kơ̆ tac phan hờ lơgar ndai, tơnguh priă lơh geh làng bol in geh uă cau ala mat sền gròi. Ƀộ trưởng ồng Lê Minh Hoan đơs là, nàng lơh mat kă bro den pal geh Jơnau lơh nền bơh Quôk hội dê nàng jàu Cíñ phủ in ai geh Jơnau lơh nền bè mat kă bro mờ kờñ geh ală tiah tam phan tơrgùm bal lơh gơlik phan bơh suơn sre ndrờm bal bè bơta niam: “Kờñ bè hơ̆ den bol he pal geh ală tiah tam phan tơrgùm bal, lơh jat jơnau sồr bè bơta niam jơh ală phan bơh suơn sre tờm ngan in, lơh geh mat kă bro dà lơgar. Dơ̆ 3 là bal mờ ală mpồl, gah lơh phan lơh ală jơnau bơceh nàng sền gàr rùp hin phan bơh suơn sre Việt Nam bol he dê tàm drà kă bro ală lơgar. Ƀộ Broă lơh sa mờ Bơtàu tơnguh ƀòn lơgar bal mờ Ƀộ lơh sa mờ măi mok mờ kă bro phan hờ lơgar ndai gam sồr Thủ tướng Cíñ phủ lơh Mpồl duh broă kòi phe dà lơgar. Tơnơ̆ hơ̆, bol hi kung pơn jat tai kơlôi sơnơng ală phan lơh gơs bơh suơn sre tờm ngan bè sầu riêng, kơphe, tiêu,…”.

Tơn jơh bơnah lùp mờ hơ jơnau lùp gơ wèt mờ 3 broă: broă lơh sa mờ bơtàu tơnguh ƀòn lơgar; lơh sa mờ măi mok mờ kă bro phan hờ lơgar ndai; niam chài, tàp pràn să jan mờ lòt nhơl, Phó Củ tịc Quôk hội ồng Nguyễn Đức Hải đơs nền: dơ̆ lùp mờ hơ jơnau lùp geh lơh duh hồl, geh kơnòl, song dơpă mờ cèng bơta bơt bơtàu. Anih duh broă Lơh kơnòl broă sùm Quôk hội jờng rơ ală Ƀộ trưởng, Kwang atbồ gah broă lơh neh rơcang lài niam ngan tơngume, tơrgùm hơ tàm ală broă mờ cau ala mat Quôk hội sền gròi; mblàng lơh loh wil tơl bè ală broă gam ờ niam. Mờ kung cih dờp bơta lơh ngan bơh ală Ƀộ trưởng dê tàm broă lam lơh jat ală jơnau lơh nền bơh Anih duh broă Lơh kơnòl broă sùm Quôk hội dê mờ sồr geh ală broă lơh bơsong ală bơta ờ niam tàm broă mờ he drơng lơh.