Bơta tac bro pồn tă dia, lơh gơlik phan ờ ngan, phan đòm kung gam gơlik geh kal ke. Bơh ngai 15/12/2025 tus ngai 14/3/2026, jơh gùt gah sền sơ wì dia phan lik mờ mut tàm lơgar neh git gŏ, kup bàn mờ lơh glài rlau 4 rbô 800 dơ̆ tac bro phan pồn tă dia, blac pơrlồm kă bro phan mờ jun pơndiang tìs adat boh lam phan bơna gan tiah nhàr lơgar, gơguh rlau 1 rbô dơ̆, ndrờm mờr 26% pơndrờm bal dùl tŭ mờ nam lài. Tàm lơgar, mpồl kwang àng mờ gah lơh broă geh gơnoar kung sùm git gŏ, lơh glài uă broă lơh gơlik, tac bro phan ờ ngan, phan đòm, phan ờ niam.

Kềng bơdìh hìu pơrjum Quôk hội, ală cau ala mat đơs niam bơh jơh nùs lơh broă bal bơh ală anih lơh broă geh gơnoar dê tàm broă kơryan phan ờ ngan, phan đòm, phan ờ niam. Jat Trung tướng ồng Phạm Công Nguyên, Kwang lam bồ Kụk kơrnuat boh lam mờ tam gơl wơl sră pơ àr gơnoar atbồ, sền gàr adat boh lam, Ƀộ Kwang àng – cau ala mat Mpồl càr Thanh Hóa: tềng đap bơta sồr lơh bơh Đảng dê, ală anih lơh broă geh gơnoar neh lơh pràn broă lơh kơryan phan ờ ngan, phan đòm, phan ờ niam là dùl tàm ală broă lơh lài ngan tàm tơngai tŭ do nàng gàr ai bơtàu tơnguh lơh sa niam, kơnhăp jŏ mờ gàr pràn kơldang làng bol in:

“Tŭ bol he kơryan kràñ mờ phan ờ ngan, phan đòm den lài ngan là bol he gơtùi sền gàr gơnoar kuơ bơh cau ngui sa dê. Dơ̆ 2 là lơh gơlik dùl anih tàm pơrlòng niam mờ ring bal. Dilah phan ờ ngan, phan đòm gam geh tac li la tàm drà den bơta do ndrờm mờ broă drà kă bro bơh ală mpồl lơh gơlik phan ngan gơtìp gơ rềng. Bơta do lơh gơ rềng uă ngan tus broă rơndap lơh bơtàu tơnguh bơh mpồl lơh sa kă bro, priă lơh geh bơh kă bro mờ lơh gơ rềng tus broă bơtàu tơnguh lơh sa 2 nơm khà. Kơryan mờ phan ờ ngan, phan đòm, phan ờ niam là dùl tàm ală broă ai lơh lài ngan tàm tơngai tŭ do. Lơh gơlik anih tàm pơrlòng ring bal gơ wèt mờ ală mpồl lơh sa kă bro mờ gơ gam là broă rơndap lơh rơcang lài kơryan kòp, sền gàr pràn kơldang, tơrmù priă tă blơi sơnơm tơmba”.

Củ tịc Ală mpồl tam klac bal Mpồl lơh sa kă bro dềt mờ di mơ Việt Nam, cau ala mat ồng Nguyễn Văn Thân, mpồl ƀòn dờng Hồ Chí Minh pà git, phan ờ ngan, phan đòm, phan ờ niam lơh gơbàn bơta rồn bơklơn kơn jơ̆ tus phan ngan, tus ală mpồl lơh sa kă bro song dơpă, lơh aniai tus rài lơh sa. Nàng gàr gơguh lơh sa 2 nơm khà mờ sền gàr pràn kơldang bơh làng bol dê, broă lơh rơcang lài kơryan tac bro phan pồn tă dia, blac pơrlồm kă bro phan, lơh gơlik phan ờ ngan, phan ờ niam kờñ pal pơn jat tai geh lam lơh uă:

“Ală cau lơh phan ngan, priă tă lơh uă den giă gơguh. Mơya phan ờ ngan, phan đòm, gơmù uă ngan priă tă lơh. Ờ hềt đơs là gơ lơh aniai tus pràn kơldang, rài kis kòn bơnus dê. Dilah mờ phan ờ ngan, phan đòm uă den pal lơh bè lơi nàng gơtùi gơguh lơh sa. Jơh gùt mpồl bơtiàn den gơ aniai uă ngan. Den tàng broă kơryan phan ờ ngan, phan đòm là dùl kơnòl broă jal mhar. Mìng geh 2 broă là sŏk sền tàm hìu măi. Dơ̆ 2 là tơrgùm mpồl lơh broă drà kă bro, tơrgùm sền sơ wì, sŏk sền tàm ală hìu tac phan. Ai tàm internet den pal bơh mpồl atbồ, gròi sền internet”.

Gơtùi gŏ, kơryan phan ờ ngan, phan đòm, phan ờ niam ờ mìng là jơnau sồr jal mhar nàng kờñ sền gàr gơnoar kuơ cau ngui sa dê mờ gam là bơta pal geh lài ngan nàng bơt bơtàu anih kă bro song dơpă, ring bal. Tŭ drà kă bro geh “lơh goh”, mpồl lơh sa kă bro song ring rơp geh tai bơta gơn kơnờm bơtàu tơnguh, bơta pun dờn bơh làng bol dê geh gàr kơ̆, bơh hơ̆ lơh gơlik bơngă jă kơnhăp kơ̆ ai jơnau kờñ gơguh lơh sa kơnhăp jŏ in, wèt tus gơguh lơh sa 2 nơm khà tàm tơngai tus. Bulah bè hơ̆, nàng lơh gơtùi bơta do, bơdìh mờ bơta lơh broă kràñ cê bơh ală mpồl lơh broă geh gơnoar dê den kờñ ngan geh bơta pơgồp bal bơh mpồl lơh sa kă bro mờ tơl nă cau ngui sa dê tàm broă đơs ờ mờ phan ờ ngan, phan đòm, pơgồp bơnah bơt bơtàu dùl srà kă bro niam mờ bơtàu tơnguh jŏ jòng.