Jăt mờ hơ̆, ƀòn dờng Pleiku neh bơcri priă ai ală ƀòn làng bol jơi bơtiàn dồ êt nă cau in rlau 50 tơmàn đong nàng lơh gơs ală gùng lòt, tam pa wơl kơphê, dong kờl ală hìu bơnhă rƀah, hìu bơnhă mờr ndrờm bè hìu rƀah mờ bơcri priă lơh gơs ală hìu niam chài, prăp gàr broă lơh ờs mờng bơh yau. Kơnờm bè hơ̆, rài kis làng bol tàm tiah do dê, ngan là ală ƀòn jơi bơtiàn dồ êt nă cau tàm ƀòn dờng Pleiku dê neh geh tam gơl bè ală bơta.

Ală nam rềp ndo, năc lòt nhơl bơh tiah rềp, tiah ngài tus mờ ƀòn dờng Pleiku neh lòt sền nàng kờñ gĭt bơta niam chài, trŭ gơm phan sa bơh làng bol ơm kis bơh yau tàm tiah do dê ngai sơlơ gơguh. Nam 2019, đảng viên ồng Rơ Mah Hiu ơm tàm ƀòn Tiêng 1, xã Tân Sơn, ƀòn dờng Pleiku neh khin cha pờ dồ hìu tăc phan ñô sa phan sa bơkah pơnrơ is kòn cau Jrai dê tàm ƀlàng sươn bơh hìu bơnhă he dê tơn. Ù tiah hìu tăc phan ñô sa geh uă hìu rơng ờs mờng bơh yau kòn cau Jrai dê, geh bơka bal mờ cing, sơnggơr, sơ̆, halà rùp hìu ƀồc…ndrờm là ală phan ngui mờng kwèng tàm rài kis lơh sa mờ niam chài bơh kòn cau Jrai dê. Ală phan sa ờs mờng bơh yau bơh biăp brê,  bơkàu bơlhong, nha bùm blàng… bal mờ ka rị, iar ròng tàm sươn hìu, ka dà croh geh làng bol kòn cau Jrai tàm ƀòn ròng, tam mờ lòt tras kŭp. Bulah phan trŭ gơm mờ broă trŭ gơm phan sa ƀalhiă ngan mơya lơh gơlik wơl bơta ƀô bơkah krơi is ngan, dong năc lòt nhơl tus bơh tiah rềp tiah ngài lòt jòi tus sa ngai sơlơ uă ngan. Tàm ală tŭ lơh hìu tăc phan ñô sa, bơh Ci ƀộ ƀòn Tiêng 1, đảng viên ồng Rơ Mah Hiu geh gĭt gùng dà bè bơtàu tơnguh lòt nhơl mờ prăp gàr bơta niam chài. Mờ ồng kung tus bal wil tơl bơsram ală ơdŭ bơto pơlam bè sền gàr sàng goh phan sa mờ broă bơyai lơh ală broă lơh lòt nhơl mpồl bơtiàn. Lòt di gùng, hìu tăc phan ñô sa ngai sơlơ bơtàu tơnguh, ồng Hiu geh priă jền đau mờ dong uă làng bol tàm ƀòn geh tai priă jền. Đảng viên ồng Rơ Mah Hiu chờ hờp yal: Hìu bơnhă geh jơnau kơlôi pờ hìu tăc phan ñô sa nàng lơh geh tai priă jền ai hìu bơnhă in mờ lơh geh priă jền ai làng bol in. Jơnau kờñ bơh năc dê là kờñ gŏ geh tam ya xoang mờ cing mồng kòn cau Jrai dê. Añ hòi mpồl cing mồng tàm ƀòn tus dròng. Añ tơm priă ai mpồl in, nàng khi in pơn jăt tai ngui niam bơhiàn ờs mờng bơh yau, lài ngan là lơh geh phan sa, dơ̆ bàr là gàr bơhiàn niam chài ờs mờng bơh yau mò pàng dê.

