Pa jơh bơsram Cao đẳng mơya ờ hềt jòi geh broă lơh di pal, bi H’Đoái Byă, ơm tàm ƀòn Ê Rang, sơnah ƀòn Thành Nhất, càr Dăk Lăk neh cih mat dan bơsram ơdŭ bơsram sơ kấp Kỹ thuật trŭ gơm phan sa bơh tiah do dê bơyai lơh. Bi H’Đoái sền gĭt do mơlà bơta chài bơtơl tai, mơlà dùl pơlam broă lơh dilah ờ hềt jòi geh broă lơh di mờ gah bơsram neh geh bơsram.

"Ală dơ̆ bơsram bè do ai he in ală jơnau gĭt wă ngan ngồn mờ bơto bơtê nền nòn rlau, tơnơ̆ do geh gĭt uă rlau tai bè ală phan sa, geh uă jơnau gĭt wă rlau tai bè trŭ gơm phan sa, bơka phan sa gơlơh niam mat rlau. Jơnau kờñ bơh añ dê tŭ bơsram jơh khoă bơsram do den gơtùi mŭt lơh tàm ală hìu drơng năc ñô sa ha là kông ty in".

Bi H'Đoái Byă là dùl tàm 60 nă cau bơsram là cau jơi bơtiàn dồ êt nă cau tus bal ơdŭ sơ cấp Kỹ thuật trŭ gơm phan sa bơh Anih duh broă sơnah ƀòn Thành Nhất pơgồp bal mờ Hìu bơsram Cao đẳng Buôn Ma Thuột dê bơyai lơh. Tàm pơgap bàr nhai, cau bơsram geh bơto pơlam ală bơta chài rơcang rào goh phan, trŭ gơm phan, prăp ơn phan ngui sa, gàr niam sàng goh phan sa mờ bơka niam phan sa.

Jat ồng Nguyễn Hữu Luật, Phó Củ tịc Duh broă sùm Anih duh broă Làng bol sơnah ƀòn Thành Nhất, càr Dăk Lăk, ơdŭ bơsram geh lam lơh jat Rơndap broă lơh dềt sồ 3, Rơndap broă lơh sồ 5 bè bơtàu tơnguh bơto bơtê broă lơh mờ bơsong broă lơh ai cau lơh broă tiah jơi bơtiàn dồ êt nă cau mờ tiah kơh bơnơm in. Do là ơdŭ bơto broă lơh sơn rờp bơh sơnah ƀòn dê lam lơh bơh priă jền nam 2026 tơnơ̆ tŭ lam lơh broă lơh gơnoar atbồ ƀòn lơgar bàr kấp. Broă rơ wah broă lơh geh ƀòn lơgar jat tàm jơnau kờñ bơh làng bol dê mờ bơta geh ngui tơnơ̆ tŭ bơto bơtê. Ală ơdŭ pơn jat tai kung rơp geh kờp sền nàng dipal rlau mờ jơnau kờñ broă lơh geh ngan.     

“Sơnah ƀòn Thành Nhất kung pơn jăt tai pờ ală ơdŭ sền gĭt bàr pe broă lơh di pal mờ bơta geh ngan tŭ do dê nàng dong ai làng bol in geh bơta gĭt wă, sền gĭt geh broă lơh di pal, nàng bơh tŭ hơ̆ làng bol kung bè là cau bơsram rơwah dùl broă lơh, dùl broă lơh nàng kờñ tơnguh geh priă lơh geh mờ nàng bơtàu tơnguh rài kis”.

Lam lơh rơndap broă lơh dềt sồ 3 gơ wèt Rơndap broă lơh sồ 5 bơh Broă lơh jơnau kờñ dà lơgar 1719 dê, ală tiah tàm Dăk Lăk pơn jat tai lùp sền jơnau kờñ, pơgồp bal mờ anih bơto broă lơh pờ ală ơdŭ dipal mờ tơl mpồl cau lơh broă dê. Broă bơto ờ mìng ơm wơl tàm broă rcang lài bơta chài lơm mờ ngai sơlơ pơgồp bal mờ bơta pràn jòi broă lơh, lơh geh is broă lơh mờ geh tai priă jền tơnơ̆ mờ tŭ jơh bơsram.

Tàm sơnah ƀòn Tân An, lŏ H’Ju Êban, ơm tàm ƀòn Kmrơng Prŏng, neh pờ anih lơh niam hàng să tàm ƀòn tơn tơnơ̆ tŭ tus bal tàm dùl ơdŭ bơsram lơh niam hàng să  bơh ƀòn lơgar dê bơyai lơh. Tŭ do lŏ H’Ju neh geh priă jền sùm.

“Añ neh geh tus bal bơsram ơdŭ bơsram make-up bơh sơnah ƀòn Tân An dê bơyai lơh. Sơnđờm bơh bồ nam 2026 añ neh pờ anih, broă lơh do neh cèng wơl priă jền sùm ai hìu bơnhă añ in”.

