Jơnau yal tàm Pơrjum Quôk hội kờp dŭ 6 nhai bồ nam do, gơguh GDP bơh Việt Nam dê gơguh wơl niam đau, kờp dŭ geh 5,8%. Ală kwang bàng đơs là, 6 nhai lồi nam bulah kung gam kal ke, mơya kơp kơnờm jơnau kờñ gơguh GDP gùt nam 2024 geh 6,5% bơh ală bơta dong kờl geh tơnguh mhar ai priă bơcri dà lơgar, gah broă drơng ala mờ tac phan hờ lơgar ndai pơn jat tai gơguh wơl niam, ngan là broă lơh dong kờl, tă bơsong kal ke ai rài lơh sa in pơn jat tai geh Cíñ phủ sồr lam lơh jơh nùs.

Nàng lơh geh jơnau kờñ gơguh lơh sa 6,5% nam 2024, bàr, pe jơnau đơs bơh kwang bàng Quôk hội dê đơs là, pal pơn jat tai lơh lài tơngume tờm broă lơh priă jền bơh broă dong kờl priă jền tơnguh kờp jơh jơnau kờñ dê; sơlơ tơnguh tai ai priă bơcri dà lơgar gàr di tŭ tơngai hơ pơrgon mờ tơrgùm bal, kuơmàng là ală rơndap broă lơh phan bơna kuơmàng.

Kwang bàng Trần Hoàng Ngân, Mpồl kwang bàng ƀòn dờng Hồ Chí Minh đơs: “Bol he geh bơta lơh ngan cíñ trị dờng ngan, pin dờn nam do bol he gơtùi lơh geh khà gơguh lơh sa 6,5%. Bol he pơn jat tai lam lơh ală broă lơh bơh bồ nam là 12 kơnòl broă lơh, tàm hơ̆ geh 3 broă lơh tam gơl pràn kuơmàng. Lài ngan là bơta tam gơl pràn bè jơnau pal jat jat gùng dà là bol he sơlơ tơnguh tai broă tam pà kâp, tam pà gơnoar ai ală tiah in nàng tơnguh nùs nhơm rơcang lài, ngac ngar, bơceh lơh bơh ală tiah dê. Dơ̆ 2 là tam gơl pràn bè phan bơna, bol he neh lam lơh ală broă lơh priă jền dong kờl ai broă bơtàu tơnguh wơl m bơtàu tơnguh lơh sa, sơlơ tơnguh tai bơcri priă dà lgar ai phan bơna in, ngan là ală rơndap tap sèng phan bơna bè gùng lòt”.

Cíñ phủ ai tơlik ală kơnòl broă, broă lơh tờm, tàm hơ̆, kơnòl broă lài ngan là tơrgùm lơh sir ală jơnau pal jat, adat boh lam, gùng dà, broă lơh nàng tă bơsong mơ tơn ală kal ke, kòl yan ai mpồl lơh sa kă bro in, ai priă jền drơng broă chồl pràn bơtàu tơnguh lơh sa – mpồl bơtiàn. Kwang ala mat Nguyễn Chu Hồi, Mpồl kwang bàng ƀòn dờng Hải Phòng đơs là, jơnau kờñ gơguh GDP là gơtùi lơh geh: “Dùl là kung gam pal gàr kơ̆ broă lơh sa dờng. Dơ̆ 2 là bơh bơta geh ngan 2 quý sơn rờp bồ nam dê, bulah bol he kung gam kal ke mơya bơta sồr lơh kràñ cê là kuơmàng ngan; tàm tơngai tŭ do den sơlơ kuơmàng rlau tai, bơta ring bal bơh dà lơgar tus kâp hơ đơm at tê bal mờ lòt bal, pal geh lơh mờ ală broă lơh ngan ngồn, mờ ală cồng nha ngan ngồn tàm ală tiah, tŭ hơ̆ bol he hơ̆ sồng gơtùi lơh geh dùl cồng nha bal ai jơh gùt lơgar in dồ bă wil tơl”.

Kung tàm poh lài sơl, Quôk hội neh iat mờ cribơyai Sră yal Cíñ phủ dê bè tam gơl wơl priă nhai bơh 1 tơlak 800 rbô đông pah nhai gơguh tus 2 tơlak 340 rbô đông pah nhai bơh ngai 01/7/2024; tam gơl priă nhai jơh sơnam rê rlô lơh broă, priă dong kờl ƀảo hiểm xã hội, dong kờl cau geh màng mờ dà lơgar mờ dong kờl mpồl bơtiàn. Ală kwang bàng ring bal mờ Cíñ phủ bè lam lơh tam gơl priă nhai bơh sơn rờp bơh 1 tơlak 800 rbô đông pah nhai gơguh tus 2 tơlak 340 rbô đông pah nhai, đơs là, do là khà gơguh pal cih dờp ngan tàm tŭ tam gơl priă nhai, pơgồp bơnah tam gơl, tơnguh niam rài kis ai cau sa priă nhai in, lơh gơlik bơta gơn kơnờm tơnguh cồng nha lơh broă. Ồng Trần Văn Lâm, mpồl kwang bàng càr Bắc Giang đơs là: “Khà tơnguh priă nhai kờp tŭ kờp jơh kes priă nhai lời ai broă tam gơl wơl priă nhai jat broă rơndap lơh neh bơt bơtàu mờ pơgap rlau 900 rbô tơmàn. Ngui priă hơ̆ nàng tơnguh priă nhai jat ƀàng priă nhai kung tơnguh jat ƀàng priă nhai yau den jơh tơl nă cau ndrờm tơnguh lơm, rơp lơh gơlik nùs nhơm chờ hờp chờ hờn”.

Bàr, pe jơnau đơs sồr Cíñ phủ sền gròi ală broă lơh gàr tơl priă jền lam lơh kơ̆ kơljap, jŏ jòng sùm mờ geh cồng nha broă lơh; sơlơ tơnguh tai ală broă lơh sền gròi, atbồ mờ ală broă lơh kơryan bơta roh giă priă tơnơ̆ tŭ tơnguh priă nhai. Ồng Lê Minh Nam, Mpồl kwang bàng càr Hậu Giang sồr: “Bol he kung kờñ pal geh ală broă lơh dong kơryan ală bơta gơ rềng ờ niam, ngan là tơrmù tus khà lơyah ngan rlau jơh bơta tơnguh priă nhai mơya gơ jat bal mờ bơta gơguh giă, ƀuơn ngan lơh gơmù bơta kuơ bơh broă tơnguh priă nhai dê. Bơh hơ̆, dan Cíñ phủ sền sơ wì ală bơta gơ rềng bè ală dơ̆ tơnguh priă nhai lài mờ geh gơ rềng ală bơta ờ niam, gơ rềng tus bơta giă mờ roh giă priă pal sền gròi tai. Tŭ tơnguh priă nhai kung lơh gơguh tai tă dơ̆ ngui dà lơgar, gơ rềng tus bơta roh giă priă kung pal sền sơ wì tus bơta gơ rềng bè giă ală phan pal geh”.