Tân Sơn là xã rềp kềng bơh ƀòn dờng Pleiku dê. Tàm do geh 5 ƀòn, thôn. Tàm hơ̆ gh 2 ƀòn Tiêng 1 mờ Tiêng 2 geh uă ngan là ală hìu bơnhă kòn cau Jrai. Bơh nam 2016 tus tŭ do, kơnờm lam lơh jăt Jơnau lơh nền tàm pơrjum (Nghị kwết) sồ 06, ală ƀòn làng bol kòn cau tàm xã geh sền gròi lơh pa, lơh niam wơl gùng lòt mờ ală hìu pơrjum mpồl bơtiàn. Làng bol geh bơto pơlam bè lơh broă lòt nhơl mpồl bơtiàn, prăp gàr niam chài cing mồng, tàñ ồi kòn cau…Tàm lơh gơlik phan lơh broă sa sươn sre, làng bol geh dong kờl tam pa wơl kơphê, lơh gùng lòt tàm sươn sre mờ lơh tiah tam phan jăt tơl jơnau sồr tăc mờ lơgar ndai. Kwơmàng, 63 dơ̆ hìu rƀah, hìu mờr ndrờm bè hìu rƀah geh dong kờl kờp jơh 1 tơmàn 300 tơlak đong nàng tơn hìu ồm sèt ñhăt dà mìu, dong kờl sơntìl chi tam, phan ròng bơh pria ai bơh priă ală broă lơh dê. Tŭ do, tàm 350 hìu làng bol kòn cau Jrai tàm xã Tân Sơn, tŭ do mìng gam 3 hìu bơnhă rƀah, priă lơh geh kờp bal dồ nă cau tàm lồi nam 2023 pa do là 43 tơlak đong. Bal mờ hơ̆, ală ƀòn ndrờm geh mpồl cing, mpồl tàñ ồi kòn cau, là tiah dong làng bol tìp măt lơh kwèng,  bơto yal wơl ală bơta niam chài ờs mờng bơh yau niam bơnĕ is bơh kòn cau Jrai dê tai. Ồng Rơ Châm Joi, đảng viên ƀòn Tiêng 2, xã Tân Sơn, ƀòn dờng Pleiku pà gĭt: Tŭ do, hìu lơi kung geh lơm kơphê, geh ù lơh kòi. Làng bol chờ hờp ngan. Tŭ do, dà lơgar bơcri priă lơh gùng lòt; ling klàng làng bol gơnoar ătbồ mblàng yal bè sră kham sơm kòp ờ sa priă kung lơh geh 95% sơl.

Ồng Phạm Văn Hiếu, Ƀí thư Đảng ủy xã Tân Sơn, ƀòn dờng Pleiku pà gĭt, jơnau kờñ bơh Jơnau lơh nền tàm pơrum sồ 06 Ƀan Câp hàñ thàñ ủy ƀòn dờng Pleiku dê là tơrgùm hòi jà, ngui geh cồng nha ală bơta pràn priă jền bơcri bơtàu tơnguh lơh sa- mpồl bơtiàn tiah làng bol jơi bơtiàn dồ êt nă cau in. Tài bè hơ̆, ală nam do, Đảng ủy xã mờ ală Ci ƀộ ƀòn, thôn neh đơng lam, sồr jơh ală anih lơh broă ciñ trị lam lơh jăt ală broă lơh, broă pơlam lơh sa mờ ală broă dong kờl dipal mờ ală ƀòn làng bol jơi bơtiàn dồ êt nă cau.

Tàm hơ̆, Đảng ƀộ mờ gơnoar ătbồ lòt bal mờ làng bol tàm tam gơl rơndăp tăp sèng chi tam, phan ròng; ngui  bơta gơguh jak măy mok dê tàm lơh broă sa, bơh hơ̆ tơnguh uă priă lơh geh, tơrmù rƀah kơ̆ kơl jăp. Ồng Phạm Văn Hiếu, Ƀí thư Đảng ủy xã Tân Sơn, ƀòn dờng Pleiku, đơs: Bơh tŭ geh broă lơh mờ Jơnau lơh nền tàm pơrjum (Nghị kwết) bơh Tỉñ ủy càr, Thàñ ủy ƀòn dờng dê den rài kis làng bol dê geh tam gơl loh làng, khà hìu bơnhă rƀah gơmù pah nam. Uă hìu bơnhă rƀah geh dà lơgar, mặt trận, cau geh nùs nhơm niam sền gròi dong kờl, den tàng tam gơl mờ tơl ngui tơl sa tàm rài kis.

Ală cồng nha tàm xã Tân Sơn, ƀòn dờng Pleiku, càr Gia Lai dê pà gŏ, broă ai ală Jơnau lơh nền tàm pơrjum bơh Đảng dê lòt mŭt tàm rài kis, neh lơh gơlik geh ală cồng nha geh kwơ ngan, lơh tam gơl tơl làm rài kis mpồl bơtiàn, tơnguh uă bơta niam rài kis làng bol dê.