Lơh jăt ală broă lơh jơnau kờñ dà lơgar bè tơrmù rƀah, bơ̆t bơtàu ƀòn lơgar pa mờ bơtàu tơnguh lơh sa - mpồl bơtiàn tiah làng bol jơi bơtiàn kòn cau dùl êt nă cau, tơngai bơh nam 2016-2024, càr Dăk Lăk neh bơto broă lơh sơ kấp ai rơlao 34 rơbô nă cau lơh broă tàm ƀòn in. Tơnơ̆ tơmŭt bal, nam 2025 geh pơgăp 5 rơbô 400 nă cau lơh broă pơn jăt tai geh bơto. Tus lồi nam 2025, khà cau lơh broă geh bơsram broă lơh bơh ƀòn lơgar dê geh 70%, tàm hơ̆ 27% geh dờp sră jơh bơsram.

 Nàng ală ơdŭ bơto broă lơh ờ jŏ tơngai in gơtùi lơh geh tŭ niam broă lơh, tơngume bơto bơtê pal kờp tus jơnau kờñ ngui cau lơh broă tơnơ̆ mờ tŭ jơh bơsram. Gơwèt mờ ală hìu bơsram bơto broă lơh, tơngai bơto bơtê gơtùi tơrmù mơya bơnah tàp lơh broă geh sền gròi nàng cau bơsram in gờñ ngui geh bơta chài neh bơsram.

Ồng Trần Quốc Cường, Phó Lam bồ Hìu bơsram Cao đẳng Buôn Ma Thuột, càr Dăk Lăk pà gĭt, tơnơ̆ tŭ lơh kơ̆ kơl jăp mpồl lơh broă, hìu bơsram pơn jăt tai pơgồp bal mờ ală tiah lùp sền jơnau kờñ, pờ ală ơdŭ broă lơh di pal mờ jơnau kờñ geh ngan:

"Sền gròi tàm jơnau kờñ mpồl bơtiàn dê, tŭ do mpồl lơh sa kă bro gam kờñ geh bơta lơi, mpồl bơtiàn gam kờñ ală gah broă lơh lơi, den hìu bơsram rơ̆p pơgồp bal mờ Anih duh broă Làng bol ală sàh, sơnah ƀòn nàng bơto bơtê, dong kờl cau bơsram geh tŭ tơngai bơto bơtê lơyah tơngai mơya gĭt tơl jơnau git wă bè bơto bơtê dùl bă ngan ngồn, sùm là bơh 3 tus 6 nhai. Bol añ rơ̆p tơrgùm lơh broă lơh tàm pơgăp 2 nhai lơm, nàng dong kờl cau lơh broă in tŭ jơh bơsram gơtùi mŭt tơn tàm drà lơh broă mờ tŭ do gam kờñ".

Jăt Broă rơndăp lơh tam gơl pa, tơnguh uă bơta niam bơto bơtê broă lơh ƀòn lơgar tus nam 2030, Dăk Lăk ai jơnau kờñ pah nam bơto bơtê, bơto pơlam bơta chài broă lơh ai pơgăp 10 rơbô nă cau lơh broă ƀòn lơgar in, khà geh broă lơh tơnơ̆ tŭ bơto bơtê rơlao 85%; ai lơh lài cau lơh broă tàm tiah làng bol jơi bơtiàn dồ êt nă cau, tiah sar lơgar ngài in.

Ồng Nguyễn Quang Thuân, Phó Lam bồ Sờh Broă Dơlam is càr Dăk Lăk đơs là, nàng jơnau kờñ do geh mut lơh ngan ngồn, broă tàm tơrbŏ bal đah anih bơto broă lơh mờ anih ngui cau lơh broă geh sền là dùl jơnau sồr kwơ màng.

 “Ală hìu bơsram, ală anih bơto bơtê broă lơh pơgồp bal mờ ală mpồl lơh sa kă bro, pơgồp bal mờ ală mpồl lơh sa kă bro tàm càr mờ bơdìh càr, geh tŭ là ală mpồl lơh sa kă bro tàm lơgar ndai nàng tơnguh uă bơta niam bơto bơtê, kung bè bơyai lơh bơto broă lơh, bơyai lơh bơsram tàp ai kơnòm bơsram, cau bơsram dờng in; nàng tơnơ̆ tŭ geh sră cơng tàng jơh bơsram broă lơh, ală oh gơtùi lơh broă tơn, ờ duh pal bơto bơtê wơl gơ wèt mờ ală mpồl lơh sa kă bro”.

Dùl ơdŭ bơto broă lơh digơlan mìng jŏ jòng bàr pe nhai, mơya bơta kuơ ờ gŏ di mìng tàm pang sră cơng tàng jơh bơsram lơm. Kuơmàng rlau là cau bơsram geh tai tŭ tơngai niam jòi broă lơh, lơh geh is broă lơh mờ geh tai priă lơh geh. Tŭ broă lơh geh rơwah di pal mờ jơnau kờñ mờ gơ jat bal mờ broă lơh tơnơ̆ mờ tŭ bơto bơtê, bơta pràn bơh broă lơh jơnau kờñ dà lơgar dê hơ̆ sồng ngan ngồn gơ lòt mut tàm rài kis, pờ tai tŭ niam nàng làng bol, ngan là làng bol jơi bơtiàn dồ êt nă cau in, rơcang lài brồ guh.