Jat Jơnau yal broă lơh làng bol kơp kờñ, Duh broă sùm Anih duh broă Làng bol kơp kờñ mờ Jat sền dan Chính phủ tơrgùm sồr lơh uă kơnòl broă jal mhar bè mhar lùp sền, lơh loh broă điểm pơrlòng môn Toán geh tềl tơnggŏ ờ di tàm càr Tuyên Quang; sơlơ lơh ngan kơryan bơta lơh gơlik, tac bro phan ờ ngan, phan sa ờ ngan, sơnơm ờ ngan; lơh pràn rơcang lài kơryan kòp mprơm gơlik mhàm; bơsong broă lơh tìs tàm broă lip sră; gàr niam lơngap lơngai rơcang lài kơryan ồs sa, crùh sa, gùng lòt tàm dà mờ bơsong jơh ală broă yal yă gal cau, jŏ jòng.Gơtùi gŏ, ală jơnau đơs, jơnau dan ndrờm sơn đờm bơh ală broă gam gơ rềng tơn tus gơnoar kuơ mờ rài kis làng bol dê. Tàm hơ̆, bơta phan ờ ngan, phan sa ờ ngan mờ sơnơm ờ ngan gam lơh gơbàn uă bơta kơlôi rơcang tài ờ mìng lơh gơ rềng tus pràn kơldang să jan mờ gam lơh gơmù bơta pin dờn cau ngui sa dê tai, lơh gơbàn hoàc huơr mpồl lơh sa kă bro lơh broă dòn song in. Pal sền gròi là bơta atbồ giă drà kă bro kung geh uă cau ala mat đơs tus sơl.

Ồng Nguyễn Thanh Hải - Kong kơnòl Anih duh broă Jak chài, Măi mok mờ Tiah ơm kis đơs là, kờñ pal yal wơl loh rlau tai ală bơta kơlôi rơcang cau tĕ khà dê bè bơta geh ngan giă phan bơna tàm tơngai lài: “Cau tĕ khà kung geh jơnau yal wơl bè do. Tŭ giă xăng zờu tàm dunia gơguh den giă phan tàm drà ngui sa kung gơguh sơl mờ gơguh mhar ngan. Mơya tŭ giă xăng zờu gơmù den giă tàm drà kă bro ờ gơmù halà gơmù lơyài ngan. Jơnau gơbàn bơta do là tềng lơi taih. Atbồ bè giă, atbồ dà lơgar tàm gah do mùl màl bè lơi mờ kơnòl gơ bè lơi taih”.

Do kung là bơta mùl màl mờ uă làng bol sền gŏ loh làng ngan tàm rài kis pah ngai. Giă xăng zờu sùm geh sền là bơta lài ngan bơh uă gah lơh gơlik phan mờ jun pơndiang phan dê. Bulah bè hơ̆, tŭ giă xăng zờu gơmù, uă bơta phan pal geh kung gam gơ ơm tàm giă jơnhua ngan, lơh priă tă dơ̆ ngui tàm rài kis làng bol dê ờ hềt geh tam gơl dipal. Bơta do ai tơlik jơnau sồr gơ wèt mờ ală anih atbồ tàm broă sơlơ gròi sền drà kă bro, kơryan bơta prap phan, tơnguh giă, gàr tàm pơrlòng ring bal tàm broă lơh nền giă.

Dùl tơngume dờp geh bơta sền gròi uă ngan bơh mpồl bơtiàn dê là broă ờ di bè điểm thi môn Toán tàm dơ̆ pơrlòng jơh kâp pe nam 2026 tàm Tuyên Quang. Tàm tŭ tơngai dơ̆ pơrlòng geh gơtha kuơmàng ngan gơ wèt mờ git nđờ tơlak nă kơnòm bơsram mờ hìu bơnhă, tơl tềl tơnggŏ ờ di ndrờm kờñ pal geh sền swì song dơpă, loh làng nàng gàr bơta ring bal. Ồng Nguyễn Văn Thắng, Phó Thủ tướng pà git: “Gơ wèt ală broă mờ mpồl bơtiàn sền gròi uă bè broă lam lơh dơ̆ pơrlòng jơh bơsram kâp pe nam 2026, gơ rềng tus điểm thi môn Toán tàm Tuyên Quang, Chính phủ neh kràñ cê sồr Ƀộ Bơto bơtê mờ Bơsram bal mờ ală anih lơh broă geh gơnoar mhar sền swì, đal git song dơpă, loh làng. Dilah git gŏ broă lơh tìs den pal lơh glài kràñ jat jơnau cih adat boh lam dê, gàr bơta ring bal gơ wèt mờ kơnòm pơrlòng mờ gàr kơ̆ bơta pin dờn làng bol dê gơ wèt mờ gah bơto bơsram”.

Jơnau sồr lơh Chính phủ dê ai tơnggŏ gùng dà ờ tam gơl là ờ pleh, ờ pồn gơ wèt mờ ală broă geh mpồl bơtiàn sền gròi. Tài bal mờ broă bơsong di cau, di broă lơh tìs, bơta kuơmàng rlau là gàr kơ̆ bơta pin dờn làng bol dê tàm bơta kràñ cê adat boh lam dê mờ bơta ring bal tàm bơto bơsram.

Bơh ală tơngume geh cribơyai tàm Dar pơrjum dơ̆ 4 bơh Anih duh broă Lơh kơnòl broă sùm Quốc hội dê gơtùi gŏ, broă lơh làng bol kơp kờñ ngai sơlơ lơh jat bơta geh ngan rài kis dê. Tơl jơnau đơs, jơnau dan cau tĕ khà dê ờ mìng yal wơl nùs nhơm, bơta kơp kờñ làng bol dê mờ gam là bơta đo was geh cồng nha ngan atbồ dà lơgar tàm tơl gah broă.