Jat jơnau yal bơh pơrjum pà git, làng bol jơi bơtiàn dồ êt nă cau geh mờr 14,7% khà kờp làng bol Việt Nam (ndrờm mờ rlau 14 tơlak nă cau) mờ khà kờp làng bol gơguh mhar mờ gam tàm tơngai khà kờp làng bol kơnòm să. Bulah bè hơ̆, bơta niam cau lơh broă kung gam dồ êt, khà cau lơh broă neh geh bơto bơtê mìng geh mờr 6,2% - ờ hềt ndrờm 1/3 pơndrờm mờ khà kờp bal sơl. Ală broă lơh dong kờl bơtàu tơnguh cau lơh broă jơi bơtiàn dồ êt nă cau ờ hềt ring bal, ờ hềt ngan ngồn lơh geh bơta gơn kơnờm brồ guh bơh làng bol jơi bơtiàn dồ êt nă cau dê.

Tàm tơngume jơnau rơcang cih, tơngai bơh nam 2025 tus nam 2030, Ƀộ Bơto bơtê mờ Bơsram tơlik jơnau kờñ lơh gơs mpồl cau lơh broă jơi bơtiàn dồ êt nă cau geh bồ tơngoh bơsram sră uă, tơrgùm tàm ală gah bè: lơh sơnơm, sơnơm tơmba, măi mok yal tơnggit jơnau, broă lơh sa suơn sre, priă jền – anih priă jền mờ bơto cau pơgru. Tus nam 2035, mpồl cau lơh broă jơi bơtiàn dồ êt nă cau rơp tơl pràn, lơh jat jơnau sồr bơtàu tơnguh ală gah broă tờm, pơgồp bơnah dong geh broă lơh, tơnguh priă lơh geh mờ tă pơgồp ngan ngồn tàm bơtàu tơnguh lơh sa – mpồl bơtiàn tiah làng bol jơi bơtiàn dồ êt nă cau mờ gùt lơgar.

Phó Pơgru dờng – Tiến sìh ồng Nguyễn Văn Nam, Phó Lam bồ Hìu bơsram Đại họk Tây Nguyên đơs là, nàng lơh gơtùi jơnau sồr geh ai tơlik, kờñ pal pơgồp bal bơto bơtê ală gah broă tờm mờ bơsong tơn ală broă lơh sa – mpồl bơtiàn tàm ƀòn lơgar: “Tàm gah broă lơh sa suơn sre, kờñ pal pơgồp bal broă lơh sa suơn sre măi mok siñ họk, lơh gơlik phan mờ ală mpồl gah phan geh gơ rềng nàng lơh gơs mpồl gah broă  kuơmàng. Mờ kung pal geh bơta tơrbŏ bal đah ală kâp bơsram bơh crăp rơcang, đại họk tus tơnơ̆ đại họk. Bulah bè hơ̆, bơta do lơh gơ rềng tus broă jàu bè rơ wah cau bơsram den tàng jat añ kờñ pal geh gùng dà broă lơh is ồn, bơ tơl broă jàu nàng ală hìu bơsram in geh tai pràn jak bơto bơtê. Bơdìh mờ dong kờl tàm kâp đại họk, kung pal geh priă dong kờl bơsram lời ai cau jơi bơtiàn dồ êt nă cau bơsram tai guh thạk sìh, tiến sìh in nàng lơh gơs cau lơh broă ngan ngồn jak chài”.

Tàm gah atbồ bơto bơtê, Phó Pơgru dờng – Tiến sìh ồng Tô Văn Phương – Lam bồ cơldŭ Bơto bơtê Đại họk, Hìu bơsram Đại họk Nha Trang đơs bơta kơlôi rơcang bè jơnau priă tă bơsram tàm tŭ tơngai ală hìu bơsram gam wèt tus bơta lơh tờm is priă jền. Ồng sồr kờñ pal geh tai broă lơh sền gròi, dong kờl rlau tai gơ wèt mờ ală cau bơsram dờng jơi bơtiàn dồ êt nă cau: “Tŭ do, bơta lơh sa – mpồl bơtiàn tàm tiah làng bol jơi bơtiàn dồ êt nă cau gam uă kal ke, tàm tŭ mờr tus ală hìu bơsram pal lơh tờm priă jền uă rlau tai den tàng bơta priă tă bơsram là kal ke ngan. Den tàng, broă lơh dong kờl priă tă bơsram, priă tă sàu sa, anih ơm mờ ală broă lơh bơsram sră ai cau bơsram dờng in kờñ pal geh gàr sùm, sền gròi uă rlau tai nàng lơh gơlik bơta niam ală oh in geh bơsram đại họk”.

Bơh bơta sền sơ wì dùl hìu bơsram bơto lơh sơnơm nă să is, Tiến sìh, Ƀák sìh ồng Lưu Viết Tĩnh – Phó Lam bồ Hìu bơsram Đại họk Y Zượk Buôn Ma Thuột đơs là, kung gam ală bơta ờ niam bè broă lơh đah hìu bơsram dà lơgar mờ hìu bơsram nă să is: “Bol hi geh tơl pràn jak nàng tus bal ală jơnau lơh nền bơto bơtê cau lơh broă geh bơta niam uă nàng drơng ai broă lơh sền gàr pràn kơldang să jan làng bol in. Den tàng, bol hi kơp kờñ gơtùi geh bơta ring bal rlau tai ai broă bơt bơtàu broă lơh ai hìu bơsram dà lơgar mờ hìu bơsram nă să is in”.

Ală jơnau đơs tàm pơrjum kung mblàng lơh loh, đơs sùm kờñ pal lơh sir mpồl rơ wah cau bơsram dipal mờ bơta geh ngan tiah jơi bơtiàn dồ êt nă cau; bơt bơtàu broă lơh dong kờl priă bơsram, priă tă bơsram, hìu ơm bal, mờ kung geh broă lơh ngui geh cồng nha cau lơh broă tơnơ̆ bơto bơtê. Uă cau ala mat kung sồr kờñ pal sền gròi bơtàu tơnguh pơgru là cau jơi bơtiàn dồ êt nă cau tàm ală hìu bơsram đại họk, kao đẳng tàm ƀòn lơgar.

Phó Pơgru dờng – Tiến sìh ồng Nguyễn Anh Dũng, Phó lam bồ Vụ Bơto bơtê Đại họk, Ƀộ Bơto bơtê mờ Bơsram đơs nền, Ƀộ rơp cih dờp, rơ wah ală jơnau đơs nàng gờñ lơh sir jơnau rơcang cih yal Cíñ phủ in ring bal, pơgồp bơnah lam lơh ngan ngồn jơnau kờñ bơtàu tơnguh kơ̆ kơljap jŏ jòng sùm, dong tơl nă cau jơi bơtiàn dồ êt nă cau ndrờm geh tŭ niam geh bơsram niam.